¹ Kyari pa numa iryo imfumu ya bantu ba bena Amoni yafwire, na Hanun umuwana mwaume wakwe aishire ba imfumu mu nkyende yakwe. ² Davidi asosere ati, ''Nkaranga uruse kuri Hunan umwana mwaume wakwa Nahash, nge fyo wishi arangire uruse kuri nebo.'' Eikyo Davidi atumine ababomfi bakwe ku kusansamusha Hanun parwa kwa wishi. Ababomfi bakwe baingire mu kyaro kya bantu ba bena Amoni. ³ Rero intungurushi sha bantu babena Amoni sharandire kuri Hanun shikuru wabo ati, ''Bushe kine kine muretontonkanya ukuti Davidi arekindika wishinwe pantu ena atumine abantu ku kumusansamusha? Bushe David tatumine ababomfi bakwe kuri webo ku kubona pa musumba, ku kuurengura, pakuti upokwe?'' ⁴ Eikyo Hanuni aburire ababomfi bakwa Davidi, aba beya kitika imwefu shabo, aputura ifyakufwara ukufika ku matako yabo, eryo abatamfya. ⁵ Iryo barondorwere iki kuri Davidi, atumine abakukumana nabo, pantu abantu barisebene nganshi. Imfumu yasosere ati, ''Ikareni pa Yeriko mpaka imwefu shenu shikakure, eryo nomba mu kabwere. ⁶ Iryo abantu bakwa Amoni babwene ukuti bena barishire ku bapata kuri Davidi, abantu bakwa Amoni batumine inkombe no kwashima abena Aramu aba ku Beti Rehobu na Soba, abashirika ba pa makasa amakana amakumi yabiri, ne mfumu ya ku Maacah na baume ikana, na baume ba ku Tobi na baume ikumi amakana ikumi na yabiri. ⁷ Iryo Davidi aumfwire parwa iki, atumine Yoabu ne fita fyonse ifyabashirika. ⁸ Abena Amoni barifumine eryo bapangire umurongo wa ba burwi pa mwenshi ku mpongoro ya musumba wabo, ninshi abena Aramu aba ku Soba na baku Rehobu, na baume ba ku Tobi na Maacah batareme pa rwabo mu mpanga isha pa rwarara. ⁹ Iryo Yoabu abwene imirongo ya ba burwi irimuroreshe konse ku ntanshi na kunuma yakwe, asarapo bamo aba burwi abasarapuka mu Israeri eryo abatantikire ku bena Aramu. ¹⁰ Abantu bakwe abasherepo ababikire mukuboko kwakwa Abishai ndume yakwe, eryo ena abateyanishishe mu fifuro ku kurwa ne fita fya bena Amoni. ¹¹ Yoabu asosere ati, ''Nga kyakuti abena Aramu bakosesha pari nebo, eryo webo, Abishai ukampokororako, rero nga kyakuti abafita bakwa Amoni bakosesha pari webo, eryo nkesa no kukupokororako. ¹² Ube uwakosa, no kureka ifwe turange fwebene ukuba abakosa pa bantu besu na ku musumba wakwa Resa wesu, pantu Yahweh akakita ifya bune pa menso yakwe.'' ¹³ Eikyo Yoabu na ba shirika bafita fyakwe baparamine ku kurwa na bena Aramu, abo aba butukire ku kinso kyafita fya bena Israeri. ¹⁴ Iryo ifita fya bena Amoni fyabwene ukutira abena Aramu babutuka, nabo baributukire ukufuma kuri Abishai no kubwekera mu musumba. Eryo Yoabu abwekeremo ukufuma ku bantu ba bena Amoni no kubwekera ku Yerusaremu. ¹⁵ Eryo abena Aramu babwene ukuti bena ba bakimfya ku bena Israeri, barikorongene kyapamo na kabiri. ¹⁶ Eryo Hadadesere atumine pa bena Aramu ukuyasenda kwishirya rya mumana wa Yefurata. Barishire ku Haramu, na ku Shobaki, abakuru bafita fyakwa Hadadesere, e wari pa ntanshi yabo. ¹⁷ Iryo David bamwebere iki arikoronganikire abena Israeri bonse kyapamo, ukutoroka Yodani, no kufika ku Haramu. Abena Aramu baitantamika mu murongo wa burwi kuri Davidi no kurwa na ye. ¹⁸ Abena Aramu baributukire ukufuma ku bena Israeri, na David aipeye abaume aba pa makyereta imyanda kine rubari na baume ba pari bakabarwe amakana amakumi yane. Shabaki umukuru wa fita fyabo ariikyenene no kufwira parya pene. ¹⁹ Iryo bashamfumu bonse abo abari ababomfi bakwa Hadadesere babwene ukutira bena babakimfya kuri Israeri, barengere umutende na Israeri no kuba ifyakurandapo fyabo. Eikyo abena Aramu baretina ukwafwa abantu bakwa Amoni na kabiri.