¹ و اما النهار اللي راح يجي فيه ربنا يسوع المسيح و كيفاه راح نكونوا معاه, نطلب منكم يا خاوتي, ² ما تخليوْ حتى حاجة تزعزع افكاركم, و ما تخافوش, لا من روح و لا من كلمة ولا من برَية تجيكم و تحاسبوها من عندنا: تقول باللي او المسيح جاء. ³ واحد ما يخدعكم باي حاجة, على خاطر هاذاك النهار ما يجيش حتى ن يسود الكفر قبل, و يبان راجل المعصية, ابن لهلاك, ⁴ لعدو اللي يطّلع روحو فوق كل من يتسمى اله ومعبود, ويقعد في الهيكل تاع الله, و يجرب باه يكون هو بذاتو اله. ⁵ تتفكروا انا كي كنت عندكم كنت نقول لكم هاذا لكلام؟ ⁶ راكم تعرفوا واش الحاجة اللي ما تخليهش يظهر ضرك حتى ن يجي وقتو. ⁷ السر تاع المعصية قاعد يعمل في خدمتو حتى ن تتنحي الحاجة اللي معطلاتو ضرك, ⁸ وقتها يظهر راجل المعصية, اللي تقضي عليه نفخة من فم الرب, و يفنيه بظهورو كي يجي. ⁹ و يكون ظهور راجل المعصية الاثيم بالقدرة اللي يعملها الشيطان, بكل قوة, و بايات و معجزات كاذبة, ¹⁰ و كل لخدع تاع الاثم, في الناس الهالكين, على خاطر هما ما قبلوش محبة الحق اللي بيها ينالوا الخلاص. ¹¹ و على جال هاذا الشيء يبعث لهم الله قوة التضليل, حتى يصدقوا لكذب, ¹² و يحاكم جميع اللي ما قبلوش الحق, و فرحوا بالشر. اثبتوا ¹³ نحمدو ربي و نشكروه دايما على جالكم يا خاوتنا لعزاز عند الرب, باللي الله خايركم من لول للخلاص, بالقداسة اللي يمدها الروح و بالايمان بالحق, ¹⁴ هاذا الامر اللي دعاكم ليه الله بالانجيل اللي جبناه احنا ليكم, باه تنالوا الجاه تاع ربنا يسوع المسيح. ¹⁵ مالا يا خاوتي اثبتوا واحكموا في التعاليم اللي تعلمتوها, ان كانت بالكلام و الا بالبريات اللي كتبناهالكم. ¹⁶ و ربنا يسوع المسيح في ذاتو, و الله بابانا اللي حبنا و مدلنا تشجيع ما يفناش و رجاء صالح بالنعمة تاعو, ¹⁷ يشجع قلوبكم و يثبتكم في الصلاح ان كان في لكلام و الا في لفعال.