¹ Kuli civi eci ndamola vemehi liekumbi, kuenda ca lema nene komanu. ² Suku eca uhuasi, ovipako, kuenda esumbilo ko manu oco akuti lacimue akambela cina ayongola eye muele haimo, Suku kowihile epuluvi liokulitekula lavio. Hambi, cingendelei olitekula lavio. Eci cango kuenda ohali yalua. ³ Nda ulume ocita omola kuenje okala onyamo alua, oco akuti oloneke vialima ahe alua, puai nda utima wahe kausanjukila leci ciwa kuenje kakendiwa, yapa mopia siti onganga ina yacitiwa yafa ya velapo eye osule. ⁴ Onganga yaco yacitiwa haikuete elomboloko kuenje yipita vo welema. ⁵ Ndango omola u kamuiele ekumbi ale kakulihile cimue, haimo wasanga epuyuko ndango ulume una kakuete. ⁶ Ndango omunu okala lomuenyo wolohulukai vivali vianyamo puai kali longisa okulitekula ovina viwa, enda kocitumalo cimuamue ndeci vakuavo vose. ⁷ Ekavoliosi lio munu lio mela yahe, puai ongei yahe kaitelisua. ⁸ Ocili uwa wange ukualondunge alinga ke veke. Uwa wanye osuke ikuete ndango yakuliha okulinga kovaso yava kuavo omanu? ⁹ Eci cimola ovaso cavelapo vali okupitahala eci cikamoleha cilelembia. Ecivo cango - casoka ndo kukuatela ofela. ¹⁰ Cosi cikasi ale vacavela ale onduko yaco, kuenje ndeci catuwa omunu cikasi kambi cakulihiwa ale oco kacisilivila omunu okutamalala lu wavelapo okupama okupitahala ndeci eye akasi. ¹¹ Okulua kuolondaka, haico okuiya kuolondaka viango. Eci uwa wanye cikuete ko munu? ¹² Omo u wakuliha eci ciwa co munu vo muenyo, votembo itito kuenda voloneke viango opitango kambi ocilelembia? Elie osapuila omanu eci cimoleha vemi liekumbi cina akuti eye wanda?