¹ Mukunda konso fumu wa fumu wa ma nganga nzambi wa phoneye mu katshi dia athu enji, wa hageye ha gu zwela mu jina diawo gu ndaga jidi mu talela Nzambi, mukunda a hane mu mbala imoshi makapho nu mulambu wa nu haneya ha gu katula masumu. ² Wa jiya gu khala muthu wa konda gima gwa wanyi a jiya go gima nu gwa wanyi a tota, ole mwene gu ndaga idi mu talela gu konda ngolo. ³ Nganyi, mwene nji u feto hana mulambu wa masumu enji, mu phila a nu kita mukunda nu masumu a athu akima. ⁴ Gushi nu muthu wa jiya gu zula lukumu lwene mukunda nu mwene ha khenji go, uvi udi wa tamegeya gwa Nzambi, mu phila Aron a tamegeye. ⁵ Phila imoshi, Kilistu gwa di hwile lukumu go ha gudi monesa Fumu wa mafumu a ma nganga Nzambi. Uvi Nzambi wa mu lezele egi: " Udi wa Munami, magino nga kituga nga shaye." ⁶ Phila imoshi wa zwelele nji hama hako egi: " Eye wa Fumu wa mafumu mvula nu mvula mu nswa ya Melkisedeki." ⁷ Mu ilumbu ya phashi mu gi muthu, Kilistu wa yandigile gu lomba mu njila ya isambu, nu gu lomba nu gu dila, nu gu haga makelele gwa Nzambi, yonu udi nu nswa ya gu tu gulusa gu lufwa. Mukunda nu gi santu gienji gwa nzambi, ndaga jenji jia tshiginiye. ⁸ Ata wa khalele mona, wa longugile ha gu hana lujitu mu ilumbu ya phashi jenji. ⁹ Mukunda nu nganyi, wa kitugile muthu wa bonga, enji muthu yonu wa gulusa athu mvula nu mvula wanyi a feto gu mu lemvugila. ¹⁰ Wa phoneye gwa Nzambi ha gu khala Fumu wa mafumu a nganga nzambi mu nswa ya Melkisedeki. ¹¹ Tu di nu ndaga jia vula jia gu zwela mukunda nu Kilistu, uvi idi phashi ha gu tendula mukunda mwa mbo bagisa go. ¹² Hene mu tangwa didi enwe mwa feto khala mwa ma longi, mu di nji nu funu egi muthu muko eze a mi longe ndaga idi mu talela sango ya Nzambi. Mu di nu funu ya gu hwiya meya a gu nwa a bonga nu ima ya gudia idi mu hana ngolo! ¹³ Mukunda muthu mukima gwa nwile go meya ene a bonga, gwa shi mu bagisa go ndaga ya sango ya kielega mukunda udi ti nu lulu ngagi ole mona mutumba wa butuga ilumbu yiyi. ¹⁴ Uvi idi kaka mambuta a lunga ha gudia madia a nu hana ngolo mukunda a yigamele tangwa dikima ha gu swasugisa ndaga jia bonga nu jia bola