1 Paulo, umpositoli_ atobeli umpositoli nokubigwa nabanhu kana wokushingila banhu, nomuna Jesu Khristo naMwali Tate, wakamuswa mubafi_ 2 nabose bakazwaji bananami, nokunsondo jose jeGalatiya: 3 Ishe kunawi nolunyalalo lunova kunaMwali Tate bedu akale naShe Jesu Khristo, 4 wakazupila kuluchinyo lwedu kutila kuti tiwane luchijo pejanja yeli, nokuda kwaMwali Tate bedu, 5 lukujo ngalube kwaali lini nalini. Amen. 6 Ndinochenamiswa nokuti ini mukimbija kutizhila kule nooyo wakamushoba neshe jaKhristo. Ndimuchenamiswa nokuti mumunda kowhilila jimwe ndebo mbuya, 7 kusikuti akuna imwe indebo, koga kuna bamwe banhu bamumuchinyisa beda kushandula indebo yaKhristo. 8 Koga kana kuli kuti ndisu kana inhumwa inova kudenga ichapupula indebo imbuya kunawi ilosiyana neyi yatakapupula kunawi, ngetukwe. 9 Sezwatakaleba kale, feno ndinoleba kabili "Kana umwe epupula indebo imbuya kunawi isili iyo yawakatambula, ngetukwe." 10 Feno ndinoshaka ishe jabanhu kana jaMwali? Ndimushaka kushantisa banhu na? Kana ndichinokweja kushantisa banhu, atobami undanda waKhristo. 11 Feno ndoda muzibe, banakwayina, kuti indebo imbuya yandakapupula atoba indebo mbuya yonhu, 12 andijakazuwana kunhu kana kulayijwa. Koga, ndakaboniswa naJesu Khristo. 13 Mwakawha nozobupenyu bwangu bwantolo ndichikuJuda, kuti ndakabebulaya chini igubungano lyaMwali ndikweja kulibulaya. 14 Ndakandila mbeli kuJuda kupinda banji bejanja lyangu, kubhuda kubanhu bokunasu.' Ndikokunyema kwandakata ndibona banhu bekonwa kulondota magalilo akabeta matate angu. 15 Koga Mwali, wakandishaluja ndiva muntumbu mwamai bangu, akandishoba neshe jije, wakashanta. 16 kutondejela Mwana uwe kunami, kutila kuti ndibhaunule nozuzwe kumaGentali, andijakakambija kubhuza umbili nelopa. 17 Andijakenda kuJelusalema kunabo bakaba bapositoli mbeli kwangu. Koga, ndakenda kuArabia ndikabwilila kuDamasiko. 18 19 20 Kwapinda makole matatu ndakenda kuJelusalema kuti ndinozibisisa Kefasi ndikakagala naye kwamazhuba makumi mashanu. Koga andijakabona bamwe bapositoli kuzhe kwaJakobe, banakwayina baShe. Zwandinomukwalila , ndomubimbisa mbeli kwaMwali kuti andijimunyepa. 21 Ndakenda kumabhazu eSyria neCilicia. 22 Andijakabezibikana mumesho egubungano lyomuJudiya bako kuna Khristo. 23 Bakazuhwa zulebelekwa, "Unhu wakabetibulaya umubhaunula indebo mbuya yokudimbwa yakabeda kupalaja." 24 Nokudalo bakakuja Mwali pezhulu pangu.