Salam ¹ Ari penatuai ngau Gayuh ke kukasih alam kebenaran. ² Menyadik te kukasih, aku bedoa, semuga nuan baik ngau sehat alam segalaa hal, sama ngau jiwa mih baik. ³ Aku gaga bebenar, rama ninga kisah sidak tentang mih idup alam kebenaran. ⁴ Bagi aku ndai sik pengaga te lebih re pada yak, bahwa bala anak idup alam kebenaran. ⁵ Menyadik te kukasih, mih bebuat sebagai urang pecayak, mih udah ngerja ke nama-nama untuk sidak, walaupun sidak urang penatai (asing). ⁶ Sidak dah madah dadap jemaat tentang kasih mih. Baik benar pempulah mih, antik mih nulung sidak ngau cara te bekenan de mata Allah. ⁷ Empadai nama Ya sidak angkat ndai nerimak nama-nama re uraang te ndai ngelala Allah. ⁸ Kita kalah nerimak urang-urang te upa yak, isak kita tau ngamik bagian alam pekerja sidak untuk kebenaran. ⁹ Aku dah nulis sikit ngau jemaat, tapi Diotrefes te ining kak jadi urang tekenal dentara kitak, ndai kak ngakuk kami. ¹⁰ Maka, antik aku datai, aku mintak kitak merati semua pempulah te depulah ya, empadai ya melitir ke anai kasar ngau kami; ndai gak apan puas ngau yak, ya bukai cuma ngai nerimak sidak te datai tapi besayang ke urang te kak nerimak sidak, sampai ngucil ke sidak re jemaat. ¹¹ Menyadik te kukasih, nang nunak te jaik, tunak te baik. Sapa te mulah te baik, yaa berasal re Allah, tapi barangsapa mulah te jaik, ya ndai suah medak Allah. ¹² Tentang Demetrius semua urang merik kesaksian te baik, kami madah miak ugak tentang ya, mih ketau, kesaksian kami benar. ¹³ Mayuh hal te kak kutulis ke ngau kitak, tapi aku ngai nulis ngau kertas, pelupin. ¹⁴ Aku ngarap kak betemu mua ngau mih. ¹⁵ Damai sejahtera nyerta mih! salam re kaban-kaban mih. Padah ke salamku ngau kaban-kaban sikuk sikuk.