¹ Pawula, sisebenti saNkulunkulu nemphostoli wa Jesu Khristu ngekukholwa kwebantfu labakhetsiwe baNkulunkulu nelwati lweliciniso lelivumelana nekwesaba Nkulunkulu, ² ngelitsemba lekuphila kwaphakadze, lekwatsi Nkulunkulu longawacali emanga, wetsembisa kungakafiki tonkhe tikhatsi takadzeni. ³ Ngesikhatsi lesifanele wabonakalisa livi lakhe ngekushumayela kwami njengesetsenjwa ngekwemyalo waNkulunkulu uMsindzisi wetfu. ⁴ Ku Thithusi, indvodzana yeliciniso kulolukholo lesikulo kanye kanye. Akube ngumusa nekuthula lokuvela kuNkulunkulu Babe nakuKhristu Jesu uMsindzisi wetfu. ⁵ Phela ngakushiya eKhrethe ngalenjongo lena, kutsi uhlele kahle tintfo leto letatingakahleleki nekutsi ubeke babonisi kuwo onkhe emadolobha njengoba ngikuyalile. ⁶ Umbonisi kufanele angasoleki, indvodza yemfati munye, lonebantfwana labatsembekile labangakadvumi ngekunganakekeli noma kungalaleli. ⁷ Kubalulekile loko kumbonisi, njengalobuke bantfu bendlu yaNkulunkulu, kutsi angasolakali. Akukafaneli abe sidlova, angasheshi akwate, angabi sidzakwa, angatsandzi kulwa futsi angabi indvodza lenemhobholo. ⁸ Esikhundleni saloko, kufanele aphatse kahle tihambi, futsi abe ngumtsandzi walokulungile, Kufanele aticaphele, alunge, abengcwele, futsi abe ngulotibambako. ⁹ Kufanele abambe acinise kulomlayeto lotsembekile lafundziswa wona, khona atokhona kukhutsata labanye ngaletifundziso letikahle futsi acondzise labo labamelana naye. ¹⁰ Ngoba kune bantfu labanyenti labaphikisako, nalabakhuluma lite nebakhohlisi, ikakhulu labo bekusoka. ¹¹ Labo kubalulekile kutsi bemiswe. Baphatamisa yonkhe imindeni ngekuyifundzisa tintfo letilihlazo bentele kutfola inzuzo ngebubi lobungakameli bakufundzise. ¹² Lomunye webaphrofethi wabo watsi, ''BaseKhrethe babacali bemanga njalo nje, batilwane letimbi, batimiti letivilaphako.'' ¹³ Lobufakazi lobu buliciniso. Ngako ke, balungiseni ngemandla, khona batocina ekholweni, ¹⁴ bangalaleli tinganekwane temaJuda noma lemiyalo yebantfu labafulatsele liciniso. ¹⁵ Kulabo labahlantekile, tonkhe tintfo tihlantekile. Kodvwa kulabo labangcolile nalabo labangakholwa, kute lokuhlantekile, kodvwa kokubili tingcondvo tabo nanembeza wabo kungcolile. ¹⁶ Bayavuma kutsi bayamati Nkulunkulu, kepha bayamphika ngetento tabo. Bayenyanyeka, abalaleli, futsi bayehluleka kwenta noma ngumuphi umsebenti lomuhle.