¹ A tuli ɗi a kili yo ɗaŋ Yesu ɓan ɓuruk gǝki gyaa ginni, a wul mǝǝri dǝn wos tu, ² ''Kaa yisǝŋ tu mbuɗkǝn mbǝtlǝm yaa laatsǝi belak kǝ tlǝǝghǝni a manngǝnɗi, ta vǝr Ŋaa zaarii tǝǝ hǝmmbal tii.'' ³ She pǝris vares tǝ mǝnvaraŋsǝ zarsǝ taa ta jwaam a balgham ngǝ pǝris vares, gyo ɗaŋ sǝǝm wos ta yi tu Kaifas. ⁴ Tǝǝ ɓumtsǝ vii namboŋ tu tǝǝ ngaɓ Yesui nǝ mǝǝri tǝǝ ɗuu tii. ⁵ Durghǝ yo tu tǝǝ ta yi a wulghǝn tu, '' A kili ghǝ belak hǝŋ, durghǝ yo tu shisherghǝn raa tǝ shishi a dlei zarshes hǝŋ.'' ⁶ Kili yo ɗaŋ Yesu ci Baitanya dǝn gya Siman ndomtsǝi, ⁷ Daɓak kili yo ɗaŋ a tsǝtnni a laŋsǝ dakces nǝ cighǝn ngǝtn ngǝ cighǝn, she gǝɗ won ta ndaɗi tǝ puŋndi miir, kǝ wurɓa monnda, ata shin Yesu mǝn a gaam wos. ⁸ Beɗ tǝ gii ɗaŋ mǝǝri dǝn wos tǝ yel cik, she ata tliishi ghai tǝ wul tu, ''Dei ghǝ malarghǝn ngǝrshi gin yini tu nii? ⁹ A moɓ ndaraaghǝn aa ɗiɓar miiri gin tǝ wurɓa monndan a ɓǝǝl gyaa naa-kui mǝn.'' ¹⁰ Beɗ tǝ gii Yesu ɗaŋ ata yisǝŋǝi, ata wulshi tu, ''Nii ghǝn a caa annda kyaa vuu raa gǝɗin mǝn ne? Durghǝ yo tu a fim ngǝtn ngǝ ndaraaghǝn mǝn. ¹¹ Kii tǝ mǝn dwaandǝ ko dzaŋ gyo, beɗ tǝ gii nǝ ko dzaŋ gyo ghǝn mi cim ki hǝŋ. ¹² Durghǝ yo tu ɗaŋ a kaɗǝm miirǝn mǝn a dlietn, a kaɗni nǝ durghǝ giighǝnetn. ¹³ Jomi mya wul ki tu, ɓuruk lǝɓ yo ɗaŋ vii wusni gin caa wul ghai a ɗǝgn, ngǝtn yo ɗaŋ gǝɗin fi beɗ ta kon nǝ ɓitalghǝn wos.'' ¹⁴ She namboŋ a giɓkǝ dzuɓ tliiti mbǝtlǝmes, ɗaŋ sǝm wos tu Yahuda Iskaryoti, ata tlii a dǝllǝŋsǝ pǝrist, ¹⁵ ata wul tu, ''Nii ghǝn kyaa suu aa taam ghǝnnda mǝ vǝr tii ɓaskie?'' Tǝ ɓǝǝɗ tǝ zurfa tashi maayi. ¹⁶ A kiles annda ata ŋal datǝpm yo ɗaŋ wo vǝr tii ɓashi. ¹⁷ To ɗa dzaŋ ngǝ keni kǝ belak kǝ dugn ɗaŋ yiis kai hǝŋ dlaarghǝn mǝǝri dǝn woshes tǝ ta tlii ɗi a Yesu tǝ wul tu, ''Ɗo ghǝn kya suu mǝ ɓumtsǝ lǝɓ yo ɗaŋ ka ci ngǝtn ngǝ cighǝn ngǝ belak kǝ tlǝǝghǝnes kai yo?'' ¹⁸ Ata wul tu, ''Ndan ɗa giɓkǝ yaatles ka tu murwon she aa wul tǝ tu, 'Maalǝm wul tu, ''Kili wos aa naa mel. Ma ci belak kǝ tlǝǝghǝni ɗaaghǝ dǝn, tǝ mǝǝri dǝnnatn.''''' ¹⁹ Mǝǝri dǝn woshes tǝ ta fi ɗaŋ gii ɗaŋ Yesu fuu shi waashii, tǝ ta ndǝr lǝɓ yo ɗaŋ ta ci ngǝtn ngǝ cighǝn ghǝ belak kǝ tlǝǝghǝnes kai. ²⁰ Ɗaŋ suutu ta fii, she ata tsǝtni durghǝ yo tu tǝ ci tǝ gyaa mǝǝri dǝn woshes dzuɓ tliiti mbǝtlǝmi. ²¹ Kili yo ɗaŋ cigha cighǝn, ata wul tu, ''Jomi mya fuu ki, namboŋ a giɓi waan wo vǝr vietii.'' ²² Raaghǝ jii ta ngaɓ shi waashii, tǝ ta nda tǝ ceɗkǝn namboŋ namboŋ, ''Ciɓ nǝ myani hǝŋaa, Daadǝn?'' ²³ She ata sushiɗa tu, ''Gyo ɗaŋ mya caa taas koɗ namboŋ mi cimtǝ ngǝnnda wo vǝr vietn. ²⁴ Ŋaa zaar wo tli, ɗaŋ gii ɗaŋ tǝ dlyaaɗ a gamashi. Beɗ tǝ gii wo gir daashi gii ɗaŋ te ɓastǝ annda ta vǝr Ŋaa zaar! A moɓ ndaraaghǝn ɗaŋ cii ɓwaa daashes hǝŋ.'' ²⁵ Yahuda gii ɗaŋ wo vǝr tii ata wul tu, ''Maalǝm ko nǝ myannan?'' ata wul tǝ tu, ''Kaa konii tǝ gamawa.'' ²⁶ Ɗaŋ tǝǝ ta yi a cighǝnes, Yesu ta mbii dugn, gǝm shiɗshiɗi ghai, she ata tsaalii. Ata vǝr mǝǝri dǝn woshes she wul tu, "Kaaɓǝm, cin. Gin nǝ dlietn.'' ²⁷ She ata mbii koɗes ata nyaar, ata vǝrshi ata wul tu, ''Tlen, ɓuruk waan. ²⁸ ''Durghǝ yo tu gin nǝ voraŋatn kǝ mbighǝn ɗa raai gyo ɗaŋ tǝ dlaa nǝ durghǝ dlaaghǝn loŋsǝ ghǝ kusuŋsǝ ngǝtn ngǝ zarsǝ monnda. ²⁹ Beɗ tǝ gii mya fuu ki, ma man tlya zhak darndu dǝnnǝn ɗa hǝŋ, she dzaŋ gii ɗaŋ ma tlya kǝ muures cimki a giɓkǝ guŋndǝ ghǝ Daagǝtn.'' ³⁰ Ɗaŋ tǝ ta waa ngil, she tǝ ta tai wuur ghǝ zaitun. ³¹ She Yesu ta wulshi tu, ''Ɓuruk waan ka nga yaasǝŋ ɗa kaviɗin nǝ durghǝ myan, duryo tu yini dlyaaɗkǝn tu, ''Ma ɗuu murghǝ lyaaghǝn tǝmsashii, gutuli tǝmsas ta basaŋǝi.' ³² Beɗ tǝ gii ɗa kaari ɗaŋ yaa shisher mii, ma tul ki Galiili keni.'' ³³ Beɗ tǝ gii Biturus ta wul tu, ''Ko yaan yini tu ɓuruk ta ndaaɗi nǝ dur waa, myan gǝtn ma ndaaɗ hǝŋ.'' ³⁴ Yesu ta wul tǝ tu, ''Jomi mya fuughǝ, ɗa