¹ Imi, nokudalo, sonsungwa waShe, ndomukutayija kuti mukwende nonshobelo wayoyu wakamushoba. ² Ndomukutayija akale kuti muzudeleje nokujijama akale nomwoyo ndefu, muwilana ishe umwe nomwe muludo. ³ Itani zwamunokwanisa kutila kuti mulondote kubhatana kompepo muchisungo cholunyalalo. ⁴ Kuna umbili nompepo umwempela, sezwa makashobwa mukubimba kokushobwa kwenu. ⁵ Akale kuna She , kudimbwa, lubhabhatizo, ⁶ naMwali umwempela naTate babose, bapo pezhulu pazo zose zubhudilila munayibo monunazose. ⁷ Kunasu tose ishe japiwa nonkwelelo nechipo chaKristu. ⁸ Sezwali noleba iwhi liti: ''Pakenda kudenga, wakatungamilila butapwa mubutapwa, akapa zwipo kubanhu.'' ⁹ Zunovhani kuti ''wakathana'', kuzhe kokuti wakabhulukila mumabhazu apasi enyika? ¹⁰ Yoyo wakabhuluka ndiye akale wakathana kule pezhulu kwawo wose matenga, kuti ezhaje zunu zose. ¹¹ Kristu wakapa bamwe kuti bebe mapostoli, bamwe mapolofita, bamwe mavangeli akale bamwe batebuji nabamwe balayiji ¹² kusungwaja banhu baMwali balolulama ponshingo nokubaka umbili waKristu, ¹³ kuswikila tabhatana nokudimbwa noluzibo bomwana nhulumyana waMwali, kutila kuti tikubuke tibhate akale unkwelelo wokuzhajwa muna Kristu. ¹⁴ Kristu wakatibaka kuti tisibe sabana batukutuku banoposwa mushule nambeli namapitu evula, kutolwa nebhepo yomulawu nokunyepelwa nabanhu muzuto zwabo zusilo lulama. ¹⁵ Koga, kulebeleka chokomende muludo, tokwelela kukubuka munzila jose muna iye ulinsholo, eli, Kristu. ¹⁶ Akale Kristu unobaka umbili wose, unoshanganiswa noku bhataniswa pamwempela nawose makanyu anobhancha, kana chibabi chombili chishingilana nozumwe zunota umbili kuti ukubuke uzubake muludo. ¹⁷ Nokudalo, ndoti ndisimisa yozu munashe, kuti musukwende munzila inokwenda maJentali, mumiyeyo isina lubhancho. ¹⁸ Baloswibhilwa mukuwhisisa, bekashudubuka mubupenyu bwaMwali nokuda kobututa bwabo, nokukoma komwoyo yabo. ¹⁹ Abachine shoni bazupila kubupombwe, nabanota zose zobutema nolulyo. ²⁰ Koga atobayizo zwamaka layijwa naKristu. ²¹ Ndinobimba kuti mwakawha nozuzwe, mwakawha nozuzwe mukalayijwa muna iye, sechokomende muna Jesu. ²² Mwakalayijwa kusiya zunova kubunhu bobupenyu bwenu bwantolo, kubhisa kadala kantolo. Nokuti undala unochengela nomoyo uwe wobuchenjeli. ²³ Mwakalayijwa kuti mushandulwe mumpepo wenu womundangalilo, ²⁴ nokubiga unhu umpya ulobumbwa mufananijo waMwali- mubululami nomubuchena. ²⁵ Nokudalo, siyani manyepwa, mulebeleke ichokomende nombakijani uwe, nokuti timungu jomwe nomwe. ²⁶ Nyemani akale musuchinye. Musuleke izhuba lishunama mukanyema. ²⁷ Musupe unshaji kuna Satani. ²⁸ Yoyo wakabe kwiba unokwelela kusiya. Koga, unokwelela kushinga, eshinga pozunhu zubuya namaboko awe, kutila kuti ewane zwanokobelana nabamwe. ²⁹ Usuvumile indebo jino lwaja jibhude mundomo uwo, shingisa mawhi mabhodo chete mukuzhajikija yabo banolida, kutila kuti mawhi awo ape ishe kunaba nowhilila. ³⁰ Musishunguluje umpepo nchena waMwali, koga zumo muna iye kuti takavukatijwa nezhuba lyaka titenga. ³¹ Bigani kumbali mwoyo unolwaja, bukali, kunyema, kukalilana, nokutukila, zukwendelana nokubipa bose. ³² Iba neshe kunomwe nomwe, iba nomwoyo unyolo, lekelelanani zubi, sozwaka tilekelela Mwali muna Kristu.