¹ Chipema chiswale yoze wakwenda nyi kutuwika cha mbunge kuhyana chihepuke yoze wapiha ku mi vumbo yenyi. ² Chikwo nawa, hichipemako kupwa nyi mbunge ya kuhona chinyingi nyi yoze mazomboka mapyanguka. ³ Kuseuka cha mutu chakuhengesa ndako jenyi nyi mbunge yenyi kuya kulimika nyi Yehova. ⁴ Upite kuwakwokesa masepa, alyoze chiswale kakuhandununa kuli masepa jenyi. ⁵ Chela wa mahuza kechi kahona kumumwesa lamba mukwa kuhanjika mahuza kechi kamupulula. ⁶ Anji mafupa vumbi lya chihanyi nyi eswe kakuzanga kupwa masepa ja waze akuhana yawana. ⁷ Eswe mandumbu jenyi auno chiswale kamuzangile; mba kuchi muchipwa kuli masepa jenyi waze ali kusuku nenyi ! Maliji kakwakaula alyoze hanayi. ⁸ Mutu mweswe wakutambula mana kazanga mwono wenyi, nyi yoze watwama nyi chinyingi makawana kuyuka. ⁹ Chela wamakuli makamumwesa lamba, alyoze yoze mahanjika mahuza makanonga. ¹⁰ Kuchatetele chihepuke kutwama nyi upite upema chipwe ndungo akayule atu alemu. ¹¹ Maselyekela kakupwisa mutu mukoke kutenuka chapwa uhenya kuli kuzomboka utanguko. ¹² Ufwatulo wa mwanangana wapwa ngwe kuhiohia cha mwana ndumba, alyoze vumbi lyenyi lyapwa ngwe mume ha mwambu. ¹³ Mwana chihepuke kapwa lwenyeka kuli tato nyi kuli tachika cha pwo chapwa ngwe kusotwoka cha neya ndwe- ndwe. ¹⁴ Mazuwo nyi upite kakuiswana kuli yisemi, alyoze pwo wamana kakufuma kuli Yehova. ¹⁵ Ulenda wakumbila mutu mutulo twakufwa, alyoze yoze keshi kuzanga kuzata mevwa zala. ¹⁶ Mutu yoze mafunga shimbi mapwa nyi mwono, malyoze waze akulelesa makafwa. ¹⁷ Mweswawo watwama nyi kheke kuli yiswale kakuhana kuli Yehova neye kumaka mukundwilila yeswe yize alingile. ¹⁸ Fumba mwane shimbu kutalatala kuchili alyoze kanda usa mbunge ye ha ku mushiha. ¹⁹ Mutu watwama nyi ufwatulo unji katela kumbata mulonga wenyi ; mumu nyi wa mupululoa, chakutamba kulinga nawa kamuchali. ²⁰ Panjika ku yiyulo nyi kutambula kukanjisa, hanga ukapwe nyi mana kusongo lya mwono we. ²¹ Kululika chinji chili mu mbunge ya mutu, alyoze yiyulo ya yehova yenayo muyi kamana. ²² Kuzeyelela chenacho mutu azanga nyi mutu chiswale kapema kuhyana mukwa mahuza. ²³ Ulemu wa Yehova wakutwala atu ku mwono; yoze ulinawo matwama nyi kuyuka kechi kumona kupinda. ²⁴ Chilenda masa kwoko lyenyi ha longa; alyoze keshi kuzanga kulitwala ku kanwa lyenyi. ²⁵ Lamba mukwa kulenya, nyi yoze watwama nyi mutu watwama nyi mana a wanuke apwe nyi mana; kanjisa mukwa malinjekela mba mapwa nyi yinyingi. ²⁶ Yoze wakwiyila tato hanji mahuma naye kapwa mwana wakuneha sonyi nyi kuneha sau. ²⁷ Nyi walitwamina kupanjika kukukanjisa, mwanami, mukapyanguka kufuma ku maliji a chinyingi. ²⁸ Chela chitanganyanyi kakulenya upatwilo nyi kanwa lya chingulungulu kulya kumina uhenge. ²⁹ Upatwilo hana ululika wa akwa kulenya nyi mijiji ya kulamba manyima a yihepuke.