¹ Awano kali maliji a mwanangana Lemwele - longeso amulongesele kuli naye. ² Kuchi, mwanami? Chuma chika, mwana wa jimo lyami ? Yika unafupu, mwana wa shingo? ³ Kanda uhana tachi je kuli mapwo, chipwe majila je kuli chize chakwonona myanangana. ⁴ Kuchapwile chuma cha myanangana, Lemwele, kuchi apwile myanangana kunwa vinyu, chipwe alemu kwivwa pwila lya walwa usasu, ⁵ mumu muze manwa mavulama shimbi, akahengese upatwilo wa umwe mukwa kuyindama. ⁶ Hana kunwa chisasu kuli waze anambe kufwa nyi yinyu kuli waze ali mu luyinda. ⁷ Akanwe hanga akavulami uswale wenyi hanga kanda akewuluka nawa hunya lyenyi. ⁸ Hanjikilako waze kahashile kuhanjika, hamulonga wa aze eswe ali mu luyinda. ⁹ Ahakwile pwako ngaji mukwa ululi funga yiswale nyi akwa kuhona. ¹⁰ Iya mahasa kuwana pwo wa umwenemwene ? kulema chenyi chahyana mawe a ndando yinji. ¹¹ Mbunge ya mukwo lunga muyi mufulyela, kechi kapwa chiswale nawa. ¹² Kakumulingila yuma yipema hi yipi ko matangwa eswe a mwono wenyi. ¹³ Kakufupafupa wona wapanga nyi linyu kakulinga milimo ya moko jenyi nyi chiseke. ¹⁴ Kapwa ngwe chize akulinga mato ja akwa kulanjisa; kakuneha kulya chenyi kufuma kusuku. ¹⁵ Kakulimeneka shimbu kuchili ufuku kakuhana kulya kuli akwa zuwo lyenyi, kakutetela milimo tuvumbi twenyi ama pwo yize anatela kulinga. ¹⁶ Kakwendesa munda mba maulanda; nyi tachi ja moko jenyi kakulima minda ya vinyu. ¹⁷ Kali mukwa tachi kakuhondangana milimo kakutakamisa moko jenyi. ¹⁸ Kananyingika kanawa yikumba yalumbunuka ha ndando; ndeya yenyi kuyishi kujima. ¹⁹ Makwata moko jenyi ku uhoselo, masa moko jenyi ha na nyingika wanda. ²⁰ Kakuzoza moko jenyi kuli yiswale; kakuzoza moko jenyi kuli akwa kuhuno. ²¹ Keshi kuvwila woma neve hali akwa zuwo lyenyi, mumu akwa zuwo lyenyi eswe kakuzala mahina a chishika. ²² Kakulitungila mahina alemu akuli fuka, kaku zala mahina apema a ufungo. ²³ Lunga lyenyi hana muse chinyingi ha yikolo ya ku jilila, muze matwama hakachi ka makulwana a chifuchi. ²⁴ Kakutunga mazalo apema nyi kwalanjisa kuli akwa kulanda, nyi kutwala miya kuli akwa kulanda. ²⁵ Kakulijika nyi tachi nyi ulemu, kapwa wakusehelela ha yuma yize muyiza kulutwe. ²⁶ Kakuhanjika nyi mana nyi shimbi ja longeso jili ha limi lyenyi. ²⁷ Kakutala kanawa ku ndako ja akwa zuwo lyenyi keshi kulya kulya cha uleya. ²⁸ Ana jenyi kakukatuka nyi kumuvuluka ngwo kawaha, nyi lunga lyenyi kakumuhalisa,ngwenyi, ²⁹ "Mapwo anji kakulinga yipema, alyoze yena hiunahyana eswe." ³⁰ Vumbi kulya kulyonga, nyi upeme waku meso wa moko moko, alyoze pwo yoze wakwivwila woma Yehova mamuhalisa. ³¹ Hana kuli iye mihuko ya moko jenyi yitanga yenyi mwene yika muhalise muyikolo ya limbo.