¹ Nani Bulush na kumbumamai, la gandɨma koi gɨn gwang ɗuko ma Kɨrishiti. Woi na gɨre konou shakam na gaanmai, ge jik kono, shakam woi na yimaiyu. ² Na kumbu mamai shakam na gaanmai, woi na jindai na ɗuwono jik konou kanjei gɨn gɨre konou. Ge na almai na jindai na ɗuwono jik kono shakam na batɨna yi moi wun lwa la awowu angwa mɨn ɗuko la dɨmbiyik. ³ Anya bo mɨn goto la dɨmbiyik, woi mɨn shagha duwa dɨmbiyikɨu, ⁴ duwa pinen mɨ mɨn shagha yiki woi la dɨmbiyikɨu. Bo shimi , pinen shagha ma Puroguru mɨ shi gɨn dɨmbiri jupule pinen ma amna yajin. Woi shi do gɨn mondin wunduwoiyu, dɨm ɓalangin moi au wolmuu. ⁵ Mɨn ɗɨm lukure dai wom gɨrgɨt mɨ yilana ko pinen ma Puroguru. Mɨn koi ana kamo shen pɨla doyi bo kang ɓala ma Kirishiti. ⁶ Mɨn ɗaurɨmamu mɨ ye kumai ko dai kamo kindi ta goro ɓalagin, bim ta goro ɓala mamai ba gɨmeni. ⁷ Yingu wom wun lwa bɨla ɗuwoni bo kang gaanmai.Bo ɗɨm mondin mu a ɓoijire shi shi ma Kirishiti, ɗɨm mo bɨla shen gɨn koni kim shi ma Kirishiti, mɨni kɨm mɨn kishimi. ⁸ Anya ɓa na ɗade kono gɨn dɨmbiri mɨ mɨn gɨn shi, mɨ Nakomu ɓoma ɗɨnghai gwang, woi kɨduwa na jalemaiyu, woi ɗɨm ana kang gumiu. ⁹ Woi na jindai ɗɨm bɨla na shori likarkat tangi monou. ¹⁰ Kɨduwa yere miya wun ɓalmai, ''Likarkat tangi mani wun gɨn dɨmbiri gɨn ɓoi bo shori, shi ɗɨm woi shi gɨddɨnghu. Ɓala mani woi woma kanghau. ¹¹ Mo kamo miyai moi wu bɨn wom mɨn ɓala la likarkat tangi mamu shakam woi mɨn ninniu bɨla ɗuoni wom am ɗuko shakam mɨn la wutau ninni. ¹² Woi mɨn tama wuyuk bɨla mɨn tika komuu kanje ɗɨm mɨ kɨr komu gɨn moi ana paye kowu ɗumo ɗumoi gɨn gom kowu ko apowu, woi wun bɨna lakiu. ¹³ Mini, anya laki ki pɨla , woi am ɗade komu bɨla tai dɨmbiriu. Bo shimi am ɗɨm ye shimi goro kɨrau wom Puroguru wumɨna bɨla mɨ ye kɨrau mɨ yana wuyuk da yiwo. ¹⁴ Kɨdaa woi mɨn gowamaiyu shakam mɨn tama yimai. Mɨni mɨn moi domin ma yama yimai gɨn ɓala ma Kirishiti. ¹⁵ Woi mɨn ɗada komu mɨ shi taa dɨmbiri ko wutau ma yere miyau, bo shimi, mɨn ɗɨmbɨmai ɓoijire mamai ɓareni ɗɨm boi ma wutau mamu bɨla miyeni boop, ɗɨm gɨn konei kɨrau mani. ¹⁶ Mɨn ɗɨmbɨmai kishimi, kɨduwa mɨ ye ɓala ma Puroguru gaan boi mɨ ka ya mamai. Woi am ɗade komu ko wutau mɨ yimani modin boyiu. ¹⁷ ''Ge mo mum dai an ɗade koni bɨla yeyi la ma Nakomu. '' ¹⁸ Kɨdaa woi shi mɨ shi ɓoi sheda makoni shi mɨ wa gɨppau. Bo, shimi ɗɨm mɨ Nakomu shi bwa sheda mani.