¹ Ọmẹyani, ẹẹnyara mi, tụozụrenu yi yi, ka irẹyi Ananyiyi ọ fira ọnri dọ vaa zụ nyi ụga, venebiri ọmẹ ya yụ wụ nini. ² Wa tụozụrenụ doti a zụ dọ yi tụ fini isa ọshimi ọnri azẹshimi, fụvi arimanyi ọdọwụ. ³ Ama Ananyiyi vi ọni rẹiza, ọna vaa sụ wụ dinẹ, dọ zẹ sere wụ nin fini ụvọ azẹshimi. ⁴ Yaa nyi ọkụayitụra ini Ananyiyi, inọpati awụ, kụ gẹ̣ vaa mẹ ọnri dụ zẹ mimẹ isa bo ọnim si ụmọ ka tẹtẹ yụ wụ nin. ⁵ Ananyiyi vaa zụ wụ mẹ ini ọ̣tụtụrụma osisi irẹyi Oshomoshi ọnri ọsẹngwụdọ ayi Ikristi. ⁶ Yaa si ụmọ yụ wụ nini ọmẹyani, ẹẹnyara mi, ini irẹsha Ananyiyi Ijesu Ikristi, kụ wa kava nẹshẹ yi ẹẹnyara ana razi nyi ụkọrọ ẹnẹ mẹ, dẹ razi vatụra isẹni si shẹtẹ, ọnụ dọ fini ụvọ ayi nini. ⁷ Fuvọki ẹwụ nin nyẹmbẹ ọ yẹ ka ọsẹrẹ nini kụ wa fama yi. Yaa zi ra pe wụ nin venebiri ọza ana ra zi nyi ọzẹngwụsụ. ⁸ Yaa zi ri isari ọzọnyọnyi, dọviki yezi sụta aani. Akikọnọ, ya mụkọrọ ọọdu ọnri irafu ini ẹngwu ọkata ọnri iforifo, dasi na vi ẹnya yi ọzọnyọnyi awu nin. ⁹ Yaa mẹ ẹnẹni ọzivi ki ya zi nyi ụmọ tura wu nini. Akikọnọ, ya mẹẹ di ya zu si ọtẹrẹwa ene zoza tẹtẹ yụ wụ nini, dụ wazụ fama yi. ¹⁰ Ẹfi ọni ya pe wụ, ya si ụmọ yụ wụ nin, "Ọ nyi ezene re zi si kọnọ mụkọrọ, asọ ri isari." ¹¹ Fụvọki ya wụ ki azẹnyi vana zụsẹ ụkụmi inakaakana wụ nin. Ẹma mụkọrọ, ama dẹ nyi ẹngwụrẹyi zizi. ¹² Ẹngwụ azẹnẹ, ya sụ ụmọ ka yụ wa ini Ananyiyi Ijesu Ikristi, kẹ mụkọrọ asẹkụ sụọkụ, dẹ zụ ri isari yi ẹngwa anini. ¹³ Ama ẹwụ nin, ẹnyarami, a siọ tụni ọmimẹ anasẹrẹ. ¹⁴ Aaviki azẹzi si irẹyi ayi mụkọrọ, ana chẹrẹ tụni iwe ọnọni, seyi za ẹngwụ azẹnẹ, dụ wa kavana yụ wa, doti ụshi ọ zụ nyụ wa. ¹⁵ Asụ za wa ọnivi, ama kọ wa ọnọ vene ọnyara wụ. ¹⁶ Adayi ẹnẹgwọrọ, ọvaa si ẹngwọrọ yụ wụ inẹfi bo, inoze bo. Ananyiyi ọya bẹrẹ ẹwụ nin bo. ¹⁷ Ụkwụ ami yi, Ipọọrụ, ziri ụvọ ami, ọnavi ọtẹrẹwa iwe ọnim chẹrẹ bo. Aavọ mmẹ chi chẹrẹẹ. ¹⁸ Ọiza-ọfe Ananyiyi Ijesu Ikristi ọya bẹrẹ ẹwụ nin bo.