¹ Yenshe ozyo azumina ye Jeso ndi Kereste apepwa kwa Nyambe. Mi yenshe ozyo ashaka tata aswanezi kushaka mwana apepiwa kwakwe. ² Kevaka lyezi tuzyi ye tushaka vana va Nyambe: hatusishaka Nyambe no kupanga emirawo yakwe. ³ Kezi nde lato lya Nyambe: ye tukuteka emirawo yakwe. Mi emirawo ya kwe yaazya vuremu. ⁴ Kozyo yenshe napepwa kwa Nyambe akoma efasi. Mi eci nceco ni ca koma efasi: entumero yetu. ⁵ Ndini ozyo akoma efasi? Mbita ozyo azumina ye Jeso Mwana Nyambe. ⁶ Ozyo ndeye enke akezya ka menji na maroha: Jeso Kereste. Kakezyi vulyo ka menji, kono ka menji na maroha. ⁷ Zintu zotatwe zikwesi ovupaki. ⁸ Ruho, menji, mi na maroha. Ezo zotatwe zizukinzene. ⁹ Heva tutambura ovupaki bwa vantu, ovupaki bwa Nyambe mbunene. Kovupaki bwa Naymbe mbovu, naava ovupaki ka Mwane. ¹⁰ Yenshe ozyo azumina ku Mwana Nyambe akwesi ovupaki eye mwini. Yenshe ozyo kazumini Nyambe nali zwisi kuva we mbuzi, kakuli kazumini ovupaki ovo Nyambe naha kuamana no Mwane. ¹¹ Mi ovupaki mbovu: Nyambe naatuha ovumi kavumani, mi ovu vumi bwina ku Mwane. ¹² Ozyo akwesi Mwane akwesi vumi. Ozyo aazya Mwana Nyambe aazya vumi. ¹³ Ni ndañora zi zintu kupangira ye muzyive ye mukwesi vuumi kavumani-kwenu muzumina mwi zina lyo Mwana Nyambe. ¹⁴ Hape, eyi nje nsepo tukwesi havuso bwa kwe, okutaye conshe co tukumbira kokushaka kwakwe, atushuwa. ¹⁵ Hape, heva tuzyi ye atushuwa-conshe eco tumu kumbira-tuzyi mbwatuhe conshe co twa mukumbiri. ¹⁶ Heva nkwena ozyo abwene mukwakwe napanga ecivi eco kacireti orufu, aswanezi oku rapera, mi Nyambe mbwamuhe vuumi. Ndita kwavo ezivi zavo kazireti orufu. Koncina ecivi eco cireta orufu; Kandiaambi ye aswanezi okurapera kuamana neco. ¹⁷ Zonshe ezo zaazya kurukite ncivi, kono nkocina ecivi ka ci reti rufu. ¹⁸ Tuzyi ye yenshe ozyo apepwa kwa Nyambe katendi civi. Kono ozyo apepwa kwa Nyambe aliungura, mi omuvi kamukwati. ¹⁹ Eswe tuzwa kwa Nyambe tuzyi vulyaho, mi tuzyi ye efasi lyonshe liwira kozyo muvi. ²⁰ Kono tuzyi ye Mwana Nyambe naakezya mi naatuha okushuwisisa kutiye tuzyive ozyo akwesi niti. Hape, twina mozyo akwesi niti, ku Mwane Jeso Kereste. Ndi Nyambe we niti no vuumi kavumani. ²¹ Vance, muliungure ku milimu yo kuvumba.