¹ Ini ọnẹnẹ viriviri, di arufa ọbani nin ọnri azẹku, shi ọyofi nini, bẹrẹ azẹkụ Iju bo, gẹeyi. Ẹ sụ Ijesu ụvọ, dẹ si ọ na. Dẹ si ọ ne chire Ipaireti ụvọ. ² Di Ipaireti fọ ọ ka, "Ẹwu ọnọ wa vi oshinọyi Iju nini?" Di Ijesu tuoshi ka, "Ẹwụ a ka avọ." ³ Di arụfa ọbani nini kụ irẹka ẹrụrụ ẹrụrụ ku Ijesu. ⁴ Ụpọsa di Ipaireti fọ ọ ka, "Ọzi nyi oshi ọnụ waa tụụ? Re irẹka renyi renyi ẹnẹ kụ za wụ. ⁵ Ama di Ijesu razi kụ tụ Ipaireti oshi, dọ vi isene shieyi. ⁶ Ini ẹfi Upe Ọpiparafu, Ipaireti vanaa si anẹngwa ọnya, ọni aza ree si, dọọ na a tụ yụ wa. ⁷ Dọva nyi ọzọnyi anaa shi Ibarabasi, ana yini ẹngwa bẹrẹ ẹnẹna gẹ wụ ọza, ẹ maa kụụ chire ijọva. ⁸ Di azọkọni ẹnẹ ve tu Ipaireti ki ọ mẹ isọnọ bidi mẹ yi ẹni. ⁹ Di Ipaireti voshi ka, "U wee si ki ma fụrẹ oshinọyi Iju ụvọ yụ wụ nin?" ¹⁰ Fụvọki ọ yẹ ki ayamkụ ọnọ mẹ ki arufa ọbani nin ẹ za Ijesu ve chire ọni ụvọ. ¹¹ Ama di arụfa ọbani ẹnẹ ne tu azọkọni ẹnẹ, dẹ tụwairẹkụ ki e nowu tụẹshẹ ka, akikọnọ Ibarabasi ana ra fụrụvọ yi ẹni. ¹² Di Ipaireti varama tu wa oshi, ka, "Sọnuu vee si ki ma si mẹ oshinọyi Iju nin aavọ? ¹³ Dẹ varama nowu tụẹshẹ, dẹ ka, "Kani ọ za ọchi avashi!" ¹⁴ Di Ipaireti va fọ wa ka, "Yere ọshimi ọnọ mẹ kẹ?" Dẹ varama nowu fuavọ ka, "Kani ọ za ọchi avashi!" ¹⁵ Ipaireti venee si ki ọ nọ mẹ azọkọni ẹnẹ inẹ shine. Fụvavọ, dọ fụrẹ Ibarabasi ụvọ yụ wa. Dẹ nyi Ijesu ijampa, di Ipaireti si o chire wa ụvọ ki ana kani ọ za ọchi avashi. ¹⁶ Di ashoja nin vaa tụọvidi na ngwụ ini ọba ijọva, dẹ shi ashoja anavọ bo vabẹ. ¹⁷ Ẹ si auru oshinọyi anyẹrẹ chire Ijesu, de ku o okurẹsụ ikeyi. ¹⁸ Dẹ vẹrẹ a jiọsiya, dẹẹ kụ ọ, dẹ ka, "Oshinọyi Iju, yaa kụ wee!" ¹⁹ Ẹ nya a ọchiọkẹtẹ inẹẹsụ, dẹ jatẹ ku o, de kuẹtẹ isiya yọ vene ki ẹ naa fẹkẹ ẹ. ²⁰ Ẹ mẹ mẹisiya da, dẹ tụ auru oshinọyi ipọpụrụ ene chire e, de ve chire e auru ayaani yọ, dẹ vaa tuọvidi na ngwụ izẹna va yaa kani ọ za ọchi avashi. Aa kani Ijesu za ọchi avashi (Imt. 27:32-44; Irk. 23:26-43; Ijọ. 19:17-27) ²¹ Dẹ si ẹkẹka za Isaimọni ana vi ada Anẹksanda ọnri Irufọsi, ọ mẹ furi irẹkụra ọsa aa paraafu, ki o chema ọchi avashi Ijesu. ²² Di ashoja ẹnẹ za Ijesu na ngwụ irasha ọnaa ashi Igọrigọta (irasha anaa shi ọchụkụ irẹsụ). ²³ Ẹ si eche iwaini ọna vafura irafọnọ ana rama misa ziọza, anaa shi imaya, yọ, ama do yi ki onozi fu. ²⁴ Ẹ kani ọ za ọchi avashi, dẹ si ita aani che ụshii, doti ẹ siọ yẹ aka ene vee tu ashoja ọzọọza, dẹ ga a shi ẹngwụ avọ. ²⁵ Ini wakati ọfuta ẹnẹ si kani ọ za ọchi avashi. ²⁶ Dẹ chẹrẹ ivi ẹnẹ ki ọ ri tuni ọpari ka, "Oshinọyi Iju nini." ²⁷ Di ẹ kani oyi ẹẹva bẹrẹ ẹ tụni ọch avashi, ọnya yini akụvọri aani, di ọsa yini akụvọfa. ²⁸ Aani ọni irẹyi ọni iwe ọnini ka, ka, "A zaika bẹrẹ ẹnẹne du ofi," mẹ mẹ sẹ. ²⁹ Di ẹnẹna zioze parafu a kụ ọ fụ, dee sheni irẹsu ki ọ vọvọ sẹrẹ, dẹ ka "Ihin! ẹwu ana kaa ka u vee wu itẹmpụrụ, dụụ varama da a ini ẹkụshi ẹẹta, ³⁰ dọ ẹngwụ awụ tụ, du we chi shiẹtẹ fini ọchi avashi!" ³¹ Avọ ọni arụfa ọbani nini, shi oyofi nin ẹn mẹ zẹ gẹ a jiọisiya ka, "Ọ dọ azẹnẹsa tụ, ama ọi zụ dọ ẹngwụ aani tu. ³² Navọ di Ikristi ọna vi oshinọyi Isrẹni, o chi vẹ fini ọchi avashi doti ye re, di ya zụ dọọ wụ," shi ẹnẹna kani za ọchi avashi bẹrẹ ẹ vana za ji jiọisiya. ³³ Ụmẹ ono tu iwakati ọfushinọnyi, di ẹtẹ bo shoozi na ngwu iwakati ọfụshinna. ³⁴ Ini iwakati ọfushinna, di Ijesu si ọngwẹ tụẹba, do nowu, ka, "Ẹloi, Ẹloi, lama sabachthani?" Ọnọ vi ka, "Oshomoshi ami, Oshomoshi ami, ọmẹzi dụụ yi mi tẹtẹ kẹ? ³⁵ Azẹnyi ini ẹnẹna dinẹ tụzọ mẹ wụ irẹyi ọnọni, dẹ ka, "Re ki ọọ shi Enaija." ³⁶ Di ọzọnyi sẹ zuechi na ka eche ana vẹrẹyi, dọ va a shi ikanka, dọ va ka ọchiọkẹtẹ ngwụ ọ, dọ tanaa yi Ijesu ki o fu o. Di ọnọru ọnọ ka, "Di ye re aaviki Enaija vee chi o shiẹtẹ." ³⁷ Inaani, di Ijesu nowu tụẹshẹ, do su. ³⁸ Di ita ana si ji itẹmpụrụ, sha tụ oze ẹẹva, fụrẹ ẹbẹba na ngwu ẹtẹẹtẹ. ³⁹ Ẹfi ọni ọga ashoja ọna dinẹ tụni ọvidi Ijesu re o meme su, dọ ka, "Inirẹiza, ọnọrụ ọnọni vi Ozi Oshomoshi." ⁴⁰ Ọ nyi anyẹnẹ ẹnyi ana zẹ yi izọ anaa taneyi re fụri irasha ọgọdọ. Ẹngwu aza veni Imeri Imagdarini, shi Imeri (ọnyi Ijemsi ana vi ozueyi ọnri Ijose), shi Isaromẹ. ⁴¹ Ẹfi ọ nọ yi Iganini, ẹẹ vatụra a, dẹ fẹkẹ ẹ. Anyẹnẹ ẹrụrụ ọsa ẹ zẹ ki kụafụza shirẹ vẹ Ijerusanẹmụ. ⁴² Oruva me tu, fụvọki ishọ ana sii teniẹtẹ tẹtẹ, ọmẹviki ineyineyishẹ aani ọnọ vi ọkụshi Isabaati, ⁴³ di ọnọru ọnyi anaa shi Ijosefụ ani Aramatiya vẹ izọ. Ọza ana si ụbani ini ijọva irẹkura, dọọ nyi irebatọ ijọva Oshomoshi ọnọ vi. ⁴⁴ Dọ si ayiọvi ne tu Ipaireti, do fisue ki a si oku Ijesu yi ọni. Do shi Ipaireti eyi ki Ijesu ọ dinẹ su da; dọ shi ọga ashoja ọnọ, dọ fọ ọ ki Ijesu we su da. ⁴⁵ Ọga ashoja ọnọ mẹ kaa yi Ipairetu ki Ijesu o su da, di Ipaireti si oku aani yi Ijosẹfụ. ⁴⁶ Ijosẹfụ ọ shi ita isiriki tẹtẹ da oshẹtẹ. O chi o fini ọchi avashi, dọ sita isiriki ọnọ chire okuma, do nee tuni irikuta ana chi tuni irẹta. Dọ tụ irẹta ọsiri ne ku irenu irikuta ọnọ. ⁴⁷ Imeri Imagdarini, shi Imeri ana vi ọnyi Ijosesi, e re izene ne Ijesu tụ.