¹ Limbah te Imam hamauh, "En bujur kute?" ² tuntang, Stefanus hamauh hindai, "Pahari samandiai tuntang bapa-bapa, hining auhkuh. Hattala pangkahai mamparahan arep ah akan tatu hiang itah, Abraham, katika ie masih tege hung Mesopotamia, sahelu bara ie melai hung Haran, ³ tuntang hamauh denga, 'tulak wei bara petak ayum tuntang bara, limbah te dumah wei akan petak je handak i parahankuh. ⁴ Haluli tinai, Abraham malihi petak uluh Kasdim tuntang melai hung Haran. Tuntang bara kanih limbah bapa malihi, Hattala manyuhu iye pindah ke petak jituh, leka ie melai wayah tuh. ⁵ Tapi Hattala dia manenga warisan akae, bahkan ije petak gin dia, tapi bajanji manenga jite akan Abraham sebagai ayue tuntang hurui ayue, aluh Abraham hindai tege anak ah. ⁶ Tapi, Hattala hamauh kutuh, ie te hurui limbah ayue bakal manjadi pandumah hung lewu je asing tuntang ie te ewen akan i budak tuntang i nyiksa katahi epat ratus nyelu. ⁷ 'Tapi, Aku handak manghukum bangsa-bangsa je mambudak ewen', kuan Hatalla, 'limbah te ewen handak balua bara kanih tuntang sumbayang akangkuh hung leka jetoh. ⁸ Haluli, Hattala manenga akan Abraham perjanjian sunat, maka Abraham manjadi Bapa Ishak tuntang manyunat ie metuh umur hanya andau, tuntang Ishak manjadi bapa Yakub, tuntang Yakub, kadue walas tatu hiang. ⁹ Awi bahiri dengan Yusuf, Apang tatu hiang itah manjual ie akan Mesir. Tapi, Hattala mampahayak Yusuf, ¹⁰ tuntang manyalamat ie bara kare kapehe, tuntang manenga ie anugerah tuntang katau hung taharep Firaun, Raja Mesir. Je manampa ie jadi raja hung Mesir tuntang kare istana ayue. ¹¹ Hung ije katika, kapehe dumah hung uras mesir tuntang Kanaan, tuntang manampa kapehe je hai tutu, tuntang tatu hiang itah dia ulih mandinu panginan. ¹² Tapi, metuh Yakub mahining tege gandum hung Mesir, ie manyuhu tatu hiang itah dumah akan kanih akan je sulak ah. ¹³ Hung kunjungan je kadue, Yusuf manampa arep ah i ngatawan awi kawan pahari, tuntang kaluarga Yusuf sahingga manjadi jalas akan Firaun. ¹⁴ Limbah te, Yusuf mangirim peteh tuntang marawei Yakub, Bapa te, tuntang kawan pahari je bajumlah 75 biti. ¹⁵ Maka, Yakub muhun ke Mesir tuntang ie matei hung kanih, ie tuntang tatu hiang itah. ¹⁶ Bara kanih, ewen i mindah akan Sikhem tuntang i penter hung kuburan je jadi mili Abraham mahapan kakare duit bara kawan anak Hemor hung Sikhem. ¹⁷ Tapi, metuh sasar tukep waktu pajanjian te, je jadi Hattala mandehe akan Abraham, bangsa jite batambah tuntang impaare hung Mesir, ¹⁸ sampai tege raja beken hingkat hung uras Mesir, je dia katawan tantang Yusuf. ¹⁹ Raja jite mampadaya bangsa itah tuntang mangapehe tatu hiang itah sahingga mamaksa ewen manganan kawan awao ewen sahingga ewen dia ulih batahan belum. ²⁰ Metuh katika te, Musa inakan tuntang ie bahalap tutu hung matan Hattala. Tuntang Musa i haga hung huma bapa katahi telu bulan. ²¹ Tuntang, katika ie jadi i nganan, bawin Firaun manduan tuntang mampahai ie kilau anak ayue kabuat. ²² Maka, Musa i ajar huang kare hikmat uluh Mesir, tuntang ie bakuasa huang pander tuntang taluh gawi. ²³ Tapi metuh musa genep baumur epat puluh nyelu, lembut hung atei ayue handak maja kawan pahari, ie te hurui bara Israel. ²⁴ tuntang, metuh nampayah ije bara ewen je i gawi dia adil awi uluh Mesir, Musa dumah mambela uluh je kana awi te tuntang mambaleh mampatei uluh mesir te. ²⁵ Musa mangira kawan pahari ayue dia mengarti Hattala te manenga ewen kasalamat mehalau Musa, tapi ewen dia mangarti. ²⁶ andau limbah te, Musa manangguh uluh israel je lagih bakalahi, tuntang Musa bausaha mandamai ewen, ie hamauh, 'Hei, dia kah ketun hapahari, buhen ketun je hakapehe?' ²⁷ Tapi, uluh je mangapehe pahari ayue te manyare Musa akan balikat sambil hamauh, 'Eweh je manampa ikau panguasa atawa hakim ikei? ²⁸ En ikau handak mampatei aku kilau ikau mampatei uluh Mesir te male?' ²⁹ Mahining auh uluh te, Musa mandari arep ah tuntang manjadi pandumah hung petak Midian. Hung kanih, ie manjadi bapa bara due uluh anak hatue. ³⁰ Limbah genep epat puluh nyelu, ije biti malaikat mamparahan arep ah akan Musa hung padang balantara gunung Sinai, huang jela apui hung pulau duhi. ³¹ Metuh Musa manampayah, ie heran dengan tampayah te. Tuntang, metuh ie manukep akan manantuani ie, dumah wei auh Hatalla, ³² 'Aku tuh Hattala tatu hiang ayum, Hattala