¹ Eryo Ahitofere asosere kuri Absaromu ati, ''Nomba reka nsare abaume amakana ikumi na yabiri, eryo narayima no kufurumuna Davidi ubushiku. ² Naraisa pari ye iryo afirwa no kunaka eryo nkamupapusha no mwenso. Abantu abari na ye bakabutuka, eryo nkataasha imfumu fye yeka. ³ Nkabwesha abantu bonse kuri webo, nga na bwinga ku murume wakwe, na bantu bonse bakaba no mutende muri webo.'' ⁴ Ifyo Ahitofere asosere fyasekeshe Absaromu na bakaramba bakwa Israeri. ⁵ Eryo Absaromu asosere ati, ''Nomba kuta Hushai umwina Akite, na ye, kabiri reka tumfwe ifyo arasosa.'' ⁶ Iryo Hushai aishire kuri Absaromu, Absaromu arondorwere kuri ye ifyo Ahitofere asosere kabiri aipwishe Hushai ati, ''Bushe tukite ifyo Ahitofere asosere? Nga teifyo, twebe ifyo waratupanda amano.'' ⁷ Eikyo Hushai asosere kuri Absaromu ati, Amano ayo Ahitofere apere iyi nshita te yasuma.'' ⁸ Hushai arirundirepo ati, ''Nawishiba ba wiso na baume bakwe bari baburwi bakosa, eryo barirura, eryo baba kwati ni bere uwakakwa mu mpanga. Bawiso mwaume wa burwi; tarare na bashirika ubushiku. ⁹ Bona, nombarine nafisama mukirindi nangura mu nkyende shimbi. Kikakitika ukuti iryo bamo abaume bobe baipaiwa pakutampa kwa ku taasha, ukuti onse uukakyumfwa akasosa ati, 'Ukwipaiwa kurekitika mu bashirika abakonka Absaromu.'' ¹⁰ Eryo na bashirika barisarapuka, abo imitima shaba kwati ni nkaramo, bakatina pa murandu Israeri onse naishiba ukuti wiso mwaume wa buramba, eryo ukuti abaume abari na ye barikosa sana. ¹¹ Eikyo na kupanda amano ukuti Israeri onse bafwire ukukorongana pamo kuri webo, ukufuma ku Dani ukufika ku Beresheba, abafura kwati mu kyanga uwaba ku ruramba rwa mu mana, eryo e kuti mwingaya mukurwa mu buntunse. ¹² Eryo tukesa pari ye konse uko e ngasangwa, no kumufimba nge kime ikireponena panshi. Tatwakashepo umwaume uuri onse, nangura mwine, uwa mweo. ¹³ Nga abutukira mu musumba, eryo Israeri onse akareta intambo kuri uyo musumba no ku kitwara mu mumana, mpaka pakaburwe nangu ribwe irinono iryakusangwapo parya.'' ¹⁴ Eryo Absaromu na baume bakwa Israeri basosere ati, ''Ukupanda kwa mano yakwa Hushai umwina Akite kwa wa mapo ukukira Ahitofere.'' Yahweh arisubire ukukana kwa kupanda amano yakwa Ahitofere ukusuma ku kureta ubonaushi pari Absaromu. ¹⁵ Eryo Hushai asosere kuri Zadoki na kuri Abiata shimapepo ati, ''Ukupandwa kwa mano yakwa Ahitofere na bakaramba bakwa Israeri muri iyo nshira ne yi nshira, rero mpandire amano yambi. ¹⁶ Nomba kabiri, kabiyeni bwangu no kupera akasebo kuri Davidi; murande kuri ye ati, 'Mwipanga inkambi ubushiku pa nkyende ya Araba, rero mu musango onse tapukire kwishirya, pantu imfumu yaraminwa pamo na bantu bonse abari na ye.''' ¹⁷ Nomba Yonatani na Ahimazi bareikara pa kamfukumfuku ka Rogere. Umubomfi umwanakashi areya no ku bebukisha ifyo bafwire ukwishiba, pantu tabarekeshe ukubabona ukuya mu musumba. Iryo insebo yaishire, eryo bafwire ukuya no kweba imfumu Davidi. ¹⁸ Rero umurumendo aribabwene iyi nshita no kweba Absaromu. Eikyo Yonatani na Ahimazi baire kumbi bwangubwangu no kwisa ku ng'anda ya mwaume mu Bahurimu, uwa kwete ikishima mu rukungu rwakwe, e mo batentemukire. ¹⁹ Umukashi wa mwaume asendere inkupiko ya pa kishima no kwisara pa kishima, no kutobeshapo inseke pa muru, eikyo takuri nangu umo uwaishibire ukuti Yonatani na Ahimazi bari mu kishima. ²⁰ Abaume bakwa Absaromu baishire ku mwanakashi wa ng'anda no kusosa ati, ''Bushe barikwisa Ahimazi na Yonatani?'' Umwanakashi abebere ati, ''Baritapukire umumana.'' Eikyo pa numa baroresha konse tababasangire, baishile babwereremo ku Yerusaremu. ²¹ Kyaishire kitika panuma bafuma ukuti Yonatani na Ahamazi baishire pa kishima. Baire pera insebo kuri Davidi; basosere kuri ye ati, ''Ima no kutapuka bwangubwangu amenshi pantu Ahitofere apere aya na yo amano pari webo.'' ²² Eryo Davidi aimine na bantu bonse abari na ye, no kutapuka Yodani. Pa rukyero mu nshita ya kasuba tapari nangu umo uwafirirwe ukutapuka Yodani. ²³ Iryo Ahitofere abwene ukuti ukupanda amano kwakwe takukonkerwe, aninine pari kabarwe wakwe no kuya ku ng'anda yakwe mu musumba wakwe. Abikire ing'anda yakwe bwino no kuikurika umwine. Eikyo afwire no kushikwa mu kirindi kyakwa wishi. ²⁴ Eryo Davidi aishire ku Mahanaimu. Rero pari Absaromu, atapukire Yodan, ena na baume bonse abakwa Israeri na ye. ²⁵ Absaromu akubikire Amasa pa bashirika mu kifuro kyakwa Yoabu. Amasa ari mwana mwaume wakwa Yetere umwina Ishieri, uyo uwaire kuri Abigere, uwari mwana mwanakashi wakwa Nahashi kabiri nkashi wakwa Zeruaih, nyina wakwa Yoabu. ²⁶ Eryo Israeri na Absaromu bapangire inkambi mu kyaro kya Gireadi. ²⁷ Kyaishire kitika iryo Davidi aishire kuri Mahanaimu, ukuti Shobi umwana mwaume wakwa Bahashi ukufuma ku Raba umwina Amoni, na Makire umwana mwaume wakwa Ammiere ukufuma ku Ro Debari, na Barzillai umwaina Giraedi ukufuma ku Rogerimu, ²⁸ baretere ubutanda na marangeti, imbare ne mpoto, ne ng'anu, no bunga bwa barley, inseke shakokya, kiremba, ifipe, ²⁹ ubuki, amafuta, impanga, no mukaka, ekyo Davidi na bantu abari na ye tabarire. Aba baume basosere ati, ''Abantu bari ne nsara, abanakuka, ne kiraka mu kiswebebe.