¹ Gudi'disi xhoopa dxi Jesús gucuaa Pedro, Jacobo (Santiago) ne Juan bi'chibe, ne xtubisi cabe gudxi'ba cabe lu ti dani nasoo. ² Laabe bichaabe nezalu ca'. Lú be bizaani casi ruzaani gubidxa ne ca lari nacube que bizaani cani casi ruzaani biaani. ³ Ora queca, ra nuucabe que beda ree Moisés ne Elías cani'ne LAABE. ⁴ Pedro bicabi ne gudxi Jesús: "Señor, galan nga nuunu rari'. Pa racaládxu, naa sune chona yoo huiini, tobi para li, tobi para Moises ne xtobi para Elias." ⁵ Laga laabe cani'rube, bihuini, ti zá ruzaani bichii laacabe, ne ora que, biree ti voz lade ca zá que cani': "Ndi nga xiiñe ni nadxiee, ni cayeche nia' lagucaa diaga laabe". ⁶ Ora ca discipulu que binadiaga ndi, bisaba lúca layú ne bidxibi ca'. ⁷ Ora que Jesús beeda ne guda'na laacabe ne rabi laacabe: "Lagiasa ne cadi guidxibitu." ⁸ Ne ora que biyadxi cabe luguia' ne que ñuuyadicabe guiruti, Jesus si. ⁹ Laga ziyetecabe de lu dani que, Jesús guni' xi gúnicabe, ne guni': "Cadi gabitu gaxti guiruti de ni biiya tu di, dede guendanda dxi xiiñi Diuxi guiasa de lade ca gue'tu". ¹⁰ Ca discipulube gunabadiidxa ca' laabe, ne guni'ca: "¿Xiñee gá ca ni rucaa náca' Elias naquiiñe saa niru?" ¹¹ Jesús bicabi ne guni': "Elias dxandi'pe zeeda ne zunichaaui guira xixe. ¹² Peru gabe laatu, Elias ma beeda, peru que ñunibia'tu laa; laga bi'nitu ni gupatu ganna ne laabe. Zaqueca, xiiñi Diuxi laca zadiidi nagana lu nátu". ¹³ Ti ora que ca discipulu bieneca', que laabe cayui'nebe laaca de Juan ni Ruguunisa. ¹⁴ Ra yenda cábe ra nuu guira' binni que, tobi hombre bidxiña laacabe, bisuxibi ra lube, ne rabi laabe: ¹⁵ "Señor, biá xiiñe', purti rudii ataque laabe ne nabé riuubabe. Nabé riababe lu gui o lu nisa. ¹⁶ Naa yenia' laabe ra nu ca discipulu xtiu'. pero que ñanda di nusiandaca' laabe." ¹⁷ Jesus bicabi ne guni': "Binni ni nuu ganna ni que runi cre ne rusiguii, ¿pabia' ru nga naquiiñe guianania' laatu pue? ¿pabia' ru nga naquiiñe gune huantar laatu pue? La tané laabe rari'." ¹⁸ Jesus bini reprender laabe ne binidxaba que biree de laabe. Xa xcuidi que bianda de ora que. ¹⁹ Ti ora que ca discipulu que beedaca' ra nuu Jesús naga'chi ne guni'ca: "Xiñee laadu que ñanda dibeedu binidxaba ca?" ²⁰ Jesús rabi laacabe: "Pur huaxie' xendarunicre tu. Purti dxandi'pe gabe laatu, pa ñaca neca nahuiini guendaruni cretu bia' pe ti biidxi mostaza, laatu ñabitu dani ca: 'Buduuba de rari' ne guye rarica', ne nini'bini. Gaxti ñaca naganna para laatu. ²¹ Peru tipu binidxaba di que riedi', pa cadi ne oración ne ayunu." ²² Laga laacabe biaanacabe Galilea, Jesus rabi ca discipulu xti: "Xiiñi Diuxi zuudicabe laa lu na' binni, ne laaca zuutica' laabe, ²³ ne lu guiona gubidxa laabe ziasabe." Ca discipulu que nabe nagundu guyuuca'. ²⁴ Ora yendacabe Capernaúm, ca hombre rutopa xpidxichi yu'du' que veedaca' ra nuu Pedro ne guni'ca: "¿Ñee maixtru lu que riguixe impuestu xti templu? Laabe guni'be: "Riguixe." ²⁵ Peru ora Pedru biuu ndani yoo que, Jesús niiru guni'ne laabe ne rabi laabe. "¿Xi nalu, Simón? Ca ni rigui'ba la'pa ique xti guidxilayu, ¿tu xti ca impuestu ricaacabe o rusisaca laacabe? ¿xti xpini cabe la o xti binni zeeda de xti guidxi?" ²⁶ Ora Pedro guni': "Xti ca ni zeeda de xti guidxi", Jesus rabi laabe: "Yanna ca ni cayuuya si cadi naqui'ñe quixe ca'. ²⁷ Peru ti que guni laadu ca ni ruquixe bidxichi guchee ca, guye ra nisado' ca, guluubi ansuelu xtiu, ne gunaaze niru benda gueeda. Ora ma bixhalelu' ruaame , zadxe'lu cadxi domi' bia' riaxa cabe tapa gubidxa. Gucuaani ne bidiini ca ni ruquixe bidxichi, pur xtine ne pur xtilu'."