¹ مَادَامْ عَنْدْنَا هَادْ الْخٍدْمَة بْرَحْمَة مَنْ الله مَا لَازَمْشْ نَفَشْلُوا، ² حْنَا أَلِّي خَلِينَا الْسِيرَة لَمْخَبْيَة لِّي كُونَا نَحَشْمُوا بِهَا، مَا وَلِنَاشْ نَمْشُوا بْلَخْدَعْ، و لا نْزَوْرُوا كَلِمَة الله، بَصَّحْ نْبِيْنُوا الْحَقْ، نَشَكْرُوا رْوَاحْنَا عَنْدْ كُلْ إِنْسَانْ بْضَمِيرْصَالَحْ ڤُدَامْ الله. ³ بَصَّحْ إِذَا كَانْ إِنْجِيلْنَا مَكْتُومْ، رَاهْ مَكْتُومْ غِيرْ عَنْدْ الْهَالْكِينْ أَلِّي مَاشِي مُِؤمِنِينْ، ⁴ أَلِّي إِلَهْ هَادْ الْزْمَانْ عْمَى عْقُولْهُمْ، بَاشْ نُورْ إِنْجِيلْ مَجْدْ الْمَسِيحْ مَا يْنَاوَرْهُمْشْ، أَلِّي هُوَ صُورَة الله. ⁵ مَا رَانَاشْ نْبَشْرُوا بْأَنْفُسْنَا، بَصَّحْ بَالْمَسِيحْ يَسُوعْ رَبَّا، وحْنَا غِيرْ عَبِيدْ لِيكُمْ عْلَى جَالْ الْمَسِيحْ. ⁶ عْلَى خَاطَرْ الله أَلِّي ڤَالْ: "تَشْرَقْ الْنُورْ مَالْظَلْمَة"، هُوَ أَلِّي أَشْرَقْ فِي قْلُوبْنَا، وشْعَلْ نُورْ مَعْرِفَة مَجْدْ الله فِي وَجْهْ يَسُوعْ الْمَسِيحْ. ⁷ بَصَّحْ عَنْدْنَا هَادْ الْكَنْزْ فِي أَوَانِي تَعْ فَخَارْ، بَاشْ تْبَانْ الْقُوَّة الْكْبِيرَة مَنْ عَنْدْ الله مَاشِي مَنْ عَنْدْنَا. ⁸ الْصُعُوبَاتْ دَايْرَة بِينَا مَنْ كُلْ جِهَة بَصَّحْ مَا نْطِيحُوشْ، مَا لْڤِينَاشْ الْحَّلْ بَصَّحْ مَا فْشَلْنَاشْ. ⁹ مُضْطَهْدِينْ، بَصَّحْ الله مَا خَلاَنَاشْ. نْطِيحُوا لَلَّرْضْ بَصَّحْ مَاشِي مَيْتِينْ. ¹⁰ وِينْ نْرُوحُوا نَدُوا مُوتْ الْمَسِيحْ فِي أَجْسَدْنَا بَاشْ تْبَانْ تَانِي حْيَاةْ الْمَسِيحْ فِي أَجْسَدْنَا. ¹¹ عْلَى خَاطَرْ حْنَّى الْحِيِّينْ يْسَلْمُونَا دَايَمْ لَلْمُوتْ عْلَى جَالْ يَسُوعْ، بَاشْ تْبَانْ حْيَاةْ يَسُوعْ فِي أَجْسَدْنَا الْمِيْتَة. ¹² إِذَا الْمُوتْ تَخْدَمْ فِينَا، و الْحْيَاةْ تَخْدَمْ فِيكُمْ. ¹³ مَا دَامْ عَنْدْنَا رُوحْ الإِيمَانْ كِيمَا مَكْتُوبْ: " أَمَنْتْ بَاشْ تْكَلَّمْتْ" حْنَا تَانِي نَمْنُوا عْلَى جَالْ هَادْ الْإِيمَانْ نَتْكَلْمُوا تَانِي. ¹⁴ عَارْفِينْ بَلِّي أَلِّي حْيَّا الْرَّبْ يَسُوعْ مَالْمُوتْ يَحْيِّينَا حْنَا تَانِي بْيَسُوعْ، و كُونُوا فِي حضْرَتِهِ مْعَكُمْ. ¹⁵ عْلَى خَاطَرْ كُلْ شِي يْقِيسْنَاعْلَى جَالْكُمْ، حَتَّى إِذَا فَضَتْ الْنِعْمَة فَالْكْثِيرْ، تَجْعَلْ الْشُكْرْ يْفِيضْ لْمَجْدْ الله. ¹⁶ عْلَى جَالْ هَادْ الْشِي مَا نَفَشْلُوشْ، حَتَّى إِذَا كَانْ إِنْسَانْنَا أَلِّي يْبَانْ مَنْ بَرَى يَفْنَى، أَلِّي مَالْدَّاخَلْ يَتْجَدَّدْ مَنْ يُومْ أَلْ يُومْ. ¹⁷ عْلَى خَاطَرْ الْضِيقْ أَلِّي رَاهْ يْصْعَبْ عْلِينَا دُورْك فَانِي، ويَنْتَجْ لْنَا كْثَرْ مَنْ الْمَجْدْ الْغِيرْ فَانِي. ¹⁸ نَرَفْدُوا عْيُونْنَا مَالأُمُورْأَلِّي بَايْنَة ونْشُوفُوا لَلأُمُورْ أَلِّي مَا تْبَانْشْ، عْلَى خَاطَرْ أَلِّي تْبَانْ فَانْيَة، و أَلِّي مَا تْبَانْشْ مَاشِي فَانْيَة أَبَدِيَّة.