Abraham, tuntang Hattala Yakub.' Musa hagenjeh mikeh tuntang dia bahanyi manantuani ie. ³³ Limbah te, Hattala hamauh denga, 'lapas bei sandal bara paim awi leka hung lekam mendeng ie te petak brasih. ³⁴ Aku bujur jadi manampayah kapehe ungkup ayungku je tege hung Mesir tuntang jadi mahining karahing ewen. Tuntang, Aku jadi muhun manyalamat ewen akan Mesir.' ³⁵ Musa, je jadi nolak ewen dengan hamauh, 'Eweh je manampa ikau jadi panguasa tuntang hakim ikei?' Musa ie te uluh je i utus awi Hattala baik manjadi panguasa atawa panyalamat, mahalau lengen malaikat je mamparahan arep ah hung pulau duhi. ³⁶ Uluh jituh je mamimpin ewen balua, tuntang manege mujizat tuntang gawi heran hung metek Mesir, tuntang hung Laut Merah, tuntang hung padang balantara katahi epat puluh andau. ³⁷ Musa jetoh tuh je hamauh dengan bangsa Israel, 'Hattala je mampisik akam ije biti nabi kilau aku bara kare kawan paharim.' ³⁸ Ie toh ie te uluh je tege hung bentuk ungkup hung padang balantara hayak malaikat je bapander akae hung gunung Sinai, tuntang hayak tatu hiang itah, tuntang ie jadi manarima firman je belum je i nenga akan itah. ³⁹ Tatu hiang itah manolak manumun Musa, tapi manyare tuntang handak haluli akan Mesir huang atei ewen, ⁴⁰ tuntang hamauh dengan harun, "nampa akan ikei dewa-dewa je mananjung hung baun ikei awi musa tuh, je mamimpin ikei balua bara petak Mesir, ikei dia katawa narai je jadi tajadi denga.' ⁴¹ Hung katika te, ewen manampa ije patung anak lembu, tuntang manenga parsembahan akan barhala jite, tuntang manyorak-nyorai tuntang taluh gawin lengen ewen. ⁴² Tapi, Hattala bapaling bara ewen tuntang mambiar ewen manyambah tantara langit, sama kilau je i nulis huang kitab para nabi, 'En ikau mimbit akangku metu je i nyambalih tuntang parsembahan katahi epat puluh andau hung padang belantara, hei ungkup Israel? ⁴³ Ikau mimbit puduk Molokh tuntang dewa ayum, Refan, patung je nampam hapa manyembah ie, tuntang aku manganan ikau akan tandipah Babel.' Am. 5:25-27 ⁴⁴ Tatu hiang itah tege puduk kasaksian hung padang balantara, kilau je Hattala marentah metuh bapander dengan Musa, akan manampa sasuai dengan taluh gambar je jadi ie payah ah. ⁴⁵ Limbah manarima puduk te, tatu hiang itah mimbit ie tame hayak Yosua, metuh nangkian petak ewen bara kawan bangsa beken, je jadi nyare Hattala hung taharep tatu hiang itah, sampai hung wayah Daud. ⁴⁶ Daud mandinu asi katuah hung taharep Hattala tuntang balaku handak mandinu leka melai akan Hattala Yakub. ⁴⁷ Tapi, Salomo je manampa huma akan ie. ⁴⁸ Tapi, je Pangka Gantung dia melai hung huma je i nampa awi lengen kalunen, kilau ji i mander awi nabi, ⁴⁹ 'Langit ie te takhta ayungku tuntang bumi ie te leka pai ku mendeng. Huma je narai je handak aku mempendeng akam?' Hattala bafirman, 'Atawa, narai leka aku baistirahat? ⁵⁰ Dia lah lenge ku je manampa uras ah jetoh?' Yesaya 66:1-2 ⁵¹ Hei, ikau uluh je batekang atei ah, dengan atei tuntang pinding je dia basunat, ikau tarus malawan Roh brasih, kilau je i gawi tatu hiang ayum! ⁵² Kare kawan nabi je kueh je dia i nyiksa awi tatu hiang ayum? Tuntang, ewen mampatei kawan uluh je sahelu te jadi mambarita dumah ah Ije Kabujur, je jadi manjadi arep ah kabuat sabagai pangkhiatan tuntang pampatei. ⁵³ Ikau, je jadi manarima Hukum Taurat kilau je jadi i nyampai awi kare malaikat, tapi ikau dia manjaga je te!". (Stefanus I patei) ⁵⁴ Metuh ewen mahining taluh je toh, atei ewen atei ewen tatusuk tuntang kasinga mangarit. ⁵⁵ Tapi, Stefanus jadi i nguntep awi Roh Brasih manampayah ka langit tuntang manampayah kahai Hattala, tuntang Yesus mendeng hung silan gantau Hattala. ⁵⁶ Stefanus hamauh, "Hining! Aku manampayah langit tabuka tuntang Anak Kalunen mendeng hung silan gantau Hattala." ⁵⁷ Tapi, ewen manangkariak mahapan suara je nyaring, tuntang manutup pinding ewen, tuntang sapakat manyarang Stefanus. ⁵⁸ Limbah te, ewen maihir stefanus ka luar bara kota tuntang manampara mamedak ie mahapan batu. Limbah te, kawan saksi mata tuh malapas jubah ewen hung pain ije biti tabela je bagare ara Saulus. ⁵⁹ Tuntang, ewen tarus marajam Stefanus je lagih hamauh, "Tuhan Yesus, narima roh ayungku." ⁶⁰ Limbah te, limbah mandeko utut, ie hapa suara je nyaring, "Hattala, ela membeban dosa jetoh akan ewen!" Tuntang, limbah jadi ie hamauh te, ie malihi.