Salam ¹ Ari Petrus, rasul Yesus Kristus, ngau bala urang penatai te tesebar de Pontus, Galatia, Kapadokia, Asia mit, ngau Bitinia, ² yak urang-urang te depilih sesuai ngau rencana Allah, Apai kita, ngau te dekudus ke ulih Roh, isak taat ngau Yesus Kristus, ngau nerimak pecik darah-Ya. Sekira kasih karunia ngau damai sejahtera makin melimpah atau kitak. ³ Tepuji Allah Apai TUhan kita Yesus Kristus, empadai rahmat Ya te besai udah ngelahir ke kita agik ulih pemangkit Yesus Kristus dentara urang mati, ngau idup te penuh arapan, ⁴ untuk nerimak bagiaan te ndai dapat benasa, te ndai tau cemar, ndai tau layus, te dah detaruh de surga bagi kitak. ⁵ Kitak te depeliara ngau kekuatan Allah, empadai iman kitaak sementara kitak nunguk ke keselamatan te udah siap untuk denyata ke rama zaman pengabis. ⁶ Kita tau gaga, biar pun pituk kita sisa ngau mayuh pencubaan. ⁷ Maksud semua tuk untuk ngemukti ke iman kitak-te jauh lebih tingik re nilai mas te duji ngau api-isak kitak bulih puji-pujian ngau kemuliaan, ngau kehormatan, rama ari Yesus madah ke direk. ⁸ Sekalaikpun kitak pan suah medak Ya, tapi kitak ngasih Ya. Kitak pecayak ngau Ya, sekalikpun kitak ndai medak Ya. KItak gaga, empadai pengaga te mulia ngau te ndai gik numut madah, ⁹ empadai kitak dah ncapai tujuan iman kitak, keselamatan jiwa kitak. ¹⁰ Keselamatan yak mek te deselidik ngau deteliti ulih nabi-nabi te udah benubuat tentang kasih karunia te udah dejatah untuk kitak. ¹¹ Sidak neliti sebila maya ngau tipa te demaksud ke ulih Roh Kristus, te bisik alam sidak, roh ke udah suah merik kesaksian tentang semua penisa te nimpak Kristus ngau tentang semua kemuliaan te nyusul udah yak. ¹² Ngau sidak dah depadah kalau sidak bukai ngelayan dirik sidak, tapi ngelayan kitak, ngau bala nama-nama te deberik ngau kitak pituk ngelalu perentara kitak, te ulih Roh Kudus, te dutus re surga, madah ke berita Injil ngau kitak, bala hal te ining deketau bala malaikat. ¹³ Maka dari yak, siap ke akal budi kitak, waspada, ngau letak ke semua arapan kitak alam kasih karunia te deberik ngau kitak rama penyataan Yesus Kristus. ¹⁴ Kitak kalah idup sebagai anak-anak te taat, nang nunak ke hawa nafsu te nguasa kitak rama kitak gik budu, ¹⁵ tapi seluruh idup kitak kalah kudus, upa Ya te ngumai kitak ugak kudus, ¹⁶ empadai bisik detulis: Kudus em kitak, empadai Aku kudus. ¹⁷ Ngau antik kitak ngumai Ya Apai, te ngakim semua urang tampa panang bulu, menurut pempulah sidak, maka kitak kalah idup taat selamak kitak numpang de denia tuk. ¹⁸ Empadai kitak dah detebus re cara idup kitak te sia-sia, te dewaris ke kitak re inik akik kitak, bukai ngau barang te ndai bereti (fana), mas ngaua pirak, ¹⁹ tapi ngau darah te mahal, darah Kristus, te sama ngau darah anak domba te ndai becacat. ²⁰ Ya dah depilih sapan denia depulah, tapi empadai kitak, Ya baruk madah kedirek de pengabis zaman. ²¹ Empadai Ya kitak pecayak ngau Allah, te udah ngemangkit ke Ya dentara urang mati, ngau memulia ke Ya (Yesus), nyak nyuruh iman ngau pengarap kitak tetuju ngau Allah. ²² Empadai kitak dah nyuci ke dirik ulih taat ngau kebenar, nyak nyuruh kitak tau ngamal ke kasih persaudaraan te tulus ikhlas, kitak kalah ngasih pangan ngau tulus ihklas. ²³ Empadai kitak dah delahir ke agik bukai re benih te fana, tapi benih te ndai fana, ulih firman Allah, te idup ngau te kekal. ²⁴ Empadai: "Semua te idup upa rumput, ngau semua kemuliaan ya upa bunga rumput, rumput jadi rangkai, bunga e jatuk, ²⁵ tapi firman Tuhan tetap untuk selamanya." Tuk mek firman te depadah ke Injil ngau kitak.