¹ Yesu ta cim mǝǝri dǝn wos dzuɓ tliiti mbǝtlǝmi jwaam shi waashi vǝrshi vartǝ a dulgaam kusǝŋsǝ zhipti, tǝ nyolar shi waashii, tǝ ndǝr tǝ nyolar ko naa gonngǝn gyoi. ² Ɗaŋngǝnnin sǝmndǝ gyaa mǝǝri dǝnnes dzuɓ tliiti mbǝtlǝm ghǝn cin. Kǝ kenes kǝn nǝ Siman (gyo ɗaŋ caa cim tǝ tu Biturus), tǝ yesashi Anndarawus, tǝ Yakuɓ kuni Zabaɗi, tǝ yesashi Yohana, ³ Filibus.. tǝ Bartimawus, tǝ Toma, tǝ Matta murghǝ kaɓkǝn zhakka, tǝ Yakuɓ kuni Alfa, tǝ Taɗdawus, ⁴ tǝ Siman murghǝ maandǝ yaatl, tǝ Yahuza Iskaryoti gyo ɗaŋ wo vǝr vii woshii. ⁵ Dzuɓ tliiti mbǝtlǝmǝn Yesu ta shinshi. A ta sǝǝɗ shi vii tu, ''Aa tlǝn a lǝǝɓ yo ɗaŋ mǝn ɗǝgn cighai hǝŋ, ko a yaatl kǝ mǝn Samariya won hǝŋ. ⁶ A bamvi gii tlǝn a mǝǝri dǝn ngǝ Isar'ila ɗaŋ ta maalii. ⁷ Kili yo ɗaŋ kigha tlǝghǝn, fuughǝn vik wusni aa wul tu, 'Guŋndu tsogn a naai mel.' ⁸ Fuuɗǝn mǝn gonngǝnii, aa shisherǝn mǝn mǝǝskǝnii, fuuɗǝn ndomtsaŋsǝi, aa ndǝr aa nyolar mǝnndǝŋsǝi. Kǝ kaɓ ɓem, vǝrǝn ɓem ɗaŋ. ⁹ Mbiin jinaari, ko azurfa, ko tagulla a taraŋ taas waan hǝŋ. ¹⁰ Aa mbiin jigha riighǝn nǝ durghẹ riighǝn waan hǝŋ, ko lǝŋsǝ mbǝtlǝm, ko kwaate, ko shirǝŋ hǝŋ, durghǝ yo tu murghǝ laa aa kaɓar ni ngǝtnngǝ cighǝn wos. ¹¹ Ko dǝllǝ yaatli gyo, ko nǝ ŋaa yaatli gyo ǝŋ kyaa nda ghai, ŋalǝn murghǝ mbuni ɗa giɓi a tsǝtǝn ɗa ɗan hal kili yo ɗaŋ ka shishi. ¹² Ǝŋ kyaa nda ɗa dǝni, wurun shi. ¹³ Ǝŋ yaan nǝ dǝn ngǝ mbuni, gaan mbuni waan tǝ naa tǝ mǝn. Beɗ tǝ gii ǝŋ yaan mbuni ghai hǝŋ, gaan mbuni waan tǝ sutǝ ɓaski. ¹⁴ Ɓuruk gyaa gyo ɗaŋ tǝ nyaŋngas kaɓkǝn waan, ko wumngǝn waan, ǝŋ yaan ka nywaalii ɗa dǝnes ko yaatles, posǝn guɗ guɗ kǝ yaasǝŋ waanii. ¹⁵ Jom jomi myaa fuu ki, dzaŋ ngǝ ɗǝǝlghǝn vii ta moɓ yelghǝn gwaandǝ yaatl kǝ Sodom tǝ Gomora moɓ yaatli gii. ¹⁶ Yelǝni, mǝ shinki ɗaŋ tǝmsa a dlei ghǝ shewei, nǝ gii, naan tǝ saghaɗkǝn ɗaŋ nyici, aa naa tǝ shiili ɗaŋ kumri. ¹⁷ Ɗaghǝnɗa nǝ zarsǝ! Durghǝ yo tu taa voɗ ki waani a ken ngǝ mǝn balgham, ta voɗ ki waanii a gyaa viin laadi mǝn Yahudawa. ¹⁸ Taa ndǝr ta tlǝǝr ki a ken ngǝ gyaa goɓna tǝ guŋsǝ nǝ durghǝ myani, tu a vǝr tlyaaghǝn zha a ken waasǝŋ tǝ ken ngǝ mǝn ɗǝgn. ¹⁹ Ǝŋ hal caa vǝrki waanii, ɓak vuu nǝ ngǝtn yo ɗaŋ ka kon hǝŋ, durghǝ yo tu ta vǝrki ngǝtn ngǝ konngǝn a kili gii. ²⁰ Durghǝ yo tu nǝ kyaani ghǝn kyaa wul vii hǝŋ, beɗ tǝ gii nǝ zhipti var kǝ Dawaan ghǝn wo wul vii a giɓi waan. ²¹ Kundaktǝ wo vǝr kundashii woshii tǝ ɗuu tii, Daktǝ wo vǝr ŋaa woshii. Mǝǝri ta shisher gyaa mǝn ɓwaaghǝn waasǝŋ mǝn, ta ndǝr ta caa tǝ ɗuushi waasǝŋǝi. ²² Ko nuu beɗ wo nyaŋngaski nǝ durghǝ sǝmatn. Beɗ tǝ gii ɓuruk gyo ɗaŋ ya dumvwaa hal