¹ Yahuza mafati Yesu almasihu paɗ wanman Yakubu, kəmɗi fe 'yatfe fe yakhtəfe ə khur Farta chənmən, fe ne kə tacha'an kətləm Yesu kristi ² Kalra'an khaa khur wanɗəkaɗacha tə kəɓi kaɗi tə yakhra'an kə welkha ə khurwun. ³ Fe yakhti ngət jekhfatkhawa kə yarowunchisi kə tlət wunchikaɗ nat, chokchan waat kə mbo'onwunchi kə ɗar fərkit tla frandəfe fə tərmbancha artə ndak ngə chekta'an suwa. ⁴ Fowun nafchəs 'yirchə kə khur nggomndə yowun, nachandə kəɗ səɓtə nafchəɗi yara Annabawach kə ɗar nandə chokh - tlə cha'anchandə əna leckchə kaɗi kə təɓrandə kakəti Fartə kaɗi kə ɓəɓifa fəlaukəta. Tə kəɗuyu tlə astəndə inde tə ənɗi ne 'ke'ke kə ɓəra chənmən Yesu Almasihu. ⁵ Yakhchisi kə kuɗukowuchi chəka nakanwa tapi ə sənwun əna ta'an, tə ndatwa Farta ə tlət nafchə kaɗi ə khakhi Masar, təkərsata'an tə kankanfe kaɗ fərwakchə kit ⁶ Paɗ fə tlənchi Farta fe kəswakchə man kutraktə'yandə khar, paɗ malkandə mət choktə'yanda kha tla tang tang kəs Fartə tandə khar khur chalala kəfere əkhur wutla kətləm kapa fartə chakme. ⁷ Nachandə kəɗ saduma tə Gomarata mərəbchəɗi tauradach kha fe fərchə indəyandə kə fəlaukəta nakandə yakhɗəchəɗi nawakchə kə ənachita. chandak fe əna fər sakta'an fe təp chə watfa tla kəfere. ⁸ Kəɗu paɗ fə səna'chəini tandə səɓandə fat'yandə kaɗi tandə njər kuturcha, paɗ tandə mbu səɓtə ɗəcha kə ɗar fe manandarfe . ⁹ Chəka mikailu kapa tlə tləndi Farta, Fartədi natən as ində tə khwe'ere ke ɗar mərtə Musa, sənwa mba səɓtə ndiktə kə chakanfe mee kə ɗaran wa. Minni kuɗu ndakanwa, "Malan Fartə kə yanuchi?" ¹⁰ Paɗaa nafchəini naka ndə ɓat tə səɓtə ndik che ke dar ɗənɗi sən waktə nda. Nafchə ini əna chət yanda kəɗ ɗəparacha, tandə ɓan fat yandə mərtəkadi. ¹¹ Ai 'yanda! kətləm parində mbandi kainu paɗ ə khəmdi kə khə pakəti Balamu kətləm mbəs chekte. Məmati ndə kaɗ khur tla'a ndə nafchəfa we' tə i kora cha. ¹² Ɗəchəini mbaru ni ə wubta ə khur homba yakhraan. Ngun ɓənfa yakh ra'an ngun witə kha ngə khartəfatsuwa ngə lekətsuwa, nakandə fəran indiyadə ɗəsəmnda. Husamba nakan tla nawak tə 'yere khuran tla pəttə rənna, ɗəfchənakanda tla nawak tə wanchəs ɓəryandawa, məmatach chəɗi ɓətchəkes tə tlarcha'an. ¹³ Tandə wanfənchi 'yeme khur khawurta, tlə nachandə khuptə kes khur khartifat'yanda. kəd wanɗəricha welchəkhaa ɓat fe ta'anchi kə khur wutlə simsim kə fere. ¹⁴ Anihu nefe tla nach kə muɗata'an kərsə Adamu, mbutə ɗənɗi nach səɓta kəmɗiyanda ndatwa, "Ɗəpandən chənmən nan ɓat tə chəɗ chəɗ cha'an yan kaan. ¹⁵ kətləm kə chakanmee chəkawun i paɗ nan nguɗekh tla nat tlə fərwakchə manda tla chətnda ə mbandi kəm wakchəsi tə ndikche fe nach haɗchan tla tləna fə ɓəɓifach mbutə kə ɗaran. ¹⁶ Fenni fə tara micha, fə khurumənchə, tə fe tlə nach para ɗəchəɗi yakhtənda khur ɓəɓifata, tlə tlarchəkhaa kokhaɗicha, fə manincha, fə yakh incha kətləm chekti indyanda. ¹⁷ Ngun təɗi yakhti kə kuɗuk wun ndikchi fə ɓas ndikti Yesu Almasihu mbowunndə ndə chokh . ¹⁸ Ndowunchandə wa, "Ə khur ndukwa wanməncha'an nafe mbəs fə chan me nafchə khaa,fe tlə nach yakh ɗəchəɗi nawakchə manandə Farta." ¹⁹ Nafchə'ini fə chakandə inchi nafchə khaa ni,paɗ tandə wanchi khessi paɗ nggə semet'yandəs wa. ²⁰ Nggun fe yakhti, tənaman ində'yowun ə khur fərkit'yowun tla nach ndi'chan, paɗ kənowun sitə ə khur semet tla nach chəɗ chəɗ. ²¹ Kəsam ində'yowun khar ə khur yakh Farta kənowun pək fartəɗi natmən khaɗandə Fartə fa tla tlə ɓach tə səsingndə kə kwekəchi. ²² Kətl khaɗowunchə fe fə pe'chə fərwandə ində'yandə chat wa. Kəsaman fowunsə təmɗi kətandat kes khur wata. ²³ Kəmɗi fowun paɗ kə khaɗowunchəndə fa tə saktat fa, kə karwun chəka kapachəɗi nach fə'yanda. ²⁴ Nakanya kəmɗi fe na alkət'yandə si kə 'yatowun chət wansartə kha paɗ kə ɗəfwunchə kə tlarwun kha əpangngən tlə manda choktə'yan, ɗənɗi nawaktu 'yarata tə paɗ mbən fatfə kaan, ²⁵ Kəmɗi Fartə wanɗengtute tlə tlət mənchi təmɗi Yesu Almasihu chənmən, cha'təs tə manda tə kutərakta, tə alkəta kə choka, kə fartə'ini nat, nakanya tə kə fere, kə chok kəɗu.