¹ Bana, whililani bazwali benu nokuti kunaShe zulokwelela. ² "Ipa lukujo kunadade namhai babo" (Ndiwo mulawo wokutanga unachibimbiso), ³ "kutila kuti zwikululamile akale mugale mazhuba manji penyika." ⁴ MaTate, musinyemese bana benu. Koga, mubakubuse mukuzubhata nomundayijo jaShe. ⁵ Balanda, whililani mweni wenu wenyama. nokushonipa akale nokuteketa, muchokomende mowoyo wenu. Bashonipeni nenzila yamwabenda kunoshonipa Khristo. ⁶ Whililani musushonipe kana Beni benu bekamulinga chete mutila kuti mubashantise. Asi, whililani sozushingi zwaKhristo, unota kuda kwaMwali zuva mumwoyo yabo. ⁷ Shinga nomwoyo uwo wose, uta soti umushungila She koga awujimushingila banhu, ⁸ nokuti tinoziba kuti zwito zubuya zwinotiwa nonhu, unolipwa naShe, kana undanda kana pe. ⁹ Beni ndawo bhatani balanda benu nenzila inokwelana. Musibatyisijile. Munoziba kuti yoyo unobeli mwenindawo nowenu kudenga, akuna kushala kuna iye. ¹⁰ Zopejeleja, simani munaSe akale nomumasimba awe makulwana. ¹¹ Mbalani zwilwaniso zwaMwali kutila kuti mukwanise kumisikijana namabambo asatani. ¹² Nokuti kuyabula kwedu akutobeli pezhulu penyama nelopa, koga pezhulu pabatongi, nopezhulu payabo banamasimba, nopenhilima, nopezhulu pemipepo mibi ipo kudenga. ¹³ Nokudalo mbalani zwilwisaniso zwaMwali, kutila kuti mutubule kuma muzhuba lina zubi , akale kana mwapeja zose, mume mukabhatilila. ¹⁴ Bhatililani, nebhanti lyechokomende linosungililwa ponshana, akale nokubamwabiga pendilo yezhamu lyokululama, ¹⁵ akale, namakumbo enu alombambila zunova kuwhi yolunyalalo. ¹⁶ Panazose zwamunoshangana nazo tolani inhibi yokudimbwa, yeyo yamuchashingisa kuzwitabilija kubhuda kunsebe koyo umbi. ¹⁷ Akale utole inhula yoluchijo negwalabaza loMpepo, ndilo iwhi lyaMwali. ¹⁸ Muminamato nemikumbilo yose , namatani unshaji wose muli muMpepo. Kuswika yopa, ibani mukalingisisa nolunangatijo pamunopila minamato yabanhu bose balolulama baMwali. ¹⁹ Akale ndinamatileni, kuti undayijo ungapiwa kunami kana ndazhula undomo. Namatani kuti ndingazibisa banhu ndisina lutyo ichokomende limo mundebo imbuya. ²⁰ Nguzwe ndebo imbuya kuti imi ndumilili ulobhatwa namaketani, kutila kuti ndishomeje nomwoyo, mwandilokwelela kuzuleba. ²¹ Tychicus, mwanakwaiya unodiwa akale unshingi ulobimbika munaShe, uchakuzibisa zwose, kutila kuti muzibe kuti ndilichini. ²² Ndontuma kunamwi nechinangwa yechi, kutila kuti muzibe kuti tilichini, akale kuti emusungwaje mumwoyo yenu. ²³ Lunyalalo lube kubanakwayina, noludo nokudimbwa kunova kunaMwali Tate naShe Jesu Khristo. ²⁴ Ishe ngajibe kunabose banoda Jesu Khristo noludo lusina bubi.