kaviɗin ka ci vii tu kaa yisǝŋǝm hǝŋ tǝpm maayi annda daturshi tǝ gǝm vii.'' ³⁵ Biturus ta wul tǝ tu, ''Ko yaan yini tu ciɓ ma mǝǝs mi cimngǝ ma ci vii nǝ kyan hǝŋ.'' She mǝǝri dǝn woshes ɗaŋ tǝ ɓan tǝ naai tǝ wul cik ɗaŋ. ³⁶ A kiles Yesu tǝǝ ta tlii ci cimshi a lǝɓ yo ɗaŋ caa cim tu Getsaimani she ata wul mǝǝri dǝn woshes tu, ''Tsǝɗǝnni ɗuun myan ma ɓǝɗǝm a ken mǝ kara Cogn.'' ³⁷ Ata mbii gyaa Biturus tǝ mǝǝri Zaɓaɗi mbǝtlǝm tǝ yaan ngai she ata ngaɓ vuughǝn nǝ raa ghǝ jii. ³⁸ She ata wulshi tu, ''Raatn cigha giɓkǝ vuughǝn monnda hal nǝghǝ mǝskǝn. Tsǝtǝn ɗuun mǝ sǝǝn kǝǝm. ³⁹ Ata ngaa ɓǝɗ tǝ ghai ken njwaatn, she ata zuɓnii tǝ tsogn ken wos yaatl, ata kara Cogn. Ata wultu, Daagǝtn, ǝŋ kya kaɓii, gaa koɗǝn tǝ laatsǝmmǝnii. Beɗ tǝ gii, nǝ suughǝnnetn ghǝn ka laaɓ hǝŋ, she suughǝnni gwaai.'' ⁴⁰ Ata sutǝ a gyaa mǝǝri dǝn wos ata tushi cigha kuci, she ata wul Biturus tu, ''Aiye, ka ɗyaa kǝ ɓuɓǝm ko nǝghǝ kili namboŋ hǝŋaa? ⁴¹ Tsǝtǝn gwaam, karan Cogn durghǝ yo tu aa tu gamawaan a giɓkǝ diiɓkǝn hǝŋ. Raai aa kaɓii beɗ tǝ gii dlies nǝ lyaghaɓi.'' ⁴² She ata sutu kǝ mbǝtlǝmi tǝ kara Cogn, ata wul tu, ''Daagǝtn, ǝŋ yaan koɗǝn wo laatsǝ hǝŋ tu she mya tlei, gaa tǝ naa nǝ a suughǝn waa.'' ⁴³ Ata sutǝ ɗi ɗa, ata tushi cigha kuci, durghǝ yo tu yir waasǝŋ aa ta ɗǝǝmii. She ata gaashi waasǝŋǝi ɗeɓaɗ tlii. ⁴⁴ Ɗaŋ ata sutǝ kǝ maayes cigha karaghǝn Cogn ata ya kwaan vies gyaa gon nǝ ngǝtn ngǝ nambonyi. ⁴⁵ She Yesu ta man a mǝǝri dǝnnes ata wul shi tu, 'Hal ɗaŋngǝnin kiigha kuci tǝ ngaaghǝn laa? Yelǝni, dǝǝles a tuliiɗi, taa vǝr vii Ŋaa zaarii a taas kǝ mǝn kuskǝ ngǝtn. ⁴⁶ Shinshin, mǝǝ tlǝnnii. Yaalǝn, gyo ɗaŋ ca vǝr vietn aa tulii ɗi mel.'' ⁴⁷ A kili yo ɗaŋ ata yi a vies wulghǝni Yahuza, namboŋ a giɓkǝ dzuɓ tliiti mbǝtlǝmes, ata tuliiɗi. Tǝ ta man tǝ gyaa gutuli zarshes ɗaŋ tǝ dlamɗi tǝ gyaa mǝn varaŋsǝ firistoci tǝ mǝn varaŋsǝ zarshes. Tǝ ta