¹ Ijamisi, egbọmadia non si Osẹnobula bi oni ebianlẹn Ijesu Kristi, rẹji eni agba ọbho igbeva, otuẹ rẹ ji erebhe. ² Ghe eni emi rebhe eghonghon, ibhio imen, eghe nu ki re mi ekpokpo. ³ Uwẹ lẹnlẹn ghe edonmẹn non si urẹọbhọ ọle mu iziegbe da gba re. ⁴ Ji iziegbe da mu iweanan nọn sọle sẹ bi eji uwẹ ha da mu egbe wanre bhi umu sẹ, emi soso da yuluẹ. ⁵ Okpa ki nọn, ọnọn ki rẹ khin nọn gua ni owanlan, ọki nọn bhi obọnọ si Osenobula, ọle nọn, nọn rẹrẹ, bi ọle hi khue ene nọn lẹn bi ọle ki rẹ nan lẹn. ⁶ Okpa ki nọn ọle nọn bhi urẹọbho, ọbha muan emisoso, ranmude, ọnọn ki rẹ muan, inian ọdia bi okpa ahoho bhi okpẹdẹ nọn deyo dere bhi ijerebhe. ⁷ Rẹ ji ọnan, ọni ọria ni hẹ riale mọn ọle ha mi emisoso bhi obọ nọn si ebianlen. ⁸ Ole hi okpia nọn mọn ọkhọle eva, nọn bha mudia nọn sẹn bhi odẹ nọn gbale. ⁹ Ji ọni obhiọ le ni okpia ni obọ gbele ha zẹ bhi ehe nọn sọ le nọnkhua. ¹⁰ Okpa ki nọn, ọni ọdafẹn bhi ehe nin khere ramude, ọle dẹ yumi bọ si ọni abobolo nọn bhiabhia bhi uki ilumu. ¹¹ Ranmude, umu kele nọn si ovuọnlen bi utomi utuẹlẹa bi ọki kae eni ilumuan. ¹² Erọnmọn ọsi ọno okpia nọn mọn iziegbe rẹ ji edọnmẹn. Ramude, ọnọ ọne edọnmẹn gbera, ọki mi ejele nọn si iyẹnlẹn, rẹ ji oni ive nọn si ene huẹ mọn Osenobula. ¹³ Eji ọsriasoso tale ghe nọn rẹ mi edọmẹn,?Osenobula dọmọn mẹn," ranmude emi ebe hi dọmi Osenobula la ọle ni Osenobula dọmin ọria soso. ¹⁴ Okpa ki nọn, Oneọdeọde ki mi edọmen be jọ guanọle, ọki siọ kie bej ọki rẹ ha yẹ ọle. ¹⁵ Eghe ni, ọni ọghọnmẹn ki rẹahanman, ọda bi emi ebe, bi ẹghe ni oni emi ebe ki rẹ wanre nọnsẹn, ọda bi uu. ¹⁶ Ekin-enan mulu, ibhiomen nin ikpea. ¹⁷ Ohẹ rebhe nọn mẹn bi ọhẹ rebhe nọn gbale ẹgua okhu ọna vae. Onan vae bhi ukotọ bhi obọ non si aba nọn si ukpa. Rẹji ọle, ufidenọ la ojebi ribhọ raamudi ufikie. ¹⁸ Osẹnobula nan zẹ nọn rẹ reman be nan biẹman, bhi ẹmọn si ẹmọanta, be ji iman da mọn ajẹjẹ rẹ ji ikpẹ ọhẹnhẹn si emi rebhe nọn ọle manlẹn. ¹⁹ Uwẹ lẹn ọnan, ibhio imẹn ni ikpia ni imẹn huẹmọnlẹn: Ji okhian ke ọno-okpia ni bhi ukhọnmi, fẹkẹle nọn rẹ tale bi ọki fẹkẹle bhi ẹkẹkhọlọ. ²⁰ Ramunde ẹkẹkhọlọ nọn sọ oria bha wenan bhi ilunọnsẹn nọn si Osenobula. ²¹ Bejọkidiario, muemi ebe rebhe kie bi ọni emi ebe ne bunbun. Miẹn bhi egbe nọn sẹ ọni emon nan kọle nọn nan sabọ min oriọn nọn sẹ fan. ²² Bha kie ene luọ ọni ẹmọnlen, ẹyi ene họnlẹn ọkpa, hamuegbe bha lu. ²³ Ramude ọnọin ki rẹ khin nọn kin ọnọn họn ọnẹ ẹmọnlẹn nọn bha rẹlu, iman ọkien bi ọno-okpia nọn fẹ ẹlo nọnsọleghe bhuughebe. ²⁴ Ofẹ egbe ghe, ọda hakhian, ẹgheni ẹgheni ọda yelea ebọle diayẹ. ²⁵ Okpa ki nọn, ọnọ ọria ni nọn gbale si umiẹnfan, ọki sẹyẹ ha lu riọ ọikiyi nọn rẹ kin. ọnọn họnlen nọn yealea, ọno-okpia nan ki mi erọnmọn bhi ẹkẹ ebọlulu. ²⁶ Onon ki rẹ riale ghe ọle ga nọn sẹn bi nọn gbo odẹ olamẹn nọn sọle ọmu ọkhọle nọn sọle lubi oga nọn sọle ihoho nọn. ²⁷ Oga non klhaile bi nọn si Osẹnobula man bi aba kirẹ kpa ene mọn aba bi enei mọn ọdọ ne ribhi ọbalọ, bi na rẹ muegbe khia bhi ọnangbọnan.