¹ Ẹmi Ipọọrụ, anijaaru Ijesu Ikristi ọnri ọnyara ami Itimoti shi Ifiremọni ọnri ọta ayi ọni ẹyi riọ gẹ aa mụkọrọ vaabẹ, ² shi Afia ana vi ọnyara ayi ọnyẹnẹ ọnri Achipasi ana vi ọkụrẹkụ vene yi ọnri ichọọchi anaa nyi iragụ ini ireshi awụ. ³ Ọiza ọfẹ ọnri ẹngwọrọ Oshomoshi Adayi ọnri Ijesu Ikristi Ananyiyi ọ si vi ayi awụ. ⁴ Ẹfi bo ọnim sii kụ Oshomoshi ami avọ. Mii tamayi awụ ini ozurenu ami. ⁵ Ma wụ inọpati osisi awụ ọnri ọdọwụ ọnụụ nyi ini Ijesu Ananyiyi ọnri osisi ọnụụ nyi yi anọdọwụ bo. ⁶ Maa tuozurenu ka iragụ ọdọwụ awụ ọnu weepe yi nyi ọ va nyi ụfụ shiẹtẹ yi ọyiyẹ ini ọiza bo ana yini akaakana ayi ini Ikristi. ⁷ Fụvọki ụjẹ vene shimi inẹ, ẹwụ nin ẹnyara ami, dim zẹ nyi ẹngwọrọ fụvọ osisi awụ nin ana si ọtụtụrụma anọdọwụ bo vanẹtẹ. ⁸ Fụvavọ, shọmẹdaka vi ki ma nyi ayọọvi ini Ikristi ki ma si ụmọ kaa yụ wụ isẹnọ vọrọ kụ wa mẹ, ⁹ tuavọ tuavọ, ẹmi Ipọọrụ adọzọkụ ana yini ijaaru, maa fụvọ osisi dipẹ yụ wụ nin, fụvọ Ijesu Ikristi. ¹⁰ Ọ nyi isa ọni mee fisue finụvọ awụ inọpati Onesimọsi ọnim si mẹ ozi ami ụmẹ ọnim si yini ẹba. ¹¹ Fụvọki ọ zi bidi nhi ọnọ bẹrẹ yụ wụ, ama, ọmẹyani, ọ si vara ọza ebebaani yi ẹmi ri ẹwụ. ¹² Ma tụ ọ varama vidawụ, ụmọviki ẹzẹnim ngwayi aani ọnọ vi. ¹³ Mi yeen si ki ma si ọ pe ẹngwụ doti ọọ zi mi ụtụ ini udi awụ, mmẹ fuvọ irenube ọiza yini ijaaru aani. ¹⁴ Ama, me zi si ki ma mẹ isọnsọnyi dụ waa ma sụvọ tụọ. Me zi si ka ọiza ọnụ waa mẹ o ve si vene ẹkẹẹka, ama mee si ki ọ fiini ọtụtụrụm awụ vẹ. ¹⁵ Ọ zụụ vi ki ẹwụ ri Onesimọsi vana shashi doti ọ zụ varama va ya pe wu poro. ¹⁶ Ọi kụ kụa vi ọrishi, ama dọọ si dashi funa ọrishi, dọọ si vara ọnyara awụ. Ẹzẹnim ngwụayi aani ono fufu vi yi mi, di ẹwụ vana zẹ ngwụayi aani funa ami ini ẹchẹngwụ ọnri ini Ananyiyi. ¹⁷ Fụvavọ, aaviki wa za mi vene ọnọfụụva awụ ini ụkọrọ anọdọwụ, tanụvọ dọ ọ vene ụmẹ vaa tanụvọọ dọ mi. ¹⁸ Aaviki ọ nyi ọshimi ọnọ mẹ shu wu navẹki ọ nyi ụta ọnọ rụ wụ, zaika tụmọbẹ. ¹⁹ Ẹmi Ipọọrụ ọnọ sụvọta ami chẹrẹ ẹ kim vee si wụ ụta ọnọ ra rụ wụ. Aivi ki maa tama wụ ayi ki ẹwụ nyẹmbẹ vana ri mi ụta, fụvọki irẹyi ọnim ka yụ wụ ọ dọ ẹshẹ awụ tụ. ²⁰ Ọọnyara ami, mẹ ọgụvọ yi mi ini Ananyiyi; navọ wa mẹ mi efufụẹngwụ ini ọtụtụrụma ami ini Ikristi. ²¹ Ma chẹrẹ iwe ọnọni shu wu fụvọki ma zi jọirẹka ini ọtụtụrụma ami kụ waa mẹ isọnim kụ wa mẹ. Ma yẹ ka ụ vaa mẹẹ funa isa ọnim fisue aani. ²² Mi ze sii si ku we teni irẹngwụ ọzọga ọnya tẹtẹ yi mi, fụvọki ma nyi iribatọ ka zirẹngwụ ozurenu awụ, a vaa si mi varama vaa yụ wụ. ²³ Ẹpafụrasi ọni ẹmi ri ọ gẹ vi anijaaru ini Ijesu Ikristi ki ma kụ wụ. ²⁴ Imakụ, Aristakusi, Idẹmasi ọnri Iruku anii gẹ vi ọmụkọrọ ọnya ki ma zẹ ki kụ wụ. ²⁵ Ọiza ọfẹ Ijesu Ikristi Ananyiyi ọ va ya bẹrẹ ifẹ awụ. Aami.