¹ She gyaa Faraisawa tǝ gyaa Sadukiyawa tǝ ta man tu tǝ diiɓ tǝ, tǝ ta kara tu tǝ zhiɗ shi ŋaa ɓalaŋ ɗi gaami. ² Beɗ tǝ gii ata sushi ɗa ata wul tu, "Ǝŋ suutu ya fii, kyaa wul tu, 'dzaŋ wo ndara, durghǝ yo tu kurvon nǝ zheli.' ³ Yaan nǝ ɓitlndi, kǝ wul tu, 'dzaŋ ngǝ yaawonǝn a ndara hǝŋ, durghǝ yo tu gaami nǝ zheli, a ndǝr kaɓ lǝɓii.' Kaa yisǝŋ kwaanngǝn ngǝtn yo ɗaŋ kyaa yeli gha kurvon, beɗ tǝ gii kaa yisǝŋ kwaanngǝn ɓalaŋ ngǝ kili hǝŋ. ⁴ Kuuskǝn tǝ mbǝllǝ ghǝ usuli caa yi ŋal ni ɓalaŋ, beɗ tǝ gii ta zhiɗ shi ɓalaŋ won hǝŋ she kǝ Yunanai." She Yesu ta gaa shi waasǝŋǝi, tlii. ⁵ Ɗaŋ mǝǝri dǝnes tǝ ta tu tii te laŋshi dlari gii, laa ta malshi gha mbiighǝni dugn. ⁶ Yesu ta wul shi tu, "Ɗaghǝn ɗa nǝ yisti ghǝ Farisawa tǝ Sadukiyawai." ⁷ She mǝǝri dǝn Yesu tǝ ta ngaɓ wulghǝn vii tǝ dlǝŋsǝ waasǝŋ, tu, "Ko nǝ durghǝ yo tu mǝ lǝǝr dugn ɗi hǝŋaa?" ⁸ Yesu ɗaŋ ata yisǝŋ ginnii she ata wul tu, "Kyaani gyaa gyo ɗaŋ caaghǝn raa waan aa ɗaɗii, durghǝ nii ghǝnnda kyaa wul vii tǝ dlǝŋsǝ waan tu, ko nǝ nii ghǝnnda kǝ lǝǝr dugn ɗi hǝŋaa? ⁹ Kǝ yisǝŋ kǝ ndǝr kǝ ɓitalki tu dugn nanndam ɗaŋ zarsǝ zaŋngu nanndam tǝ ta ci, kǝ jwaam damvii buŋli wurii hǝŋaa?" ¹⁰ Ko dugn wattsǝmai a zarsǝ zaŋngu wuɓsǝ, tǝ kortsaŋshi buŋli wurii kǝ ta nyom hǝŋaa? ¹¹ Nǝ nii a caa kǝ ɗyaa yisǝŋ tu mya wul ki vii a dulgaam dugn hǝŋee? Ɓitalǝnki shoŋ shoŋ aa ɗakɗa nǝ yisti ghǝ Farisawa tǝ Sadukiyawai." ¹² Ɗani tǝ ta yisǝŋǝi tu caa wul shini vii a yisti gii ɗaŋ caa fi dugn ngai yi hǝŋ, beɗ tǝ gii she tu tǝ ɗakɗa nǝ ngǝtn ɗaŋ Farisawa tǝ Sadukiyawa caa giɗ. ¹³ A kili gii ɗaŋ Yesu ta man te yaalt kǝ Kaisariya, Filibi, a ta ceɗ mǝǝri dǝn wos tu, "Zarsǝ caa wul tu, "Nǝ nuu ghǝn cinǝ Ŋaa Zaaro?" ¹⁴ Tǝ ta wul tu, "Gyaa gon caa wul tu nǝ Yohanna Murghǝ Baptismai; gyaa gon tu, Iliya; gyaa gon ɗa tu; nǝ Irmiya, ko namboŋ a giɓkǝ mǝn shinngǝn Cogn." ¹⁵ A ta wul shi tu, "Ta kyaani kyaa wul gwaan tu myaan minǝ nuu? ¹⁶ She Siman Biturus ata su ɗa ata wul