¹ - ² Ang lang sakrauah mih Thiuphil, Isu kowi mukuang pren kowi pawla dowi rawn mowr Isu changla mih maten hai tüngsangla mih maten dow ang rik ruiah mih bowih kowi uowi khai. Aia kloah mih tapeuüa kowi dow aia pawla dowi mowr lümla chimsaima mih hown aia kruiah khai. ³ Aia kowh ngare khamra chur kung kowi naiawngün maru-uüa tut-e aia uang tatüng pe khai. Now aia dow sing uowi reng tak pami owmra huma uowi khai. Nami kung kowi aia dow likawm ni mowr atapeuüa tut-e uowila hanow mukuang pren lawnguan tekla pe khai. ⁴ Nami khin khe Isu dow atapeuüa tut-e uowi reng tak khe, pani dow amatni kowi maiawng hai pela ana khai, “Enni mih Jerusalem hownia hang cham powt. Nami lak-e uanh pek lawnguan kowi ang tek enni mih dow apa kowh lai kham chekhai. Naiawng rakowi nami kowi hawt chawngah büa diah. ⁵ Now Jawhan dow tui hown chang Baptisma khai. Nachenganchepaw pre sum ni chow vüi apa kowh nami lai kham iawng dow enni kowh lümla sai dow naphaw baptisma kown,” pakhai. ⁶ Akung kowi tapeuüa dow arasang takua talawm büah hanow Isu kowi lüntaah mih, “Chakramang, mami akhin dow Israeluüa kowi en apta pe pren kown bow?” pakhai. ⁷ Now amatni kowi Isu tekpe mih, “Tawng mih ni chow, tawng mih khin chow apa aiamat low kowi towah mih dow pe tuk enni dowi chekhai. ⁸ Nachenganchepaw enni lukkowi lümlasai uang ting kung kowi enni dow naka kür kown. Now enni mih Jerusalem, Juda pren hai Samari pren, now palusama kowi enni dow ang kowh saksi thuak mih chekhai,” pape khai. ⁹ Nami laiklow tek kung kowi tapeuüa pur kowi Isu kowi dow pawla khai bowt. Now aia kowi dow uangnim krüa iawng pawla khai bowt chekhai. ¹⁰ Now mukuang pra Isu awr pün mih khin khe tapeuüa dow amik sang krawi müah khai. Nami khin khe uan kaw khupma mih maru preia dow tapeuüa re-e uang iowng now tek mih, ¹¹ “Galili maru-uüa low, tawng rakowi chow mukuang pra enni tang mü reng reng? Enni hownia kowh pawla mih Isu kowi dow tawngiawng chow mukuang pren pra awr pün mih enni khi mih iawng aia dow nauang iu dowm iawk kown,” pakhai. ¹² Nami khin khe tapeuüa dow Kanrawn hung hownia uang iu dowm hanow Jerusalem marow kowi uang plan büah khai. Now nami hung hownia Jerusalem marow dow alak amaing hown dawnglang tak chekhai. ¹³ Amatni dow marow kowi uang ting khowk now amatni uowira aluk krowng kowi kowkowi büah khai. Now naiawngün mih tapeuüa dow: Peter, Jawhan, Jakawb hai Andre; Philip hai Thawm, Barthawlawmawi hai Mathai, Alfaius kowh chapa Jakawb hai Zealawt Simawn, now Jakawb kowh chapa Juda chekhai. ¹⁴ Now amatni dow owm mih masiuüa hawm hown, Isu u Mari hai Isu tainau-uüa hown atungma taiua chup Thurai reng chekhai. JUDA TAKCHA KOWI KOW CHINTAKMI LOWKIA ¹⁵ Pani khe Peter mih 120 ia owm miuüa pungmadawng kowi tek mih, ¹⁶ “Tainau-uüa low, lümlasai mih khin krama khowk mang David nawr hownia Juda lawnguan kowi tekla khai. Nami laklow dow chimsaima mih chabowih kowi uang tachi kown takla khai. Isu kowi khüm miuüa kowi dow nami Juda mih tüngla pe tiama khai. ¹⁷ Aia dow anging kowh maru lowkia chekhai. Now aia dow anging hown natawi taiua chang lup kownkow kloah mih chekhai,” pakhai. ¹⁸ Angak lup hown kowh Juda kaah mih tangka dow ranla krawng parah chekhai. Nami krawng kowi aia dow tatheu kowh mu tauai khai, now aria tauai plawt khai. ¹⁹ Nami satang dow Jerusalem marow chakuüa maten ta khai. Naiawng rakowi amatni lai hown nami krawng ming dow Akeldama (Auan dow Vi Krawng) chekhai. ²⁰ Naiawng rakowi Peter tek mih, “Chimsaima Menglai bowih kowi arui uowi mih, ‘Aia kowh kim dow akhaw klaima pacham uowi lah, nakowi dow mia iawng mih paw hang pacham uowi lah’ pakhai. Now arui uowi küng tak, ‘Aia kowh aiukma mih arah dow akeng mih maru pacham pawta lah,’ pakhai. ²¹ - ²² “Naiawng rakowi Isu kowngra hownia awr kut sing mih nathuakla saksi iawng kown mih maru anging chintak mih thumchak kowi nau lowkia tak. Nami maru dow Jawhan chang Baptisma mih khin hownia uownah now Isu kowi anging hownia pawla dowi mowr, now CHAKRAMANG Isu mih anging hown tawi taiua uowila mowr mih khin khe kowh anging tut-e tawi uowi mi maru naown kown takla,” pakhai. ²³ Nami khin khe tapeuüa mih preia ming tangah khai. Nami maru preia ming dow Josef (Hawah Barsabas hai Justas mih) hai Matthias iüah chekhai. ²⁴ - ²⁵ Nami kung kowi amatni dow maiawng hai chup Thurai khai: CHAKRAMANG, en dow maru kowh saktuak maten tuk. Now Juda dow aia kowh kakbak kala kownkow plawtta chintakmih lup khai. Kawmat dow mami pre ia pungmadawng kowi nami lup vüi kowi en nakloah kown mih tüng anging diah,” pabüah khai. ²⁶ Now amatni dow kuak plang hanow Matthias ming kowi cha khai. Naiawng rakowi Matthias dow nami lailowk ia chintak miuüa hown tawi taiua khai.