¹ انتوما يا لولاد طيعوا والديكم في الرب, على خاطر هاذا هو الصواب. ² " اكرم باباك و امك", هاذي هي اول وصية مربوطة بوعد من عند الله, ³ " باه تنال الخير, و يطولك ربي في عمرك". ⁴ و انتوما يا الوالدين, ما تغَضبوش اولادكم, و ربيوْهم على وصية ربي و لمخافة تاعو. العبيد و السادة ⁵ و انتوما يا لعبيد, طيعوا سادتكم اللي في لرض بخوف و رهبة و قلب صافي كيما تطيعوا المسيح, ⁶ موش باه يشوفوكم برك باه ترضِيو الناس, بالصح كي اللي راكم تخدموا في المسيح, عاملين واش يحب ربي من القلب, ⁷ اخدموا بنية صافية كيما تخدموا لربي, موش للناس. ⁸ عالمين بلي مهما واحد يعمل الخير ربي يكافيه, عبد كان و الا حر. ⁹ و انتوما يا سادة, عاملوهم بالمثل, و خليو عليكم التهديد, و اعلموا بلي انتم ثاني سيدكم في السموات, و ما يحايل على حتى واحد. السلاح الكامل تاع الله ¹⁰ و في لخر يا خاوتي, تقووا في ربي و قدرة قوتو. ¹¹ و البسوا السلاح الكامل تاع الله باه تقدروا تثبتوا في وجه المكايد تاع ابليس. ¹² على خاطر الحرب تاعنا ماهيش مع دم و لحم, بالصح راهي مع الرياس, مع السلاطين, مع الوُلية تاع هاذا العالم عالم الظلام تاع الدنيا, الارواح جنود الشر في الجو تاع السماء. ¹³ على هاذيك هزوا السلاح الكامل تاع الله باه تقدروا تقاوموا في نهار الشر, و تقدروا تثبتوا بعد ما تكملوا كل شيء. ¹⁴ امالا اثبتوا متمنطقين بالحق, هازين الدرع تاع البر, ¹⁵ و لابسين في رجليكم الاستعداد باه تنشروا انجيل السلام. ¹⁶ رافعين فوق الكل الترس تاع ليمان, اللي بيه تقدروا تطفيو كل السهام الشاعلة تاع لعدو. ¹⁷ و حطوا على روسكم الخوذة تاع الخلاص, و السيف تاع الروح اللي هو الكلمة تاع الله. ¹⁸ صليو في كل و قت في الروح بكل صلاة و كل طلبة, و اتولهوا على هاذا الكل بالصلاة و الدعاء, للقديسين الكل, ¹⁹ و ليا انا, باه يعطيني ربي كلام كي نفتح فمي, و نبدى نعلم جهار بالسر تاع الانجيل, ²⁰ اللي على خاطرو راني سفير مسلسل, باه نجاهر بيه كيما لازم نتكلم. تحيات ختامية ²¹ و باه تعرفوا على احوالي انا ثاني, و واش راني ندير, ضرك يخبركم تيخيكس الخو لعزيز و الخادم الامين في المسيح, ²² اللي على جال هاذا بعثتو عندكم, باه تعرفوا احوالنا و تفرح قلوبكم. ²³ سلام لكل الخاوة, و محبة باليمان من عند الله الاب و الرب يسوع المسيح. ²⁴ النعمة لكل اللي يحبوا ربنا يسوع المسيح محبة عمرها ما تزول. امين ـ تكتبت هاذي لبرية لناس افسس من روما بيد تيخيكس ـ