¹ Eme ndemukuru mi kozyo ashakiwa Gaius, ozyo ndishaka ko vuniiti. ² Ozyo ndishakiwa, Ndirapera ye ozwirfe havuso muzintu zonshe mi kuve na makete, kavuti muzya wako uzwirire havuso. ³ Kavulyaho ndivoterwa hawa vakwetu ko kezya mi kupaka eniti yako. ⁴ Ndaazya emboterwa itanta yiyi, kushuwa ye vanangu vayenda munjira ye niiti. ⁵ Ewe oshakiwa, olike-like mukusepahara hositendera va kwako nava nyenda, ⁶ avo ni vapaka elato lyako havuso bwe nkereke. opanga nenja hasi vatuma mu muyendo wavo vuti kuswanehere kwa Nyambe, ⁷ kakuli kevaka lye zina mpaho niva yenda, kwaazya eco kava amba kuva Shifasi. ⁸ Kavulyaho tuswanezi kumbura vavulyaho, okutiye tutendisane ko vuniiti. ⁹ Ndiñorera enkereke, kono Diotrefi, ozyo ashaka kuva we ntanzi mukati kavo, ka tutambuli. ¹⁰ Kavulyaho, handishikezya, ndira aazyara ezitendantu zakwe ezo natenda, vuti aamba zintu kovuvi kotuturwisa namazywi mabbi. Kali nzitendo zina nenja, eye mwini katambuli vakwakwe, akanisa avo vasha kutenda mi ava tandira kuunje ye nkereke ¹¹ Ewe oshakiwa, kosha yezekezi ovubbi, kono eco cina nenja. Ozyo atenda nenja ngwa Nyambe; ozyo atenda ovubbi kashini kuvona Nyambe. ¹² Demetrius apakwa kwavo vonshe mi no vuniiti ovo bwini. Neswe tumupaka, mi muzyi ovupaki bwetu mbo vuniiti. ¹³ Ndikwesi zingi zo ku kuñorera, ndaazya kutavere kuziñora ke boropeni kapa keinki. ¹⁴ Kono ndiswanezi oku kuvona nabwangu, mi turaamba netu litonderere. ¹⁵ Empore ive newe. Avashere va kurumerisa. Orumelise vashere kama zina avo.