1 Bulus tla kənandə fe kətləm Yesu tə wanmanda Timatawus, kəmdi Filimon tlawurmən tla yakhtə mən tə tla natmǝn khur ter arta. 2 Ta Afiya wanmanmǝn tə Arkifus tlawur teryamən mǝt yaanda, tə takət nafchi Farta fe tlə nggomchə khaa wiryo. 3 Kafata tə khas-khas kəta kənsi kəmɗo tla ɓach məɗi Farta chənmən, tə chən mən Yesu Almasihu. 4 Chəkwun Farta tlə nachi chan usoko Farta kəni kuɗək wunchə khur sitinchi. 5 Səkenchə kusetə mbənfattiyo tə fərkityo khur chənmən Yesu tə kwaan wanman chənmən fə para mbandi Farta. 6 Nggət sita wumində yo khur fərkityo kən tə alkət fa kə bə tə sən chəka kaami nat tla ne patlangmən khur Almasihu. 7 Mbəninchə fat kaan tə alkətfa kətləm yakhfat'yo, kətləm khuneen wandəkaɗachi fə fər kitchə khaa wanmana. 8 Kətləm kət nda'an alkətinchəs tla ne khur Yesu kə nduchiwa kə chin ɗənɗi kəmchəs ndati wa kə chin. 9 chəka kəɗu kətləm yakhfata, yakhinchəs kə siyuchi nggət Bulus sertə nefe tla ne khur kubutla nakanya kətləm Yesu kristi. 10 Nggət chəkhowun Onisimus wa'inchi tla manandi tləkhaɗi nati khur kubutla. 11 Chokh ngga kaa waa nakan məɗiyo wa, nakanya chə kaɗ kə kaa nefe məɗiyo tə məɗinchi. 12 Tləninchə anchə kaɗ kəmɗo tla ne khur wanɗəkanɗatinchə nde. 13 Yakhinchəs kə kəsi anchə khar məɗinchi kən kəsi tarchəsi, nawakosi naki khur kubutla kətləm kət ndikti farta. 14 Yakhwi kə chi ən ngga tə səndə `yosə wa.Yakhwisə kaa ter`yo kən kə waat wa, kən khur yakhti`yo. 15 Ma`ya daan chəch chaktəwun khaa khur wan mənchə ngguiit ma'no nggərandə kaɗ kə fere. 16 Nakanya pa'wa nat kə mafatawa, pəɗanchə mafat khaa, wanmanda tla yakhtəmən tla pədanchə kəɗu khaa kəmɗi`yo khur natkəta tə pad chənmən Farta. 17 Ma chichən kə tlawur ter`yo, tlu anchə kə ndenwa nggəta. 18 Ma chutə nɗənɗi nawaktchə ndichan, ndu tənen para anchi təruwa nachan ɓəratinchi. 19 Nggət Bulus yarach tə kherinchi, ni tiyuta.Ngga kə nduchiwa chə para nenchi wa. 20 Ə wanmana chitən kakətfa khur chənmən kə fərichin yiptə wandəkaɗata khur Yesu almasihu. 21 Səninchə wa tlə chəcho ɗəchəɗi yakhti, nda'an chəch yarutisi, ə sənichə wa no chət kə pəɗanchə tla kha chəkhati. 22 Chəka kəɗu nakanya takhsitən mət məndəsi. Kətləm kət ə ɗəpani wa təmɗi sitə'yowun nafe nggəritəkaɗi kəmɗiyowun nan nə talla wa. 23 Tlawurnə Abafras khur kubətla khur Yesu kristi ndu əna. 24 Kəɗu paɗ Markus, Aristarkus, Dimas tə Luka tlawurchə terinchi. 25 Kafati chənmən Yesu Almasihu kə chok tə semet'yo, kə chok kəɗu.