¹ Nagsao ni Yahweh kenni Moises--daytoy ket kalpasan ti pannakatay dagiti dua nga annak a lallaki ni Aaron, idi immasidegda kenni Yahweh ket natayda. ² Kinuna ni Yahweh kenni Moises, "Makisaritaka kenni Aaron a kabsatmo ket ibagam kenkuana a saan a mapan iti aniaman a tiempo idiay kasasantoan a lugar iti uneg ti kurtina, iti sangoanan ti pangabbong a kalub nga adda iti rabaw ti lakasa. No aramidenna dayta, matay isuna, gapu ta agparangak babaen iti ulep iti ngatoen pangabbong a kalub. ³ Isu kastoy ti masapul nga iseserrek ni Aaron iti kasasantoan a disso. Masapul a sumrek isuna nga adda tugotna a bumaro a bulog a baka a kas daton a gapu iti basol, ken kalakian a karnero kas daton a mapuoran. ⁴ Masapul nga ikawesna ti nasantoan a lino a tunika, ken masapul nga isuotna ti lino a makin-uneg a pagan-anay, ken masapul nga isuotna ti lino a barikes ken lino a turban. Dagitoy dagiti nasantoan a lupot. Masapul nga agdigus isuna iti danum ket kalpasanna ikawesna dagitoy a pagan-anay. ⁵ Masapul a mangala isuna iti dua a kalakian a kalding manipud iti kagimongan dagiti tattao iti Israel kas daton gapu iti basol ken maysa a kalakian a karnero kas daton a mapuoran. ⁶ Ket masapul nga idatag ni Aaron ti bulog a baka a kas daton a gapu iti basol, nga agbalinto a para iti bagina, tapno mangaramid iti pangabbong para kenkuana ken ti pamiliana. ⁷ Ket masapul a mangala isuna iti dua a kalding ket idatagna dagitoy iti sangoanan ni Yahweh idiay pagserrekan ti tolda ti gimong. ⁸ Ket masapul nga agbunot ni Aaron para kadagiti dua a kalding, maysa a bunot a para kenni Yahweh, ken ti maysa ket para iti mapapanaw a kalding. ⁹ Masapul nga idatag ni Aaron ti kalding a nabunot a para kenni Yahweh, ket idatonna dayta a kalding kas daton a gapu iti basol. ¹⁰ Ngem ti kalding a nabunot a para iti kalding a mapapanaw ket masapul a maipan a sibibiag iti sangoanan ni Yahweh, tapno mangaramid ti pangabbong babaen iti panangibaonna iti daytoy idiay let-ang a kas kalding a mapapanaw. ¹¹ Kalpasanna, masapul nga idatag ni Aaron ti bulog a baka para iti daton a gapu iti basol, nga agpaayto a para iti bagina. Masapul a mangaramid isuna iti pangabbong para iti bagina ken para iti pamiliana, isu a masapul a patayenna ti bulog a baka a kas daton a gapu iti basol para iti bagina. ¹² Masapul a mangala ni Aaron iti insensario a napno iti beggang a naggapu manipud iti altar iti sangoanan ni Yahweh, a napno dagiti imana iti napino a nagiling a nabanglo nga insenso, ket ipanna dagitoy a banbanag idiay uneg iti kurtina. ¹³ Sadiay ket masapul nga ikabilna ti insenso iti apoy iti sangoanan ni Yahweh tapno ti asuk manipud iti insenso ket maabbonganna ti pangabbong a kalub iti rabaw ti pammaneknek iti tulag. Masapul nga aramidenna daytoy tapno saan isuna a matay. ¹⁴ Kalpasanna, masapul a mangala isuna iti dara ti bulog a baka ket iwarsina daytoy babaen iti ramayna idiay sangoanan iti pangabbong a kalub. Masapul nga iwarsina ti dara babaen iti ramayna iti maminpito a daras iti sangoanan ti pangabbong a kalub. ¹⁵ Kalpasanna, masapul a patayenna ti kalding a para iti daton a gapu iti basol a para kadagiti tattao ken ipanna ti darana iti uneg ti kurtina. Sadiay ket masapul nga aramidenna iti dara ti kas iti inaramidna iti dara ti bulog a baka: masapul nga iwarsina daytoy iti pangabbong a kalub ken iti sangoanan iti pangabbong a kalub. ¹⁶ Masapul a mangaramid isuna iti pangabbong para iti nasantoan a lugar gapu kadagiti narugit nga aramid dagiti tattao ti Israel, ken gapu iti panagsalungasingda ken ti amin a basbasolda. Masapul met nga aramidenna daytoy para iti tolda ti gimong, a pagigianan ni Yahweh iti nagtetengngaanda, iti imatang dagiti narugit nga aramidda. ¹⁷ Masapul nga awan ti siasinoman iti uneg iti tolda ti gimong no sumrek ni Aaron tapno mangaramid iti pangabbong iti kasasantoan a lugar, ken agingga a rummuar