¹ Dami hampe andrau Pentakosta, katuluh here ba kumpul hang uneng sa sameh. ² Salenga karengeian teka langit, lengan ialah riwut barat, balalu lengan yiru nampenu katuluh isi lewu uneng here maharung. ³ Na tantarang ma here lela-lela ialah apui balalu bahamur minau hang amau here isa-isa. ⁴ Balalu, katuluh here na tampenu andri Roh Barasis balalu here mulai bapaner hang hene masam bahasa, ialah sa na ami daya Roh Barasis pakai here bapaner. ⁵ yiru, naan ulun-ulun Yahudi sa muneng hang Yerusalem, ulun-ulun saleh teka tiap-tiap bangsa hang kapit langit. ⁶ Hantek lengan yiru karengeian, kumpulan ulun rama sindrah hawi nelang puang here kataru daya tiap ulun karengei here bapaner hang wuang bahasa here raerai. ⁷ Here wa'uh nelang wa'uh tatu'u, nelang bapaner, "Ang here sa ganyah ba paner na katuluh ni ulun Galilea? ⁸ Ka'awe salenga asing-asing takam karengei here na andri bahasa uneng takam na kaya'an? ⁹ Kawan ulun Partia, andri Media, andri Elam, andri warga Mesopotamia, Yudea, andri Kapadokia, Pontus, andri Asia, ¹⁰ Frigia, andri Pamfilia, Mesir, andri daerah-daerah Libia riet Kirene, andri ulun sa hawi teka Roma, kawan ulun Yahudi kalahie pada kawan proselit. ¹¹ kawan ulun Kreta andri Arab. Takam nyarengei here bapaner makai bahasa takam neo ulah gawi hante Alatalla." ¹² Balalu, katuluh here wa'uh tatu'u andri bimang here bapaner isa andri sa lain, "inun arati katuluh yina?" ¹³ Kude yeru, ulun sa lain kakihi eau here, "Here na mahamui daya anggur wau." ¹⁴ Kude, Petrus mindri sindrah kasawalas rasul, nahampe lengan palus bapaner ma here, "Rengei naun kawan ulun Yahudi andri katuluh sa muneng hang Yerusalem, nampe naun katuluh karasa nelang nyandrengei lenganku. ¹⁵ Daya, kawan ulun ina puang mahamui, ialah sa na tanguh da naun daya andrau wa'u jam telu, ¹⁶ kude ina sa na paner mitah Nabi Yoel: ¹⁷ "Hang andrau-andrau pangalisan sagar ba kajadian, Alatalla nampe firman: Aku sagar ngampinau Roh-Ku ma amau katuluh murunsia. Kawan iya nu upu andri kawan iya nu wawei sagar ba nubuat, kawan iya muda sagar kahaba paninungan, andri kawan ulun matueh hingka penah naun sagar kahaba upi. ¹⁸ Likan ma amau kawan walah-Ku upu andri kawan walah-Ku wawei hang andrau yiru, Aku sagar ngampinau Roh-Ku, balalu here sagar ba nubuat. ¹⁹ Andri, Aku sagar ngampi dinung mukjizat-mukjizat hang langit, hang amau, andri siri-siri ajaib hang bumi, hang kapit, ira, andri apui, andri atuk. ²⁰ Mate andrau sagar na ubah jari maiyeng andri wulan jari ira, sa huan pihawian panante Tuhan ²¹ Sagar ba kajadian, tiap ka ulun sa neraw ngaran Alatalla sagar na salamatkan." ²² "Rengei naun kawan ulun Israel, sanrengei paner ku ina. Yesus, ulun Nazaret, erang ka ulun sa na tutui Alatalla hingka penah naun mitah pakara-pakara ajaib, mukjizat-mukjizat, andri siri-siri, sa haut na tantarang Alatalla hang penah naun mitah hanye, ialah sa haut na rasa daya naun. ²³ Yesus ina, sa na sarah sasuai aheng sa haut na tantu andri kabahumen Alatala sa huan ina, wunu naun palus hanye na pantak hang kayu balasanggar mitah tangan kawan ulun durhaka. ²⁴ Kude, Alatalla ngamuan welum palus ngidar hanye teka kahanangen maut daya mustahil Hanye na kuasai daya pampatei. ²⁵ Daya hi Dawid suah bapaner hal Yesus, "Aku kadinung Tuhan naan eleh hang hadapanku, daya Hanye naan hang tuhi kawanku balalu aku puang sagar na goyahkan. ²⁶ Yiru sabab ni, ateiku arai mihewu, lelaku miarai. Tengaku pada sagar muneng hang kaharapen, ²⁷ daya Hanyu puang sagar maladar amirueku hang dunia ulun matei, atawa maladar tenga ulun-Nu sa Barasis ninung dunia ulun matei. ²⁸ Hanyu haut iwara ma aku lalan pamelum. Hanyu sagar ngulah aku penu ka'araien andri uruwawa-Nu." ²⁹ Pulaksanai katuluh, aku tau bapaner ma hanyu andri penu kayakinan, neu datu nini takam, hi Dawid, hanye haut matei palus na pasar, andri pasaran ni magun naan hang penah takam hampe taati. ³⁰ Jari, daya gana hanye na erang ka ulun Nabi balalu karasa Alatalla haut ba janji andri sumpah ma hanye nampe ngampi harung isa teka katurunan Dawid ma amau tahta ni. ³¹ Daya iru, Hi Dawid sa haut suah ninung ina, bapaner manganai Kristus sa amuan teka pampatei: "Hanye puang sagar na paladar hang dunia ulun matei, andri tenga ni puang sagar ninung dunia ulun matei." ³² Yesus ina sa na amuan Alatalla teka pampatei andri katuluh kami haut manyaksi hal yiru. ³³ Daya iru, udi na enat ma kadudukan ni sa amau daya tangan kawan Alatalla nelang narime janji Roh Barasis teka Amah, Hanye haut na ampinau, baik sa na dinung atawa sa na rengei. ³⁴ Daya hi Dawid puang mamai ma surga, kude hanye raerai ka eau, "Tuhan bapaner ma Tuanku, 'Maharung hang tuhi kawan ku, ³⁵ hampe Aku ngulah musuh-musuh-Nu jari pirarahan pe'e-Nu." ³⁶ "Daya iru, elah leh katuluh lewu Israel karasa ta'tu'u Alatalla haut nyanyari Hanye Tuhan andri Kristus, ina Yesus sa haut na balasangar daya naun." ³⁷ Tawuk here karengei hal yiru, atei here tu'u mahanang, balalu here ba paner ma hi Petrus andri ma kawan rasul sa lain, "Pulaksana'i katuluh, inun sa patut na karaja kami? ³⁸ Balalu hi Petrus bapaner ma here, "Batobat nelang laku diri naun na baptis hang wuang ngaran Kristus Yesus himpan ngampun katuluh dusa nu, nampe naun ta'u narima karunia Roh Barasis ³⁹ Daya janji ina ma hanyu, andri ma kawan iya nu, andri ma katuluh ulun sa masih lawit, sa hene Tuhan Alatalla sagar neraw ni ." ⁴⁰ Andri hene papaneran sa lain, Petrus ba saksi palus iwara ba bujur ma here, eau ni: "Awat salamat tenga daging naun teka ulun sa puang lurus atei!" ⁴¹ Kawan ulun sa narime lengan Petrus na baptis balalu hang andrau yiru jumlah here batamah kakira telu ribu ka ulun. ⁴² Here ba bujur hang wuang pangajaran kawan rasul andri hang wuang pipakatan, hang wuang mambagi rute andri hang wuang badoa. ⁴³ Nelang, katakuten hawi ma amau tiap-tiap amirue, nelang hene hal ajaib andri siri-siri sa ba kajadian mitah kawan rasul. ⁴⁴ Katuluh ulun sa parsaya bakumpul sasameh nelang inun sa naan hang here ampun sasameh. ⁴⁵ Balalu, here ngari harata bana wat here, udi iru mambagi-bagi ni ma katuluh ulun sasuai andri kaperluan here asing-asing. ⁴⁶ Tiap andrau, andri isa atei here bakumpul sasameh hang Lewu Alatalla nelang mambagi rute hingka lewu ma lewu. Here narime nakuta andri arai atei, ⁴⁷ nelang nawat Alatalla, nelang here katuju tu'u ulun rama. Nelang, tiap andrau Tuhan namah jumalah here, hanye iru kawan ulun sa na salamat.