¹ Ngarud agbalinkayo a mannulad ti Dios, a kas dagiti ay-ayatenna nga annak. ² Ken agbiagtayo iti ayat, kas inayatnatayo met ni Kristo ken intedna ti bagina para kadatayo. Maysa isuna a daton ken sagut, nga agbalin a makaay-ayo nga ayamuom iti Dios. ³ Nasken a saan a madakamat kadakayo ti kinaderrep wenno aniaman a kinarugit wenno nagartem a panangagum, a kas umno kadagiti namati. ⁴ Saanyo nga ibaga uray dagiti naaalas, minamaag a sasao, wenno makaidadanes nga angaw, a saan nga umno. Ngem ketdi adda koma ti kinamanagyaman. ⁵ Ta nalawag nga ammoyo nga awan ti naderrep, narugit, wenno naagum a tao, nga isu ket, maysa nga agrukbab kadagiti didiosen, nga adda tawidna iti pagarian ni Kristo ken ti Dios. ⁶ Saanyo a palubosan iti uray maysa nga allilawennakayo babaen iti awan serserbina a sasao. Gapu kadagitoy a banbanag ket umay ti pungtot ti Dios kadagiti annak ti kinasukir. ⁷ Isu a saankayo a makipaset kadagitoy. ⁸ Ta naminsan a dakayo ket kinasipnget, ngem ita ket lawagkayon iti Apo. Isu a magnakayo a kas annak ti lawag. ⁹ Ta ti bunga ti lawag ket amin a kinaimbag, kinalinteg, ken kinapudno. ¹⁰ Ammoenyo ania iti makaay-ayo iti Apo. ¹¹ Saankayo a makipaset kadagiti saan a nabunga nga ar-aramid iti kinasipnget. Ngem ketdi, ibutaktakyo dagitoy. ¹² Ta dagiti banbanag a naaramid babaen kadakuada iti nalimed ket nakababain unay nga iladawan. ¹³ Amin a banbanag, no maiparangarangda babaen iti lawag, ket naibutaktak. ¹⁴ Ta ti tunggal banag a naiparangarang ket agbalin a lawag. Ngarud ibagbaga daytoy, "Agriingkayo, dakayo a matmaturog, ket agungarkayo manipud iti patay, ket agranniagto ni Kristo kadakayo." ¹⁵ Ngarud agannadkayo iti panagbiagyo, saan a kas kadagiti tattao a saan a nasirib ngem kas nasirib. ¹⁶ Subbotenyo iti tiempo gapu ta dagiti al-aldaw ket dakes. ¹⁷ Saankayo nga agbalin a maag. Ngem ketdi, awatenyo no ania ti pagayatan iti Dios. ¹⁸ Ken saankayo nga agbartek iti arak, ta mangiturong dayta iti pannakadadael. Ngem ketdi, mapnokayo koma iti Espiritu Santo. ¹⁹ Agsaritakayo iti tunggal maysa babaen kadagiti salmo ken kadagiti himno ken naespirituan a kankanta. Agkanta ken agdaydayawkayo babaen iti pusoyo iti Apo. ²⁰ Agyamankayo a kankanayon para kadagiti amin a banbanag iti nagan ni Apotayo a Jesu-Kristo iti Dios Ama. ²¹ Agpaituraykayo iti tumunggal maysa kas panagraem kenni Kristo. ²² Assawa a babbai, agpaituraykayo kadagiti assawayo a lallaki, a kas iti Apo. ²³ Ta ti asawa a lalaki ti ulo iti asawa a babai, a kas met ni Kristo nga ulo iti iglesia. Isuna iti mangisalakan iti bagi. ²⁴ Ngem kas iti iglesia ket iturayan ni Kristo, kasta met dagiti asawa a babbai kadagiti asawada a lallaki iti amin a banag. ²⁵ Asawa a lallaki, ayatenyo dagiti asawayo a babbai a kas inayat ni Kristo ti iglesia ken intedna ti bagina para kenkuana. ²⁶ Inaramidna daytoy tapno mapagbalinna isuna a nasantoan. Dinalusanna ti iglesia babaen iti panangugasna iti danum babaen ti sao. ²⁷ Inaramidna daytoy tapno maiparangna iti bagina ti maysa a nadayag nga iglesia, nga awan mantsana wenno kuretret wenno aniaman a kas kadagitoy a banag, ngem ketdi nasantoan ken awan biddutna. ²⁸ Iti isu met laeng a wagas, masapul nga ayaten dagiti asawa a lallaki dagiti bukodda nga asawa a babbai a kas bukodda a bagi. Ti siasinoman nga agay-ayat iti bukodna nga asawa a babai ket ay-ayatenna ti bagina. ²⁹ Awan ti siasinoman a manggura iti bukodna a bagi. Ngem ketdi, pakanenna ken aywananna daytoy, a kas panangpakan ken panangaywan ni Kristo ti iglesia. ³⁰ Ta kamkamengnatayo iti bagina. ³¹ "Para iti daytoy a rason a panawan ti lalaki ti ama ken inana ket maitipon iti asawana a babai, ket ti dua ket agbalin a maysa a bagi." ³² Daytoy ket dakkel a nailimed a kinapudno, ngem agsasaoak maipanggep kenni Kristo ken ti iglesia. ³³ Nupay kasta, masapul met nga ayaten ti tunggal maysa kadakayo ti bukodna nga asawa a babai a kas iti bagina, ken masapul a raemen ti asawa a babai ti asawana a lalaki.