¹ Poonkapo Yehoba wa ambile kwi Mosesa, amba, ² "Pa juuba jitaanshi ja ng'oondo mutaanshi mu mwaaka mupya wafwaainwa kwiimika kya kwiikalamo, teente wa lusaambakeno. ³ Wafwainwa kubiikapo jikwaachi ja lushimuno lwa lulayaang'ano, kabiji wakoonsha kuzhikako na kipeembe. ⁴ Wafwainwa kuleeta teebulu mukachi ne kubiikamo byoonse byafwainwapo. Kabiji wafwainwa kuleeta kituulwapo ma laampi ne kubiikapo ma laampi. ⁵ Ukakoonshe kutuula kyeela kya golide pa kyakusookelapo binuunka buloongo kya lushimuno, kabuji ukakoonshe kubiika kipeembe pa kibelo kya teente wa lusaambakeno. ⁶ Ukakoonshe kutuula kya kusookelapo bitapisho paluutwe ya kibeelo kya teente, teente wa lusaambakeno. ⁷ Ukakoonshe kutuula mvukuto ikataampe pakachi ka teente wa lusaambakeno ne kyakusookelapo bitapisho kabiji wafwainwa ne kubiikamo meema. ⁸ Ukakoonshe kuzhookoloshako lupaango, kabiji wafwainwa kukobekapo kipeembe pa kibelo kya lupaango. ⁹ ukashikule maanyi a kushiinga ne kushiinga mwakusaambakena kabiji ne byoonse bijimo. Ukakoonshe kwiibyabanya ne kwi biwaamisha byoonse kwi amiiwa, kabiji bikeekala byazhila. ¹⁰ Ukakoonshe kushiinga manyi pa kyakusookelapo bitapisho ne byoonse biikalako. Kabiji wafwainwa kwaabanya kyakusookelapo kwi amiiwa kabiji bikeekala byazhila biingi kwi amiiwa. ¹¹ Ukakoonshe kushiinga maanyi ku mvukuto ne kukitako kyaayo ne kwi izhijika kwi amiiwa. ¹² Ukaleete Alona ne baana baanji ba balume pa kibelo kya teente wa lusaambakeno ne kwiboovwa boonse na meema. ¹³ Ukakoonshe kuvwiika Alona bivwaalo bya zhila kwi amiiwa, ne ku mushiinga maanyi kabiji ne ku muzhijika pakuuba amba akeengile noobe ng'aanga waami. ¹⁴ Nekuleeta baana baanji ba balume ne kwi bavwiika bivwaalo byaleepa. ¹⁵ Ne kwi bashiinga maanyi boonse byonkabyo ukashiinga shaabo pakuuba amba ba keengile noobe ba ng'aanga kwi amiiwa. Kushiingwa kwaabo kukaleenga boonse kufikatu ne kubisemi byaabo byaakulutwe." ¹⁶ Abino byo byaubile Mosesa; waloondejile byoonse Yehoba byo a mukaambizhe. Aye wibyuubile abino biintu byoonse. ¹⁷ Kusaambakana be kubiikile pa juuba jitaanshi ja ng'oondo mutaanshi wa mu mwaaka wa bubiji. ¹⁸ Mosesa waneengezhezhe mwa kusaambakena, wa neengezhe bitako byakyo, ne kuneengezha ma fulemu akya, ne kukwachisha byeela byakyo, ne kwiimika mashiiki ne biyuukilo byakyo. ¹⁹ Aye wa ajile kyakuvweetapo peulu ya mwakusaambakena ne kubiikapo teente peulu yakyo, byonka bya kaambizhe Yehoba. ²⁰ Kabiji aye washikwiile ne malamuna a lulayaang'ano ne kwi abiika mu jikwaachi. Kabiji aye wabiikileko ne myaamba ku jikwaachi ne kubiikapo kizhiko kya kufuuchilako. ²¹ Aye waleetele jikwaachi mwakusaambakena. Wa neengezhezhe kipeembe kya kuvweeta jikwaachi ja lushimuno, byonka byo ba mukaambizhe kwi Yehoba. ²² Aye watuujile tebulu mu teente wa lusaambakeno, ku kabeeta ka kubuyeke, paangye ya kipeembe. ²³ Koko a biikile shiinkwa mukuuba amba tebulu uji ku meeso a Yehoba, byonka byo a kaambizhe Yehoba. ²⁴ Aye watuujile kya kubiikapo laampi mu teente wa lusaambakeno, paleepa na tebulu, ku lubaji lwa kabeta ka buleenge bwa kya kwiikalamo. ²⁵ Aye wa abwiile laampi ku meeso a Yehoba, byonka byo a mukaambizhe Yehoba. ²⁶ Aye wabiikile kyeela golide kya kyakusookelapo bitapisho binuunka buloongo mu teente wa lusaambakeno kuluutwe ya kipeembe. ²⁷ Wasookejilepo binuunka buloongo, byonka byo a mukaambizhe Yehoba. ²⁸ Wakobekele kipeembe pa kibelo kya mwakwiikala. ²⁹ Wa tuujile kya kusookelapo bitapisho kya kulaambwilapo pa kibelo kya mwa kwiikala, mu teente wa lusaambakeno. Walaambwijilepo milaambo ya kufutumuna ne milaambo ya kajo, byonka byo a mukaambizhe Yehoba. ³⁰ Wa biikile mvukuto pakaachi ka teente wa lusaambakeno ne kya kusookelapo bitapisho, kabiji ne kubiikamo meema a koowako. ³¹ Mosesa, Alona, ne baana baanji ba balume ba ovwelenga mabooko abo ne maulu abo mu mvukuto kimye myoonse kyo bayaanga mu teente wa lusaambakeno kabiji ne ³² kimye kyoonse kyo bayaanga ku kyakusoonkelapo bitapisho. Beovwelenga abo beene, byonka Yehoba byo a mukaambizhe Mosesa. ³³ Mosesa wazhookolweshe lupaango mwa kwiikala ne kya kusookelapo bitapisho. Wabiikile kipeembe pakibelo kya lupaango. Mu jino jishiinda, Mosesa wa pwiishishi miingilo. ³⁴ Poonkapo jikuumbi javweetele teente wa lusaambakeno, kabiji ne lukuumo lwa Yehoba lwa kuumbene moonse mwakwiikala. ³⁵ Mosesa keechi wakoonsheshe kutweela mu teente wa lusaambakeno ne maamba jikuumbi jaikajipo, kabiji maambo lukuumo lwa Yehoba lwa kuumbene mwakwiikala moonse. ³⁶ Kimye kyoonse kyashikulwanga jikuumbi kufuma peulu ya mwakwiikala, baantu beena Isalela bakoonsheshenga kuneenga lweendo lwaabo. ³⁷ Mino inge jikuumbi jabula kwiimanapo peulu ya mwakwiikala, keepo baantu bakoonsheshenga kubula kweenda. Bakoonsheshenga kwiikala poso juuba jo jikasuuntulwa peulu. ³⁸ Pakuuba jikuumbi ja Yehoba ja jiinga peulu ya mwakwiikala na mute, kabiji ne mujilo waanji wajiinga poonka bufuku, ja mweekelenga patooka ku baantu boonse beena Isalela pa lweendo lwaabo loonse.