¹ Amẹ mi isẹnẹ bo da, di Ijesu zẹ si ẹngwu zụ eziafụ aani ini irefụ Itiberiyasi. Ọ mẹmẹ si ẹngwu zụ yi. ² Isaimọni Ipita ọnri Itọmọsi anaa shi Ididimọsi, shi Inataniyẹni ozi ani Ikena inẹtẹ Iganini, bẹrẹ ezi Izebedi ọnri eziafụ Ijesu ẹẹva ọsa ẹnẹ gẹ ya. ³ Di Isaimọni Ipita kaa yi wa ka, "Maa na zi isenyi ini irefụ." Dẹ tụoshi ka, "Ẹyi nyẹmbẹ vaa vatụra wụ." Dẹ nangwụ ẹpa na. Ama poro inaafụ ọnọ, ẹ zi ree isenyi za. ⁴ Eyi mẹ ni, ini ọnẹnẹ, di Ijesu dinẹ tụ ụtọ irefu ọnọ. Ama eziafụ ẹnẹ, ẹzi yẹ ka Ijesu yọ. ⁵ Di Ijesu ka yụ wa, "Ẹwụ nin ezi ọmụsha, ụwa nyi isẹna vaa zụ ri?" de tụoshi ka, "Eeye." ⁶ Dọ ka yụ wa ka, "Ne asha awụ nini ngwụ aka ụvọri ẹpa ọnọ, ụ vaa zi isenyi nini." Irẹiza ẹmẹ ne asha ọnọ ngwụ enyi, di asha anini zi isenyi ọrụrụ, netu ka, eizụ tụra a. ⁷ Di oziafụ ọni Ijesu sirẹyi aani kaa yi Ipita ka, "Ananyiyi yọ." Isaimọni Ipita mẹ wụ ka, Ananyiyi yọ, do chire aụrụ aani ọnọ vidi tụ tẹte, do ji ngwụ enyi. ⁸ Di eziafụ ọsa nini yini ẹpa, dee tụra asha ọnri isenyi ọnọ, (fụvọka ee gụrẹ ụtọ-ụbobo. Ọpati afụ irẹka ẹchẹshi nangwu ụtọ-ụbobo ọnẹ ya). ⁹ Ẹ mẹ jinẹ fini ẹpa vaa ngwụ ụtọ-ụbobo, de ri ira aremi, dẹ kụ isenyi shi ini ira ọnri ivụrẹdi dẹ ri isari. ¹⁰ Di Ijesu kaa yụ wa ka, "Si vẹ ini isenyi ọnụ za nini." ¹¹ Di Isaimọni Ipita shirẹ, do tụra asha ọnọ jine fi inenyi, ọnri isenyi oshishi. Isenyi ẹchẹshi-rẹbẹrẹva-rẹwurẹta ẹnẹ za, tụavọ-tụavọ asha anini ọzi naa. ¹² Di Ijesu kaa yi wa ka, "Va ri isari ọnẹnẹ nini." Ọzi nyi eziafụ aani ọnyọnyi ana fọ ọ ka, "Ẹnụ vi kẹ?" Ẹẹ yẹ ka Ananyiyi yọ. ¹³ Di Ijesu dọ vẹ, dọ si ivụrẹdi ọnri isenyi ọnọọ yụ wa. ¹⁴ Ụpọfụta ọni ijesu si ngwụ zụ eziafụ aani vọnọ ọmẹ shaa fini isụ da. ¹⁵ Ẹ mẹ ri isari ọnẹnẹ da, di Ijesu fọ Isaimọni Ipita ka, "Isaimọni ozi Ijọọnụ, ụ we sirẹyi ami funa azẹnẹni anavọ me sirẹyi ami?" Di Ipita ka "Ananyiyi waa yẹ ki mee sirẹyi awu" Di Ijesu kaa yọ ka, Waa si isari yi atẹmẹ ami. ¹⁶ Dọ zẹ fọ ọ ụpọfụva ka, "Isaimọni ozi Ijọọnụ, ụ we sirẹyi ami?" Di Ipita tụoshi ka, "Ananyiyi, Waa yẹ ki mee sirẹyi awụ." Di Ijesu kaa yọ ka,"Si eyi pe atẹmẹ ami." ¹⁷ Dọ fọ ọ ụpọfụta ka, "Isaimọni ozi Ijọọnụ, ụ we sirẹyi ami?" Di ọtụtụrụma Ipita dụ, fụvọka Ijesu ọ fọ ọ ini ụpọfụta ka, "Ụ we sirẹyi ami." Dọ ka, Ananyiyi, Waa yẹ isa bo, waa yẹ ka mee sirẹyi awu." Di Ijesu kaa yọ "Si isari yi atẹmẹ ami." ¹⁸ Irẹiza maa kaa yụ wụ, ụ mẹ yi ini ọmụsha, ụụ kụẹnya dụ ni izẹnẹ zewụeyi, ama, waa vi ọzọkụ, dụụ gana avọ, di ọzẹnẹsa kụẹnya shi wụ ẹngwụ, dọ si ụ aa ni izụ ree zi si kụ wa nọ. ¹⁹ Ijesu ọọ maan ka, doti ọ sio ̣zụ ẹngwụ isụ ọni Ipita vee sụ, ana vaa si ụga yi Oshomo-shi. Ọ mẹ maan kaa da, dọ ka yi Ipita ka, "Vatụra ami." ²⁰ Ipita ọọ vareyi do re ka oziafụ ọni Ijesu sirẹyi aani aa vatụra ẹni. Oziafụ ọnọni ọnọ si ẹngwụ vazirẹ Ijesu izi ẹ yaa ri isari, dọ fọ ka "Ananyiyi, ẹnẹ vaa si ụ chire aza ụvọ kẹ?" ²¹ Ipita me ree, dọ fọ Ijesu ka, "Ananyiyi, sẹnẹ ọza ọnọni vaa mẹ." ²² Di Ijesu kaa yọ ka, "Mee si kọ yi inaani netu ẹfi ọnim va si vẹ, yere ana gẹụ inaani, vatụra mi." ²³ Di irẹyi ọnọni si gara shi inakaakana ẹnyara nin, ki oziafụ ọnọ o zee su. Ama Ijesu ọ zi ka yi Ipita ki oziafụ ọnọ o zee su. Ama, mee si ki ọ yi izọ netu ki maa varama vẹ, yere ana gẹụ." ²⁴ Ọnọni ọvi oziafụ ọna divenụ isẹnẹni, dọ chẹrẹ tẹtẹ, yaa yẹ ka iveenụ aani vi irẹiza. ²⁵ Ijesu ọ zẹ misa ọrụrụ ọsa, ọnọ vi ka aa chẹrẹ ẹnbo tẹtẹ, me zi ro ki ẹshẹ bo vaa zụ dọ iza raa chẹrẹ tụ