yir gyaa gita tǝ gyaa nanngole. ⁴⁸ To daashes ɗaŋ wo vǝr Yesues aa ta giɗ shi ngǝtn yo ɗaŋ wo fi tu, ''Gyo ɗaŋ mya ngaɓtǝ rumtsǝk to, nǝ yaan. Ngaɓǝntii.'' ⁴⁹ Ɗa ɗan ɗa ɗan ata man a Yesu ata wul tu, ''Annu, Maalǝm!'' she a ngaɓtii rumtsǝk. ⁵⁰ Yesu ta wul tǝ tu, ''Kaam, fi ngǝtn yo ɗaŋ kǝ man ɗa.'' She tǝǝ man ngaɓ Yesui, tǝ tlǝǝr tii. ⁵¹ Swaaɗ, namboŋ a giɓkǝ gyaa gii ɗaŋ citǝ gyaa Yesui ata taa taas wos, ata dlii gita wos ɗi, ata dzak kǝǝm mon ngǝ dǝllǝ ghǝ Pǝrishes mǝnii. ⁵² She Yesu ta wul tu, ''Sular gita waa a giɓ kǝǝpi wos, durghǝ yo tu ɓuruk gyaa gyo ɗaŋ tǝ mbii gita yaŋshi ma a te gita ghǝnnda ta mǝǝs. ⁵³ Ko kya yel ɗan tu ma ɗyaa mǝ cim Daagǝtn hǝŋaa, tǝ ndǝr tǝ shinndar gutuli zhipti mǝn shinngǝn wos ɗi ɗaŋ tǝ moɓ goɓri dzuɓ tlii mbǝtlǝm hǝŋaa? ⁵⁴ Beɗ tǝ gii wurii ghǝnnda ta yugngar vik Coghe, tu ciɓ yaa fii ginne?'' ⁵⁵ A kiles Yesu ta wul guutuli zarshes tu, '' Kǝǝ man tǝ gyaa gita tǝ gya shirǝŋ a ngaɓǝm ngai ɗaŋkutu tu minǝ mǝǝr naa tlyaaghǝnniya? Mya tsǝtn ko dzaŋ gyo mii cim ki dǝn ngǝ Cogn migha zhiɗkǝn zarsǝ ghai, kǝǝ ngaɓm hǝŋ. ⁵⁶ Beɗ tǝ gii ɓuruk ngǝrshi gin ɗaŋ tǝ fin tu tǝ yugngar ngǝtn yo ɗaŋ mǝn shinngǝn Cogn tǝ dlyaaɗ.'' She ɓuruk mǝǝri dǝnnes tǝ ta gaa tii tǝ kirii. ⁵⁷ Gyaa gyo ɗaŋ tǝ ngaɓ Yesues tǝ ta tlǝr tǝ a Kaifas dǝllǝ ghǝ pǝris, lǝɓ yo ɗaŋ mǝn yisǝŋngǝn mborki ghǝ Musa tǝ mǝn varaŋsǝ yaatl tǝ jwaam ngai. ⁵⁸ Beɗ tǝ gii Biturus ta laaɓ tǝ ŋaa ɗoongai tǝ diidlǝŋ kǝ pǝris vares. Ata ndai giɓ dǝn ata tsǝtnni tǝ mǝn paŋngǝn tu tǝ yel ngǝtn ɗaŋ wo laaɓ kaari ɗi. ⁵⁹ A kiles mǝn varaŋsǝ pǝris tǝ ɗeɓaɗ mǝn balghames tǝ nda ŋalghǝn mǝn tlyaghǝn zha kǝ mbeerni a dulgam Yesu, durghǝ yo tu tǝǝ tu tǝ ɗu tii. ⁶⁰ Tǝǝ ta tu ko namboŋ hǝŋ, ko ɗaŋ tu taa ta tu mǝn tlyaghǝn zha ɗaŋ taa mbwaaɗi kǝ mberni monnda ghǝn ci ɗa keni. Beɗ tǝ gii ɗa kaari she gyaa gon mbǝtlǝm tǝǝ ta nywaal ɗi. ⁶¹ Tǝǝ ta wul tu, ''Muri gin wul