¹ Bakhumbuteni kutsi batfobele babusi netiphatsimandla, babalalele, balungele wonkhe umsebenti lolungile, ² kubete lowetfuka lomunye, bangabi tilwi, nekutsi babemnene, bakhombise kutfobeka kuwo wonkhe muntfu. ³ Ngoba natsi matfupha sake saba tilima futsi sangalaleli. Besidukisiwe futsi sitigcilatekile ngetinkhanuko letitinhlobonhlobo nekutijabulisa. Besiphila ebubini nasemoneni. Besinengekile futsi sitondzana sodvwa. ⁴ Kwatsi kube sihawu saNkulunkulu uMsindzisi wetfu nelutsandvo lwakhe kubantfu lubonakaliswe, ⁵ akuyanga ngemisebenti yekulunga lesasiyentile, kepha wasisindzisa ngemusa wakhe, ngekuhlantwa kwekutalwa kabusha nekuvusetelwa ngaMoya Longcwele, ⁶ lowatselwa tikwetfu nguNkulunkulu ngalokucicimako ngemsindzisi wetfu Jesu Khristu, ⁷ kute kutsi sesentiwe semukeleka kuye kutsi silungile ngemusa wakhe, singaba tindlalifa sibe nelitsemba lemphilo yaphakadze. ⁸ Lomlayeto utsembekile. Ngifuna wena ugcizelele letintfo leti, khona labo labakholelwe kuNkulunkulu batsakasele kutimbandzakanya emisebentini lemihle. Letintfo leti tinhle futsi timcoka kwanome ngangubani. ⁹ Kepha gwemani kuphikisana lokubulima, nelulibo lwekutalana nekubanga nekubanga ngemtsetfo. Letintfo leto atisitani futsi tilite. ¹⁰ Nibomkhweshela umuntfu lobanga kwehlukana emkhatsini wenu, emva kwetecwayiso letimbili noma sinye, ¹¹ wati kutsi umuntfu lonjalo ugucukile etindleleni letikahle futsi uyona futsi utehlulela yena. ¹² Nase ngitfumele Athemasi noma Thikhikhusi lapho, phangisa ute kimi eNikhopholisi, lapho lasengincume kucitsa khona busika. ¹³ Yentani konkhe leningakwenta kutfumela Zenasi ummeli endleleni na Apholosi, kuze bangasweli lutfo. ¹⁴ Bantfu betfu kumele bafundze kutimbandzakanya emisebentini lemihle kuze banike lusito loluphutfumako, futsi bangabi ngulabangatseli titselo. ¹⁵ Bayakuvusela bonkhe laba labanami. Bingelela labo labasitsandza ngekukholwa. Umusa awube kini nonkhe.