tu, "Kyani ghǝn ki Ɓorghǝn kǝ Cogn, kuni Cogn gii ɗaŋ ci gaamii." ¹⁷ Yesu ta sutu ɗa ata wul tu, "Shiɗshiɗi tǝ naa ghǝ mǝn, Siman kuni Yunana nǝ durghǝ yo tu tluu tǝ voraŋ ghǝn a fuughǝ ngǝrshi gin hǝŋ, beɗ tǝ gii nǝ Daagǝtii ɗaŋ ci tsogn gaamii ghǝn a fuughǝ. ¹⁸ Mya ndǝr mǝ fughǝ tu kyani ghǝn ki Biturus, a dulghǝ puusǝn ghuŋ ma nal zarsatn ngai. Gyaa ken ɓiil ghǝ girr mǝn mǝskǝn ta tlya gaam wos hǝŋ. ¹⁹ Ma vǝrghǝ piis kǝ ɗǝrǝghǝn ɓiil ghǝ guŋndu ghǝ Tsogn gaami. Ko nii ɗaŋ kyaa naɗii gha ɗǝgn cinǝ naɗkǝn Tsognvon. Ko nii ɗaŋ kyaa tǝrǝŋǝi gha ɗǝgn, cinǝ tǝrǝŋngǝn Tsogn gaami." ²⁰ She Yesu ta fuu mǝǝri dǝn wos tu tǝ fuu gon tu yaani ghǝn ci Ɓorghǝn kǝ Coghǝi hǝŋ. ²¹ A kili gii Yesu ta ngaɓ fuughǝni mǝǝri dǝn wos tu a naa ciɓ tǝ tlii Urshelima tǝ tlǝn tlya buŋngǝni monnda a taas kǝ mǝn varaŋsǝ, tǝ mǝn varaŋsǝ pǝris tǝ maalǝmci mborki kǝ Musa ta ɗu tii tǝ shisher tii gwaam a dzanyi kǝ maayi. ²² She Biturus ta jaalar tǝ gha laŋshi caa tǝ yirr tu, "Ngǝrshi gyaa gin tǝ tlǝ ɗoongai tǝ kyan, Daadǝn; ngǝrshi gin wo tughǝ vuŋ ɓar." ²³ Beɗ tǝ gii Yesu ta sutuɗa wul Biturus tu, "Sughǝ ɗaam kaar Shetan! Kinǝ dei ghǝ ngaaghǝni yaasǝŋ ɓasǝm, nǝ durghǝ yo tu kya vuu nǝ ngǝtn yo ɗaŋ nǝghǝ Cognvon hǝŋ, beɗ tǝ gii she gyaa ngǝtn yo ɗaŋ nǝghǝ ɗǝgn." ²⁴ She Yesu ta wul mǝǝri dǝn wos tu, "Ɓuruk muryo ɗaŋ ca suu tǝ laaɓǝm, a naa ciɓ tǝ nyaŋngas gamas, tǝ mbii hǝmmbǝli wos tǝ laaɓǝm ɗi. ²⁵ Durghǝ tu ɓuruk muryo ɗaŋ ca suu tǝ vum gamashii, wo naa tii. Ɓuruk muryo ɗaŋ ya naa raai woshii nǝ duratn, wo tu tii. ²⁶ Nǝ durghǝ tu nǝ tughǝn yo ghǝn zaar wo tu ɗaŋ yaa tu ɗǝghǝi ɗeɓaɗ kǝnnda naa rai woshii ye? Nǝ nii ghǝnnda zaar wo ɗyaa vǝr a dulgaam bamvii raai woshe? ²⁷ Yi tu Ŋaa ghǝ Zaar wo mani gha giɓkǝ vartǝ Daagos tǝ gyaa zhipti shinngǝni wos. A kili gii ghǝnnda wo taa ko zaari gyo ngǝtn yo ɗaŋ ata fi. ²⁸ Jom jomi gyaa gon waan ɗaŋ cigha dlǝǝrghǝni ɗuuni ɗaŋ ta mǝǝs hǝŋ, she yaa yel Ŋaa zaar a maaghǝn ɗi gha giɓkǝ guŋndu wos."