isuna ken malpas a nangaramid iti pangabbong para iti bagina ken iti pamiliana, ken para iti entero a kagimongan ti Israel. ¹⁸ Masapul a rummuar isuna iti altar nga adda iti sangoanan ni Yahweh ken mangaramid iti pangabbong para iti daytoy, ken masapul a mangala isuna iti dara ti bulog a baka ken dara ti kalding ket ikabilna daytoy kadagiti sara iti aglawlaw iti altar. ¹⁹ Masapul a mangiwarsi isuna iti dara iti daytoy babaen iti ramayna iti maminpito a daras tapno dalusanna daytoy ken tapno idatonna daytoy kenni Yahweh, manipud iti narugit nga ar-aramid dagiti tattao ti Israel. ²⁰ Inton malpasnan a maaramid ti pangabbong para iti kasasantoan a lugar, ti tolda ti gimong, ti altar, masapul nga idatagna ti sibibiag a kalding. ²¹ Masapul nga ipatay ni Aaron dagiti dua nga imana iti ulo ti sibibiag a kalding ken ipudnona iti kalding dagiti amin a kinadakes dagiti tattao ti Israel, amin a panagsalungasingda, ken amin a basbasolda. Kalpasanna, masapul nga ikabilna dayta a kinamanagbasol iti ulo ti kalding ket palubosanna ti kalding babaen iti panangaywan iti maysa a tao a nakasagana a mangiturong iti kalding idiay let-ang. ²² Masapul nga awiten ti kalding ti amin a kinadakes dagiti tattao idiay awan matagtagitao a lugar. Idiay let-ang, masapul a palubosan ti lalaki ti kalding. ²³ Kalpasanna, masapul nga agsubli ni Aaron iti uneg ti tolda ti gimong ket ikkatenna ti lino a lupot nga inkawesna sakbay a simmrek iti kasasantoan a lugar, ken masapul nga ibatina dagitoy a lupot idiay. ²⁴ Masapul nga agdigus isuna iti danum idiay nasantoan a lugar, ken ikawesna dagiti gagangay a lupotna; ket masapul a rummuar isuna ken idatonna ti datonna a mapuoran ken ti daton a mapuoran a para kadagiti tattao, ken iti daytoy a wagas, mangaramid isuna iti pangabbong para iti bagina ken para kadagiti tattao. ²⁵ Masapul a puoranna ti taba ti daton a gapu iti basol iti rabaw ti altar. ²⁶ Ti lalaki a nangpalubos iti kalding a mapapanaw ket masapul a labaanna dagiti pagan-anayna ken agdigus iti danum; kalpasan dayta, mabalinnan ti agsubli iti uneg ti kampo. ²⁷ Ti bulog a baka a para iti daton a gapu iti basol ken ti kalding a para iti daton a gapu iti basol, a naiyuneg iti darana a naaramat iti panangaramid iti pangabbong iti nasantoan a lugar, ket masapul a mairuar iti kampo. Sadiay ket masapul a puoranda dagiti lalat, lasag, ken bagis. ²⁸ Ti mangpuor a lalaki kadagidiay a paset ket masapul a labaanna dagiti pagan-anayna ken agdigus iti danum; kalpasan dayta, mabalinnan ti agsubli iti uneg ti kampo. ²⁹ Agnanayonto nga annuroten daytoy para kadakayo nga iti maikapito a bulan, iti maikasangapulo nga aldaw ti bulan, masapul nga agpakumbabakayo ken saankayo nga agtrabaho, naiyanakman ditoy wenno ganggannaet a makipagnanaed kadakayo. ³⁰ Gapu ta iti daytoy nga aldaw ti pannakaabbong ket naaramid para kadakayo, a mangdalus kadakayo manipud kadagiti amin a basbasolyo tapno agbalinkayo a nadalus iti sangoanan ni Yahweh. ³¹ Daytoy ket napasnek nga Aldaw a Panaginana a para kadakayo, ket masapul nga agpakumbabakayo ken saankayo nga agtrabaho. Agnanayonto nga annuroten daytoy para kadakayo. ³² Ti kangatoan a padi, ti mapulotan ken madutokan nga agbalin a kangatoan a padi a kasukat ti amana, ket masapul nga aramidenna daytoy a pannakaabbong ken ikawesna dagiti lino a lupot, dayta ket, dagiti nasantoan a lupot. ³³ Masapul a mangaramid isuna iti pangabbong para iti kasasantoan a lugar; masapul a mangaramid isuna iti pangabbong para iti tolda ti gimong ken para iti altar, ken masapul a mangaramid isuna iti pangabbong para kadagiti papadi ken para iti amin a tattao iti kagimongan. ³⁴ Agnanayonto nga annoruten daytoy para kadakayo, a mangaramid iti pannakaabbong para kadagiti tattao ti Israel gapu kadagiti amin a basbasolda, maminsan iti makatawen." Ket naaramid daytoy kas imbilin ni Yahweh kenni Moises.