¹ Kude yeru, naan erang kaulun upu bangaran Ananias, baya andi daranganni, Safira , ngari harta wat here. ² Andri, baya pangarasaen matueh waweini, Ananias nahan mehe teka hasil arian ma tengani raerai, andri ekat ngendei sa sebagian, balalu ngandak ni hang hadapan pee kawan rasul. ³ Tapi, Petrus maharek:" Ananias, daya inun Iblis nampenu ateinu hampe hanyu ipusu ma Ruh Barasis andri nahan mehe hasil ngari tane yiru? ⁴ Hantek masih huan na ari, puangkah tane ru magun watnu? andri, udi ngarini, puangkah tane yeru naan hang imme kuasanu? Dagana inun hanyu mamikir ulahan yiti hang wuang ateinu? Hanyu puang ipusu ma murunsia, kude ma Alatalla." ⁵ Balalu, hantek karengei pander yeru, Ananias tumbang palus mitus hewuk. Maka, timbul katakuten hante ma katuluh ulun sa karengei pakara yeru. ⁶ Papire ulun muda hawi, namu kain kafan andri ngutung ni ma luar, lalu masarni. ⁷ Udi yeru, kurang labis telu jam, darangan Ananias hawi, kude hanye pakarasa inun sa haut bakajadian. ⁸ Balalu Petrus maharek ma hanye," Wara ma aku, inunkah hanyu ngari tane ru andi haraga sahante yiti?" Safira nyangai, "hiai, sahante yeru." ⁹ Udi yeru Petrus bapander ma hanye," daya inun hanyu andri darangann ba mupakat nyansuba Ruh Tuhan? Tantau, kia pee ulun sa haut masar darangannu masih naan hang muka awanawang andri here pada sagar ngusung hanyu ma luar." ¹⁰ Salenga , Safira tumbang hang hadapan pee Petrus balalu mitus hewuk. Hantek kawan ulun muda masuk, here ngindi Safira haut matei, balalu here ngusungni ma luar balalu masar tuhi daranganni. ¹¹ Maka, naan katakuten hante hang penah ungkup andri kawan ulun sa karengei pakara yiti. ¹² Hene tanda ajaib andri mujijat sa timbul hang penah ulun rama mitah tangan kawan rasul andri here katuluh andri mapakat muneng hang lewu Suleman. ¹³ Mahi teka sa lainni heei mindri bagabung baya here, kude ulun kajut nawat here. ¹⁴ Ndri, naan batambah hene jmlah uun parisaya, hang wuang Tuhan, kawan upuan atawa waweian. ¹⁵ Dagana yeru, here ngendei ulun mekum ma lalan naangkadig amau tandu andri tilam himpan hantek Petrus hawi, paling puang ama ni tau wuah papire teka here. ¹⁶ Pada, naan rama ulun teka papire tumpuk riet Yerusalem sindrah hawi, ngendei ulun mekum andri sa na rasuk kawan ruh murun. Here katuluhni na samare. ¹⁷ Kude, kawan imam baya kawan ulun sa haut umba here, hanye yeru ulun Saduki, andri here haut penu andri kabahirien. ¹⁸ Here nyamma kawan rasul andri nampasukni ma wuang panjara. ¹⁹ Kude yeru, hang kamalem andrau, erang aun malekat Tuhan nguka kawan awanawang panjara, nginsing here kaluar, andri kaeau, ²⁰ "Hulu, indri, andri hampe kabar ma kawan ulun hang Lewu Alatalla katuluh firman sual pamelum yena." ²¹ Andri, udi here karengeini, niba nuku kaayat , here masuk ma wuang Lewu Alatalla andri nuku ngajar. Hantek Imam Besar andri kawan ulun sa sindrah hanye hampe, here ngumpul kawan Sanhedrin andri katuluh majelis kawan tueh Israel, balalu nunyu ulun ngendei kawan rasul yeru nadap here. ²² Kude,hantek kawan ulun huyuan ru hampe, here puang panalu karueh rasul ru hang panjara. Udi yeru here mulek andri iwara, ²³ nelang kaeau," Kami panalu panjara ru pakunsi nelang katuluh pangamanan andri kawan panjaga mindri hang hadapan awanawang, kude hantek kami ngukani, kami mahi panalu erang kaulunpun hang wuang ni." ²⁴ Andri,hantek kapala panjaga Lewu Alatalla andri imam kapala karengei papanderan yeru, here tuu bingung andri kawan rasul ru, andri penu tingkes kalaawe wangun salenga tau hampe kalayiru. ²⁵ Udi yeru naan sa hawi iwara:" Tantau, ulun sa na ampasuk naun hang panjara, rahat mindri hang Lewu Alatalla ngajar ulun rama." ²⁶ balalu, kapala panjaga lewu Alatalla baya pangawalni tulak andri ngendei rasul-rasul ru, tapi puang mitah kakarasan daya here takut wuah tawut watu daya ulun rama. ²⁷ Hantek here haut ngendei Petrus andri Yohanes, here na ampi hadap ma hadapan Sanhedrin. Lalu Imam Besar nunti here, ²⁸ eauni:" kami haut mehet nagur naun himpan ada lagi ngajar hang wuang ngaran yiru, tapi hanyu haut nampenu Yerusalem andri ajarannu andri hanyu ba aheng himpan nanggung ira ulun ti ma kami."