Salam ¹ Salam ari Yakobus, hamba Allah ngau Tuhan Yesus Kristus, salam ngau kedua belas suku de perantauan. Iman ngau Hikmat ² Bala menyadik, antik kitak jatuk kalam pencubaan, angap yak utai te nyuruh gaga. ³ KItak ketau, ujian teradap iman kitak ngasil ke perajin. ⁴ Isak ke perajin yak ngasil ke buah te besuh, isak kitak sempurna, utuh, ndai sik kurang nama-nama. ⁵ Tapi apabila dentara kitak bisik te kekurang hikmat, ya kalah mintak ngau Allah,-te merik ngau semua urang ngau murah ati, ngau ndai mangkit-mangkit-, maka hal yak bakal deberik ngau ya. ⁶ Kalah depintak alam iman, nang sekalik-kalik ragu, empadai urang te ragu sama ngau ngelumang laut, teberawing kibak kanan empadai ribut. ⁷ Urang te upa yak, nang ngira kalau ya bulih sesuatu re Tuhan. ⁸ Empadai ati urang te becabang dua, ndai tenang alam idup ya. ⁹ Baik kitak te nugau alam keadaan ren'ah bemegah empadai kedudukan yak tingik, ¹⁰ ngau urang kaya empadai kedudukan yak babah, empadai ya ayap upa bunga rumput. ¹¹ Empanas mata panas terbit ngau panas kayah, ngelayus ke rumput yak, sampai bunga jatuk ngau ayap pemaik. Upa yak halnya ngau urang kaya; detengah-tengah usaha, ya bakal lenyap. ¹² Gagalah urang te tan alam pencubaan, empadai antik ya daah tan uji, ya bakal nerimak mahkota kehidupan te dejanyi ke Allah ngau urang te ngasih Ya. ¹³ Antik urang decuba, nang ya madah: Pencubaan tuk re Allah!" Empadai Allah ndai mampu decubai ulih te jaik, piyak ugak Ya ndai encubai sapa-sapa. ¹⁴ Tapi tiap-tiap urang decubai ulih keining ya kedirik, empadai ya dirit ngau depikat ulih yak. ¹⁵ Antik keining ya tekabul, ngelahir ke dusa, tik dusa dah matang, natai ke maut. ¹⁶ Bala menyadik te ku kasih, nang kitak sesat! ¹⁷ Setiap pemerik te baik ngau bala anugerah te sempurna, penatai yak ratau, deturun re Apai segala terang; entang Ya ndai sik perubahan atau kemayang empadai betukar. ¹⁸ Penekak Ya kedirik, Ya nyadi ke kita ulih firman kebenaran, isak de tingkat te udah detentu, kita jadi anak tuai dentara semua ciptaanYa. ¹⁹ Bala menyadik te kukasih, ingat hal tuk: setiap urang kalah gercak ninga, tapi lubah kalau banai, ndai mudah luat; ²⁰ Empadai peluat mensia ndai ngerja ke te benar dadap Allah. ²¹ Maka buai semua te kutur te jaik, terimak ngau lemah lembut firman te detanam alam ati kitak, te bekuasa nyelamat ke jiwa kitak. ²² Tapi kitak kalah jadi pelaku firman, ndai tau cuma ninga na; empadai antik ndai piak, kitak nipu dirik. ²³ Empadai antik urang cuma ninga na, ndai ngerja, ya sempama urang te betilik decermin, nilik mua te asli. ²⁴ Baruk kejap ya medak direk, ya dah angkat, kelupa upa nama mua ya. ²⁵ Tapi barangsapa te neliti ukum te sempurna, ukum te memerdekakan urang, serta ngau ya betekun alam yak, ya bukai hanya ninga untuk ngelupa ke yak, tapi benar-benar ngerja yak, ya bakal gaga ulih pempulah dirik ya. ²⁶ Antik bisik urang ngangap dirik ya beribadah, tapi ndai nyaga dilah ya, ya nitu dirik, maka sia-sia ibadah ya. ²⁷ Ibadah te murni, ndai becacat cela dadap Allah, Apai kita; nyenguk yatim piatu, ngau janda-janda alam kessusah sidak, nyaga isak sidak ndai decemar ulih denia.