¹ Kyakitikire ukuti pa numa imfumu yaikere mu ng'anda, kabiri pa numa Yahweh amupere ukutusha ukufuma ku barwani baiko bonse abaishingurukire ² imfumu yasosere kuri Natani kasesema ati, ''Bona, ndeikara mu ng'anda ya mikedari, rero imbokoshi yakwa Resa yaikara mwi tenti pakati.'' ³ Eryo Natani asosere ku mfumu ati, ''Kabiye, kakite ifiri mu mutima obe, pantu Yahweh ari na webo.'' ⁴ Nomba ubushiku ubo bwine ikyebo kyakwa Yahweh kyaishire kuri Natani, akiti: ⁵ ''Kabiye no kweba Davidi umubomfi wandi ati, 'Ifi efyasosa Yahweh ati: Bushe webo kuti wankurira ing'anda ku kwi karamo? ⁶ Pantu nebo ntaikarapo mu ng'anda ukufuma pa bushiku naninikire abantu bakwa Israeri ukubafumya mu Egypto ukufika na buno bushiku bwa rero; rero, nebo naikarirafye ukwendauka mwi tenti, nge kyakwikaramo. ⁷ Mu nkyende shonse isho nebo nalikwendauka na bana bakwa Israeri bonse, bushe nebo naritarire sosapo ikintu kuri umo uwa mu ntungurushi sha bena Israeri abo nebo nasontere ukukyema abantu bandi Israeri, ukweba ati, ''Kinshi mwebo tamwankurira ing'anda yami kedari?''' ⁸ Eryo nomba, eba Dabidi umubomfi wandi, ifi efyo Yahweh uwa miraro asosa: Nebo na kusendere ukufuma ku mpanga ya muremfwe, ukukufumya mukukonka impanga, pakuti webo ube intungurushi pa bantu bandi Israeri. ⁹ Nebo nari konse uko webo wareya. Nebo nariputura na barwani bobe bonse ukufuma ku kinso kyobe. Nomba ndi nokukita ishina ryobe irikuru, nga amashina ya bakuru bamo aba pano isonde. ¹⁰ Ndi no kusonta inkyende ya bantu bandi Israeri no kubarimba kurya, pakuti bena bekare mu nkyende iyabo umo tabakabasunkanye na kabiri. Abantu imbifi tabakabakyushe, ¹¹ nge fyo barekita pa kutampa, ngefyo bena bakitire ukufumafye ku nshiku isho nkonkomeshe bakapingura ukuteka pa bantu bandi Israeri. Nomba ndekupera ukutusha ukufuma ku barwani bobe bonse. Nakukirisha, nebo, Yahweh nasosa kuri nebo ukuti nkakukurira ing'anda webo. ¹² Iryo inshiku shobe shikafikirisha nobe ukasendeme kuri ba wiso, nkemya umwana obe ukakukonkapo uyo ukafuma munda yobe, kabiri nkapampamika ubufuma bwakwe. ¹³ Ena e ukakurira ishina ryandi ing'anda, kabiri nkapampami ikipuna kya bufumu bwakwe umuyayaya. ¹⁴ Nebo nkaba wishi kuri ye, na ye akaba umwana mwaume wandi. Eryo abembuka, nebo nkamukanda ne nkonto ya bantu kabiri ne mpumo sha bana baume ba bantu. ¹⁵ Rero ikipangano kya kitemwiko kyandi takyakafume pari ye, ngefyo nakifumishe pari Shauri, uyo nafumishe pa kinso kyobe. ¹⁶ Ing'anda yobe no bufumu bobe fikaba fya kishinka ku kinso kyandi, ikipuna kyobe kikapampamikwa umuyayaya.''' ¹⁷ Natani asosere kuri Davidi no kufisha amashiwi yonse aya kuri ye, Na ye amwebere parwa kimonwa kyonse. ¹⁸ Eryo Davidi imfumu aingire no kwikara ku kinso kya kwa Yahweh no kusosa ati, ''Ninebo nani, Yahweh Resa, kabiri kinshi ing'nda yandi pakuti mwebo mwandetara ukufika kuno? ¹⁹ Nomba iki nakyo kyarikyepere mu menso yenu, Shikuru Yahweh. Rimo mwebo mwarerandapo pa ng'anda ya mubomfi wenu pa nshita ntari iikesa, kabiri nebo mwarindangire ne nkuriro ku ntanshi, Shikuru Yahweh! ²⁰ Finshi fimbi nebo, Davidi, ndesosa kuri mwebo? Mwebo mwarishibo mubomfi wenu, Shikuru Yahweh. ²¹ Pa murandu wa fyebo, kabiri pakufikirisha kufwaya kobe, webo epo kitira ifi fintu ifikuru no kufisokorwera ku mubomfi obe. ²² Eikyo webo uri mukuru, Shikuru Yahweh, pantu takwaba uwaba nga webo kabiri takuri Resa ku rubari robe, ngefyo twayumfwirire ku matwi yesu. ²³ Bushe ruko nshi ururi nga bantu bobe Israeri, uruko rumo panwe sonde uro webo, Resa, warubura we mwine? Webo wakitire ifi pakuti bena bakabe abantu bobe we mwine, ku kuipangira ishina we mwine, ku kukita ifikuru kabiri ku mikitire ya kutinisha ku kyaro kyobe. Webo watamfishe inko no tumirungu twabo ukufuma ku bantu bobe, abo webo warubwire ukufuma ku Egypto. ²⁴ Webo wapampamike Israeri nga bantu bobe umuyayaya, kabiri webo, Yahweh, wari Resa wabo. ²⁵ Eikyo nomba, Yahweh Resa, reka ikirayo ikyo webo wapangire ikyakumine umubomfi obe na ba ng'anda yakwe kipampamike umuyayaya. Kita ngefyo webo urandire. ²⁶ Reka ishina ryobe ribe irikuru umuyayaya, pakuti bakasose ati, 'Yahweh uwa miraro e Resa wa bena Israeri,' iryo ing'anda yandi, Davidi, umubomfi obe aba uwapampamikwa ku kinso kyobe. ²⁷ ''Kuri webo, Yahweh uwa miraro, Resa wa bena Israeri, warisokorwere ku mubomfi obe ukuti webo nkakukurira ing'anda. E apo pene nebo, umubomfi obe, asangiro ku kosereshiwa ku kupepa kuri webo. ²⁸ Nomba, Shikuru Yahweh, ni webo resa eryo ifyebo fyakishinka, kabiri webo wapanga iki kirayo kya bune ku mubomfi obe. ²⁹ Eryo nomba, reka kikusekeshe webo ku kupara ing'anda ya mubomfi obe, pakuti yena kuti yakonkanyapo ku kinso kyobe umuyayaya. Pantu webo, Shikuru Yahweh, mwebo mwasosere ifi fintu, kabiri ku maparo yobe ing'anda ya mubomfi obe ikaparwa umuyayaya.''