¹ من عند بولس, الرسول تاع يسوع المسيح كيما حب الله, و تيموتاوس الاخ, ² للقديسين اللي في كولوسي, و الخاوة المومنين بالمسيح: عليكم النعمة و السلام من عند الله بابانا و الرب يسوع المسيح. صلاة و شكر ³ نحمد الله الاب تاع يسوع المسيح, في كل وقت نرفعوا فيه صلوات على جالكم, ⁴ على كل ما سمعناه على ايمانكم بالمسيح يسوع, و محبتكم للقديسين الكل, ⁵ على جال الرجاء اللي وجدهولكم الله في السماوات, الشيء اللي سمعتوا بيه قبل في كلمة حق الانجيل, ⁶ اللي وصلت ليكم انتمّا كيما وصلت ثاني للعالم كامل, اللي بدات تجيب ثمارها و تتنشر فيه, كيما جابت ثمارها و تنشرت بينكم انتوما من نهار اللي سمعتوا و عرفتوا النعمة معرفة تاع الصح. ⁷ و هاذا هو اللي تعلمتوه من عند ابفراس زميلنا لعزيز في خدمة الله و الخادم الامين تاع المسيح عندكم, ⁸ و هوثاني اللي خبرنا بمحبتكم في الروح. ⁹ على جال هاذا الشيء احنا نصلِيو ليكم من نهار اللي سمعنا عليكم هاذي لخبار طالبين من الله يفيض عليكم من معرفة الارادة تاعو, في كل حكمة و فهامة روحية, ¹⁰ باه تسيروا في حياتكم كيما يحق للرب و يرضيه رضاية تامة, و يجعلكم مثمرين في كل صلاح و تزيدوا تعرفوا الله اكثر و اكثر, ¹¹ متقويين بكل القوة اللي في القدرة تاعو المجيدة, باه تتحملوا و انتم فرحانين كل شيء بثبات و صبر, ¹² شاكرين الاب اللي جعلكم اهل باه تتشاركوا مع القديسين في ملكوت النور. ¹³ اللي نجانا من سلطان الظلمة, و عدانا للملكوت تاع ابن محبته, ¹⁴ اللي بيه نلنا الفداء, و بالدم تاعو غفران الذنوب. جاه المسيح و العظمة تاعو ¹⁵ هو تصويرة الله اللي ما يتشافش والبكر تاع كل المخلوقات. ¹⁶ بيه خلق الله كل شيء: اللي في السماوات و اللي على لرض, اللي يتشاف و اللي ما يتشاف, مهما كانت عروش و الا سيادات و الا رياسات و الا سلاطين. الكل بيه هو و ليه هو تخلق. ¹⁷ هو اللي كان قبل كل شيء, و فيه يكون كل شيء, ¹⁸ هو الراس تاع لبدن: لكنيسية. هو لبدية, و بكر من قام من بين الموتى و باه يكون هو لول في كل شيء. ¹⁹ على خاطر الله حب باه يكون فيه الملء بكلو, ²⁰ و حب باه يصالح بيه هو كل شيء مع ذاتو, مهما كان على لرض و الا في السماوات, عمل الصلح بالدم تاعو اللي ساح على الصليب. ²¹ و انتم اللي كنتوا من قبل غرباء على الله و عديان بافكاركم و اعمال الشر اللي تديروها, و ضرك تصالح معاكم ²² في بدن الانسان تاع المسيح, اللي سلمو للموت باه يجعلكم تكونوا قدام الله قديسين بلا عيب و لا لوم, ²³ اذا كان ثبتوا في الايمان راسخين ما تتزعزعوش على رجاء الانجيل, اللي سمعتوه, و اللي وصلت اخبارو لكل مخلوق تحت السماء, و اللي جعلني انا بولس خادم ليه. الجهاد تاع بولس على جال لكنيسية ²⁴ و انا نفرح بالوجاع اللي نقاسيها على جالكم, و نكمل في لبدن تاعي على الالام اللي قاساها المسيح, على جال لبدن تاعو اللي هو لكنيسية, ²⁵ اللي جعلني خادم ليها, على حساب تدبير الله اللي تمدلي على جالكم, باه نتمم كلمة الله. ²⁶ السر لمخبي من قديم الدهر على طول اجيال, بالصح كشفو اليوم للقديسين تاعو, ²⁷ اللي راد الله باه يخليهم يعرفوا قداه كا ن هاذا السر غني و مجيد عند الامم, اللي هو المسيح فيكم رجاء المجد. ²⁸ اللي بيه ننادِيو و نبشروا في كل الناس, و نعلموهم بكل رزانة, باه نجيبوا كل واحد كامل في المسيح يسوع. ²⁹ الشيء اللي راني نتعب على جالو و نجاهد, على حساب قدرتو اللي تعمل فيا بقوة.