¹ Ngwe neve mu shimbu ya nonga chipwe vula mu shimbu ya kucha, chocho ulemu watelele chihepuke. ² Chize tujila akuphyekumuka nyi tupyasa muze mahumuka, chocho shingo lize kulishi kutela kulishi kupwila. ³ Shikote yapwa ya kavwalu, nyi lwoji lwapwa lwa chimbulu nyi mbwechi hanyima ya yihepuke. ⁴ Kanda ukumbulula chihepuke nyi kulita nyi uhepuke wenyi, kuchina mulifwa nenyi. ⁵ Kumbulula chihepuke nyi uhepuke wenyi, kuchina alimone ngwe mukwa mana. ⁶ Mweswawo matuma liji ku kwoko lya chihepuke ka kulichiza ilyato yenyi nyi kunwa vunda. ⁷ Ngwe molu a mukwa kalepa waze a kuzezala hashi kapwa chishima mukanwa ka yihepuke. ⁸ Ngwe kukasa liwe mu chuma chize akwasa nacho hi chapwa kuhana kalemesa kuli chihepuke. ⁹ Ngwe mungonga yoze wakutuwa mu kwoko lya mukwa kuzengewa hi chapwa chishima mu kanwa ka chihepuke. ¹⁰ Ngwe mukwa kwasa mivu yoze wakulemeka eswe waze anamujingilika chocho chihepuke chipwe mahana mulimo yoze mweswe wakupalika. ¹¹ 'Ngwe chizechene kawa kakuhilukila ku yisaza yenyi, chocho apwa chihepuke yoze wakuhilwisa uhepuke wenyi. ¹² Unamono umwe yoze unalimono ngwe wa mana nyi? Chihepuke mahasa kutalatala kuhyana iye. ¹³ Chilenda ka kwamba ngwo, " Ndumba kwali mujila! Ndumba kali hakachi ya tapalo." ¹⁴ Ngwe chizechene pito ya kwalumuka ha ndevaliso yacho, chocho chilenda akwalumwoka ha muhela. ¹⁵ Chilenda ka kusa kwoko lyenyi mu longa hindu keshi nyi tachi ja kuzundula longa helu ku kanwa lyenyi. ¹⁶ Chilenda mu meso jenyi kapwa wa mana kuhyana malunga shimbyali waze akukumbulula nyi upatwilo upema. ¹⁷ Ngwe umwe yoze wa kukwata matwi ja kawa iye mukwa kupalika yoze wa kwivwa kupihilila ha ndombo yize hi nyiyenyi ko. ¹⁸ Ngwe chizaluke yoze wa kukonga kahya, mivu, nyi kufwa ¹⁹ mwe umwe wa kwonga mwenyembo wenyi nyi kwamba ngwo, " Ngunahehe nyi ?" ²⁰ Nyi kunyi kujishiko, kahya mukajima; nyi ku kushi mukwa kuhanjika hali akwo, nyi milonga yakuhwa. ²¹ Chizechene manungu ha makala nyi kunyi ha kahya, chocho chapwa nyi mutu wakulitacheka ka kuvundula ndombo. ²² Maliji ja juhanjika hali mukwenu kapwa ngwe ka lupapa kayema; ka kunjila hashi mukachi ka yihela ya mujimba. ²³ Ngwe sapa ya uma yakulamika nyi yinganga yapalata, chocho yapwa mivumbo yili nyi kahya nyi mbunge ya ungulungulu. ²⁴ Mukwa kole kakwonga nyi mivumbo yenyi nawa kakutulika kwonga muchima lyenyi. ²⁵ Iye mahanjika nyi khekhe, alyoze kanda umufulyela,mumu kwatwama yizelwokeso shimbyali mu mbunge yenyi. ²⁶ Chipwe kole yenyi yalifuka nyi kwonga, ungulungulu wenyi kuma kausolola ha meso ja chikungulwila. ²⁷ Mweswawo mafula wina kuma kalimbukilamo nyi yoze malangumuna liwe mulikamuhilukila. ²⁸ Limi lya mahuza lishi kuzanga waze hilyalemeka nyi kanwa lya kuphyephyeka lya kuneha kwonwona.