tu, Ma ɗyaa ma wuu viin ngǝ Coghǝi mǝ ndǝr mǝ nal tii a giɓkǝ mbuɗkǝn maayi.'' ⁶² Dǝllǝ pǝrishes dlǝǝr wul tǝ tu, ''Ki tǝ ngǝtn ngǝ sughǝn ɗa hǝŋaa? Nii ghǝn caa kon a gama cighǝi?'' ⁶³ Beɗ tǝ gii Yesu ta mwaali kuɓ. Dǝllǝ pǝrishes ta wul tǝ tu, ''Mya ceɗkǝ tǝ sǝmngǝ Cogn murghǝ raai, fuu mi ko kyani ghǝn ki Ɓorghǝnni kǝ Cogn, Kuni Coghaan?'' ⁶⁴ Yesu ta sutǝ ɗa tu, ''Kaa konii ngǝtn waa. Beɗ tǝ gii mya fuughǝ, ɗaŋ ɗaŋngǝni ka yel Ŋaa zaar a tsǝtnngǝn a taaghǝ zaari ghǝ vartǝ, cigha manngǝn ɗi a tsogn gaami giɓ kurvon.'' ⁶⁵ She pǝris vares ta dlaatǝ luu woshii she wul tu, ''Aa kon ngǝtn ngǝ kemaskǝn! Nii caa kyaa ŋal ngǝtn yo ɗaŋ wo tlyaki zha mǝn ɗae? Yellǝn, ɗaŋngǝnin ka wum kemaskǝnneshii. ⁶⁶ Nii ghǝn nǝ ɓitalghǝn waane?'' Tǝǝ ta suɗa tǝ wul tu, ''A kǝǝm mǝskǝni.'' ⁶⁷ She tǝǝ ta pyaatsǝ tǝ nyognvii tǝǝ naɗtǝ yirii tǝǝ voɗtǝ, tǝǝ dlii tǝ taas, tǝǝ ⁶⁸ wul tu, '' Fuu mi, kyan ɗaŋ kinǝ Ɓorghǝn kǝ Coghǝi. Nuu ghǝn a ɗugho?'' ⁶⁹ Ɗaŋ Biturus ta yi a tsǝtnngǝn ɓidlǝm, she nyi won ɗaŋ ata yi nǝ mon ata man ɓastǝ ata wul tu, ''Kyani maa kǝ tayi tǝ Yesu mǝn Galilii.'' ⁷⁰ Njiɓ tǝ gii ata ci vii ghai a ken waasǝŋ ɓuruk, yi wul tu, ''Ma yisǝŋ ngǝtn yo ɗaŋ kya wul vii ɗa hǝŋ.'' ⁷¹ Ɗaŋ ata nyolii ɗi ɗa ɓiiles, kamshi monni gon ŋaa gǝɗ ata yeltǝ she ata wul gyaa gyo ɗaŋ ciɗa ɗan tu, ''Murin ata yi tǝ Yesu mǝn Nazareɗ ɗaŋ.'' ⁷² Ata ci vii ghai tǝ cimngǝn sǝǝm Cogn tu, 'Ma yisǝŋ mures hǝŋ!'' ⁷³ Ata ngaa laai njwaatn gyaa gii ɗaŋ cigha dlǝǝrghǝn a laŋshes tǝ ta man tǝǝ wul Biturus tu, Kǝrǝŋ kǝrǝŋ ki namboŋ a giɓi waasǝŋ, durghǝ yo tu vii yo ɗaŋ kya wul a vii a zhiɗ cik.'' ⁷⁴ She ata nguɓ laŋngǝn gamas tǝ ŋaskǝn puus tu, ''Ma yisǝŋ mures hǝŋ,'' ɗa ɗan kyaaɗ daaturshi ta gǝm vii. ⁷⁵ Biturus ta ɓital a ngǝtn yo ɗaŋ Yesu ata yi kon tu, "Ǝnnda daaturshi tǝ gǝm vii ka ci vii ghai tǝpm maayi tu kaa yisǝŋǝm hǝŋ." She ata nyolii ɓǝdlǝm tlǝn ngwaar nyaŋ nyaŋ.