ɓanngǝni, daashi gii ghǝn wo tu vumngǝni. ²³ Ǝŋ caa fiir ki forǝm a yaatli gin, kiirǝn aa tlii a kǝ keni. Jom jomi mya fuu ki, ǝnnda aa ɓan ngelaŋngǝn a ɓuruk yaatl kǝ Isar'ila ŋaa zaar wo man. ²⁴ Ŋaa ghǝ dǝn yi moɓ maalǝm wos hǝŋ, mon beɗ yi moɓ murghǝ dǝn wos hǝŋ. ²⁵ A ndara ŋaaghǝ dǝn tǝ naa ɗaŋ maalǝm wos, mon beɗ ɗaŋ murghǝ dǝn wos. Ǝŋ yaan tǝ cim murghǝ dǝnes tu Ba'alzabuul, tǝ kusǝŋsǝ sǝǝm ghǝn ta ciim mǝǝri dǝn wos kai ye? ²⁶ Nǝ durghǝ gii, cin vǝrtǝ waasǝŋ hǝŋ, durghǝ yo tu baa ngǝtn ngǝ waaɗi won ɗa ɗaŋ ta gaa tǝ baa nǝ bǝǝrghǝni hǝŋ, baa ngǝtn ngǝ mǝǝri won ɗa ɗaŋ ta yisǝŋ tǝ hǝŋ. ²⁷ Ngǝtn yo ɗaŋ tǝ fuu ki nǝ vii muuri, konǝn tii a lǝɓ yaali, ngǝtn yo ɗaŋ kǝ wum shi nǝ naa mǝǝri a kǝǝm waan, konǝntii a gam viin. ²⁸ Ɓak ci vǝrtǝ gyaa gyo ɗaŋ ta ɗyaa ta ɗuu dlii waanii, beɗ tǝ gii ta ɗyaa ta ɗuu raai waan hǝŋ. A bamvi gii, cin vǝrtǝ gii ɗaŋ wo ɗyaa ɗu ɓuruk dlii waanii tǝ raai waan giɓ wuɗ kǝ shetan. ²⁹ Caa ɗiɓar naa paalǝm mbǝtlǝm a wurɓa njwaatn hǝŋaa? Beɗ tǝ cik gin waasǝŋ won caa ndaaɗ yaatl hǝŋ ɗaŋ yi tǝ yisǝŋngǝn Dawaan hǝŋ. ³⁰ Beɗ tǝ gii ko mbitlǝŋ gaam waan beɗ cinǝ kwaanngǝn. ³¹ Cin vǝrtǝ hǝŋ, durghǝ tu zǝnzǝni waan a moɓ kǝ naapaalǝm monnda. ³² Nǝ durghǝ gii ko nuu ɗaŋ ya tlyam zha mǝn a ken ngǝ zarsǝ, ma tlya tǝ zha mǝn a ken ngǝ Daagǝtn gyo ɗaŋ ci tsogn gaami. ³³ Beɗ tǝ gii gyo ɗaŋ yaa nyaŋngasǝm a ken ngǝ zarsǝ, ma nyaŋngas tǝ ɗaŋ a ken ngǝ Daagǝtn gii ɗaŋ ci tsogn gaami. ³⁴ Ɓitalǝn ki tu mǝ man mǝ lǝǝr ni tsǝtnngǝn wusni ɗi a ɗǝgn hǝŋ. Mǝ man tu mǝ lǝǝr ni tsǝtnngǝn wusni ɗi hǝŋ, she de gita. ³⁵ Durghǝ yo tu mǝ mani mǝ caa zaar tǝ nyaŋngas Daagos, ŋaa gǝɗ tǝ nyaŋngas naashi, gǝɗ viin tǝ nyaŋngas kawoshi. ³⁶ Wo maan tu gyaa gyomtli ghǝ zaar ta naa nǝ mǝn ɗaashi dǝn. ³⁷ Gyo ɗaŋ ya suu daagos tǝ naagos moɓǝm a ndara tǝ naa nǝ gǝtn hǝŋ, beɗ tǝ gii gyo ɗaŋ yaa suu kuni wos ko nyii wos moɓǝm a ndara tǝ naa nǝ gǝtn hǝŋ. ³⁸ Gyo ɗaŋ ya mbii hǝmmbǝli wos laaɓǝm ɗi hǝŋ a ndara tǝ naa nǝ gǝtn hǝŋ. ³⁹ Ɓuruk gii ɗaŋ caa suu tǝ gaa raa woshii wo naa tii. Beɗ tǝ gii gyo ɗaŋ ya naa raa woshii nǝ duratn wo tuu tii. ⁴⁰ Ɓuruk gyo ɗaŋ ya kaɓki waanii a kaɓmi ghǝnndio, ɓuruk gyo ɗaŋ ya kaɓmi a kaɓni gyo ɗaŋ a shinǝm ɗi. ⁴¹ Gyo ɗaŋ ya kaɓ murghǝ shinngǝn Coghǝi tu cinǝ murghǝ shinngǝn ngǝ Cogn, wo kaɓ mbuuni ghǝ murghǝ shinngǝn Cogn. Gyo ɗaŋ ya kaɓ zaar ghǝ zaari durghǝ yo tu cinǝ zaar ghǝ zaari, wo kaɓ mbuuni ghǝ zaar ghǝ zaari. ⁴² Ɓuruk gyo ɗaŋ ya vǝr namboŋ a giɓkǝ ŋaa mǝǝrin, ko ci yi nǝ koɗ kǝ zha namboŋ kǝ zhak njiri tǝ tlya durghǝ yo tu cinǝ ŋaa ghǝ dǝnatn, jom jomi mya fuu ki, wo naa ɓakmi wos hǝŋ.''