¹ Gapu iti daytoy, siak, ni Pablo, ti balud ni Kristo Jesus para kadakayo a Hentil. ² Ipagarupko a nangngegyon ti trabaho iti parabur ti Dios nga intedna kaniak para kadakayo, ³ Agsursuratak segun iti paltiing a naipakaammo kaniak. Daytoy ti palimed a kinapudno nga insuratko iti ababa iti sabali a surat. ⁴ No basaenyo iti maipanggep iti daytoy, maawatanyonto ti kapanunotak iti daytoy a palimed a kinapudno maipapan kenni Kristo. ⁵ Iti sabali a henerasion, saan a naipakaammo daytoy a kinapudno kadagiti annak dagiti lallaki. Ngem ita, imparangarangen daytoy iti Espiritu kadagiti nailasin nga apostol ken profetana. ⁶ Daytoy a palimed a kinapudno ket dagiti Hentil ket kaduatayo nga agtawid ken kaduatayo a kamkameng iti bagi. Kakaduatayo ida nga agbibingay iti kari ni Kristo Jesus babaen iti ebanghelio. ⁷ Para iti daytoy a nagbalinak nga adipen babaen iti sagut iti parabur ti Dios a naited kaniak babaen iti panagtrabtrabaho ti pannakabalinna. ⁸ Inted ti Dios daytoy a sagut kaniak, uray no siak ti kabassitan kadagiti nailasin para iti Dios. Daytoy a sagut ket masapul nga ikasabak kadagiti Hentil ti ebanghelio ti awan patinggana a kinabaknang ni Kristo. ⁹ Masapul a lawlawagak dagiti amin a tattao maipapan iti palimed a panggep ti Dios. Daytoy ti panggep a naidulin iti nabayag a panawen iti naglabas babaen iti Dios, a nangparsua kadagiti amin a banbanag. ¹⁰ Napasamak daytoy tapno, babaen iti iglesia, dagiti mangiturturay ken addaan turay idiay nainlangitan a luglugar ket maamoanda ti adu a pannakaiparang ti kinasirib ti Dios. ¹¹ Mapasamakto daytoy segun iti agnanayon a panggep nga inleppasna kenni Kristo-Jesus nga Apotayo. ¹² Ta kenni Kristo, addaantayo iti tured ken dalan nga addaan ti talged gapu iti pammatitayo kenkuana. ¹³ Ngarud dawatek kadakayo a saankayo a maupay gapu kadagiti sagsagabaek para kadakayo. Dagitoy ti dayagyo. ¹⁴ Gapu iti daytoy agparintumengak iti Ama, ¹⁵ a babaen kenkuana a ti tunggal pamilia idiay langit ken iti daga ket nanaganan. ¹⁶ Ikararagko nga ipaayna kadakayo, segun iti kinabaknang ti dayagna, ti mapapigsa iti pannakabalin babaen iti Espirituna, nga adda kadakayo ¹⁷ Ikararagko nga agnaed koma ni Kristo iti puspusoyo babaen iti pammati. Ikararagko a maiparamutkayo ken maipadaga iti ayatna. ¹⁸ Addakayo koma iti ayatna tapno maawatanyo, a kakadua dagiti amin a namati, ti kalawa, ti kaatiddog, ti kangato, ken ti kauneg ti panagayat ni Kristo. ¹⁹ Ikararagko a maammoanyo koma ti kinaindaklan ti ayat ni Kristo, a lumabes iti pannakaammo. Aramidenyo koma daytoy tapno mapnokayo koma iti amin a pakabuklan iti Dios. ²⁰ Ita, kenkuana a makaaramid iti amin nga ad-adayo a nangatngato ngem kadagiti amin a dawaten wenno panunotentayo, segun iti pannakabalinna nga agtrabtrabaho kadatayo, ²¹ kukuana ti dayag iti iglesia ken kenni Kristo Jesus kadagiti amin a henerasion iti agnanayon ken awan patinggana. Amen.