¹ Nagsao ni Yahweh kenni Moises, a kinunana, ² Ibagam kadagiti Israelita, 'Siasinoman kadagiti tattao ti Israel, wenno siasinoman a ganggannaet nga agnanaed iti Israel a mangted iti siasinoman kadagiti annakna kenni Moloc, ket masapul a mapapatay. Masapul a batuen isuna dagiti tattao iti dayta a daga. ³ Ilisikto met ti rupak iti dayta a tao ken ilaksidkonto isuna manipud kadagiti tattaona gapu ta intedna ti anakna kenni Moloc, tapno laeng marugitan ti nasantoan a lugarko ken saan a maraem ti nasantoan a naganko. ⁴ No ikidem dagiti tattao iti dayta a daga dagiti matada iti dayta a tao inton intedna ti siasinoman kadagiti anakna kenni Moloc, no saanda isuna a papatayen, ⁵ ket ibaw-ingkonto ngarud ti rupak a maibusor iti dayta a tao ken iti pulina, ket ilaksidkonto isuna ken dagiti isuamin a nangaramat iti bagina iti dakes tapno agbalin a balangkantis para kenni Moloc. ⁶ Ti tao a mapan kadagiti makisasao kadagiti natay, wenno kadagiti makisasao kadagiti espiritu tapno aramatenda dagiti bagida kadakuada iti dakes, Ibaw-ingkonto ti rupak a maibusor iti dayta a tao; ilaksidkonto isuna manipud kadagiti tattaona. ⁷ Ngarud, idatonyo dagiti bagiyo kenni Yahweh ket agbalinkayo a nasantoan, gapu ta siak ni Yahweh a Diosyo. ⁸ Masapul a salimetmetanyo dagiti bilbilinko ken tungpalenyo dagitoy. Siak ni Yahweh, ti nangilasin kadakayo a maipaay kaniak. ⁹ Dagiti amin a mangilunod iti amana wenno iti inana ket masapul a mapapatay. Inlunodna ti amana wenno inana, isu ti darana maipaawitto kenkuana. ¹⁰ Ti lalaki a makikamalala iti asawa iti sabali a lalaki, dayta ket, siasinoman a makikamalala iti asawa ti kaarubana---ti nakikamalala a lalaki ken ti nakikamalala a babai ket sigurado a mapapatay. ¹¹ Ti lalaki a makikaidda iti asawa ti amana ket imbabainna ti bukodna nga ama. Ti anak a lalaki ken ti asawa ti amana ket agpada a sigurado a mapapatay. Ti darada ket maipaawitto kadakuada. ¹² No makikaiddda ti maysa a lalaki iti manugangna a babai, isuda a dua ket sigurado a mapapatay. Nakaaramidda iti kinaderrrep. Ti darada ket maipaawitto kadakuada. ¹³ No ti maysa a lalaki ket makikaidda iti sabali a lalaki, nga ibilangna a kas babai, agpadada a nakaaramid iti maysa a banag a makarimon. Ket masapul a mapapatayda. Ti darada ket maipaawitto kadakuada. ¹⁴ No ti maysa a lalaki ket mangasawa iti babai ken inasawana met laeng ti inana, daytoy ket kinadangkes. Masapul a mapuoranda, isuna ken dagiti babbai, tapno awanen ti kinadangkes kadakayo. ¹⁵ No ti maysa a lalaki ket makikaidda iti maysa nga ayup, masapul a mapapatay isuna, ken masapul a patayenyo ti ayup. ¹⁶ No ti maysa a babai ket umasideg ti aniaman nga ayup tapno kaiddaenna daytoy, masapul a papatayenyo ti babai ken ti ayup. Ket masapul a mapapatayda. Ti darada ket maipaawitto kadakuada. ¹⁷ No makikaidda ti maysa a lalaki iti kabsatna a babai, anakman a babai ti amana wenno iti anak a babai ti inana--- no makikaidda isuna kenkuana ken ti babai ket makikaidda met kenkuana, nakababain daytoy a banag. Masapul a mailaksidda iti imatang dagiti tattaoda, gapu ta nakikaidda isuna iti kabsatna a babai masapul nga sagabaenna ti basolna. ¹⁸ No makikaidda ti maysa a lalaki iti maysa a babai kabayatan iti panagreglana ket nakikaidda kenkuana, inikkatna ti abbong ti pagayusan ti darana, ti pagtataudan ti darana. Agpada a masapul a mailaksid ti lalaki ken babai kadagiti tattaoda. ¹⁹ Masapul a dika makikaidda iti babai a kabsat ti inam wenno amam, gapu ta ibabainmonto ti asideg a kabagiam. Masapul nga sagabaem ti bukodmo a basol. ²⁰ No ti maysa a lalaki ket makikaidda iti asawa ti ulitegna, imbabainna ti ulitegna. Masapul nga ikaroda iti nagbasolanda ket matayda nga awanan iti anak. ²¹ No ti maysa a lalaki ket asawaenna ti asawa ti kabsatna a lalaki, daytoy ket kinarugit.Imbabainna ti kabsatna; ket saandanto a maaddaan ti anak. ²² Masapul ngarud a salimetmetanyo dagiti amin nga alagadek ken dagiti amin a lintegko; masapul a tungpalenyo dagitoy tapno saanakayo nga isarwa iti daga a pangipanak kadakayo a pagnaedanyo. ²³ Masapul a saanyo a suroten iti kaugalian dagiti nasion a paksiatekto iti sangoananyo, gapu ta inaramidda amin dagitoy a banbanag, ket karimonko ida. ²⁴ Imbagak kadakayo, "Tawidenyonto ti dagada; itedkonto kadayo tapno tagikuaenyo, maysa a daga nga addaan ti agay-ayus a gatas ken diro. Siak ni Yahweh a Diosyo, a nangisina kadakayo manipud kadagiti dadduma a tattao. ²⁵ Masapul ngarud nga mailasinyo ti nadalus ken narugit nga ayup ken ti nadalus a billit ken saan a nadalus. Masapul a saanyo a rugitan dagiti bagbagiyo babaen kadagiti narugit nga ayup wenno billit wenno aniaman nga agkarkarayam iti daga, nga inlasinko a kas narugit manipud kadakayo. ²⁶ Masapul a nasantoankayo, ta siak, ni Yahweh, ket nasantoan, ken inlasinakayo manipud kadagiti sabali a tattao, gapu ta kukua kayo. ²⁷ Ti lalaki wenno babai a makitungtong iti natay wenno makitungtong kadagiti espiritu ket sigurado a mapapatayda. Masapul a batoen ida dagiti tattao. Ti darada ket maipaawitto kadakuada."