¹ Mweswe mazanga amufumbe kakuzanga yinyingi, alyoze yoze keshi kuzanga kumukanjisa kapwa chihepuke. ² Yehova kakuhana vumbi kuli lunga mupema, alyoze mukwa kutaka yipi mamuhisa. ³ Mutu keshi kukola ku ungulungulu: alyoze chikota cha mukwa ululi kuchichi katukuka. ⁴ Pwo wakushishika kapwa ngwe chipangula kuli mukwo - lunga; alyoze yoze maneha sonyi kapwa ngwe kupola mu yifwaha ya mukwo- lunga. ⁵ Manyonga a akwa ululi kakululama, alyoze yiyulo ya yingulungulu kuyakwonga. ⁶ Maliji a yingulungulu katwala kukujikinyina kumwanga manyinga, alyoze kuhanjika cha akwa ululi muchikapulula. ⁷ Yingulungulu manuguna hikeshiko, alyoze zuwo lya mukwa ululi mulikola. ⁸ Lunga maka muchichimyeka nyikulita nyi mana jenyi, alyoze mbunge ya kupihya makayilelesa. ⁹ Kanawaha yoze kanamulelesa alyoze kali nyi ngamba kuhyana yoze kakulilemesa hindu yakulya keshi nayo. ¹⁰ Mutu mukwa ululi kakunyonga mwono wa chimuna chenyi, alyoze khekhe yayingulungulu yapwa uswi. ¹¹ Yoze nalima minda yenyi makapwa nyi yakulya yinji, yoze makaula yuma yamokomoko keshi mbunge. ¹² Chingulungulu kakuzanga kambwila wa atu api, alyoze chikota cha mukwa ululi chakwima. ¹³ Mutu mupi kakumukasa mu kambwila lya utanguko wa mivumbo yenyi, alyoze mukwa ululi makatuhuka mu lamba lyenyi. ¹⁴ Kumihuko ya maliji jenyi mutu maka yuka nyi yuma yipema, ngwe chize ku milimo ya moko jenyi makakundula. ¹⁵ Jila ya chihepuke kuyapwa mu meso jenyi mwene, alyoze mukwa yinyingi kakupanjika ku yiyulo. ¹⁶ Chihepuke kausolola ufwatulo wenyi washiwashi, alyoze chikanyame kakusweka tuka. ¹⁷ Yoze mahanjika umwenemwene masolola ululi, alyoze chela cha mahuza, masolola kwonga. ¹⁸ Maliji amukwa kuhanjika kalusulusu yapwa ngwe kutuwa chakatana ; alyoze limi lya mukwa mana kulyakuwuka. ¹⁹ Kanwa lyakuhanjika umwenemwene kumakalikolesa lya mutolo. Alyoze limi lya mahuza lyapwa lya kashimbu wika. ²⁰ Mwatwama kwonga mu mbunge ja waze akutaka yuma yipi; alyoze akwa kuyula nyi sambukila kali nyi uwahililo. ²¹ Chuma chipi kuchichi kupwa kuli mukwa ululi; alyoze yingulungulu kumakazala nyi yipi. ²² Kanwa lya mahuza kulyapwa chizelwokeso kuli Yehova, alyoze akwa kulinga umwenemwene kapwa akuwahilila kuli iye. ²³ Chikanyame kakusweka yinyingi, alyoze mbunge ya yihepuke yakwambujola uhepuke. ²⁴ Kwoko lya chipakata kumulikayula, alyoze chileya mamusa ku wungamba. ²⁵ Kulema mu mbunge ya mutu kuchakumuhongesa, alyoze liji lipema kulyakumuwahisa. ²⁶ Mukwa ululi kakupwa kasongo kuli mukwo, alyoze ndako ja chingulungulu kujakumuhengesa. ²⁷ Chilenda keshi kwocha yifwo yize ashihanga mu maya, alyoze chipalakata mazuka yikumba yipema. ²⁸ Waze akwenda mu ndango ja ululi kakupwa nyi mwono nyi mu majla jajo kumushi kufwa.