¹ Siak ni Pablo, maysa a balud ni Kristo Jesus, ken ni kabsattayo a Timoteo, ket agsursuratkami kenni Felimon, nga ay-ayatenmi a gayyem ken katrabahoan, ² ken ni Apfia a kabsatmi a babai, ken ni Arkipo a padami a soldado, ken ti iglesia nga aggimgimong iti balaymo. ³ Parabur kadakayo ken kappia manipud iti Dios nga Amatayo ken ni Apo Jesu-Kristo. ⁴ Kankanayon nga agyamanak iti Diosko no dakdakamatenka kadagiti karkararagko, ⁵ gapu ta nangngegko iti pammati nga addaanka kenni Apo Jesus ken ti ayat nga adda kenka para kadagiti amin a namati. ⁶ Ikararagko a nabunga koma iti panangibingaymo iti pammati, tapno maaddaanka iti naan-anay a pannakaawat iti tunggal nasayaat a banag nga adda kadatayo kenni Kristo. ⁷ Gapu ta naaddaanak iti kasta unay a rag-o ken liwliwa gapu iti ayatmo, agsipud ta pinaragsakmo dagiti puso dagiti namati, kabsat. ⁸ Ngarud, uray pay no adda kaniak amin a kinatured gapu kenni Kristo tapno bilinenka iti rumbeng nga aramidem, ⁹ ngem gapu iti ayat, dawdawatek ketdi kenka—Siak, ni Pablo, maysa a nataengan a tao, ken balud ita gapu kenni Kristo Jesus. ¹⁰ Agdawdawatak kenka iti maipapan kenni Onesimo nga anakko, a nagbalinak a pannakaamana iti pannakabaludko. ¹¹ Gapu ta awan idi iti serserbina kenka, ngem napategen isuna ita kadata. ¹² Pagsubliek isuna kenka—nga isu ti ay-ayatek unay. ¹³ Tarigagayko a pagtalinaedek pay koma isuna kaniak, tapno makatulong kaniak bayat iti kinaawanmo, bayat ti pannakaibaludko gapu iti ebanghelio. ¹⁴ Ngem saanko a kayat ti agaramid iti aniaman a banag nga awan pammalubosmo. Saanko a kayat nga ti kinaimbag ti aramidmo ket pinilitka ngem gapu ta kayatmo nga aramiden daytoy. ¹⁵ Nalabit a ti rason a naisina isuna kenka iti apagbiit, ket tapno agsubli kenka iti agnanayon. ¹⁶ Tapno saan laengen isuna a kas tagabu, ngem nangatngato pay ngem tagabu, kas maysa nga ay-ayaten a kabsat. Nangnangruna kaniak, ken ad-adda pay koma kenka, iti lasag ken iti Apo. ¹⁷ No ibilangnak ngarud a kas kadua, awatem isuna a kas ti panangawatmo koma kaniak. ¹⁸ Ngem no nagbasol isuna kenka, wenno nakautang kenka iti aniaman a banag, siakon ti agbayad iti dayta. ¹⁹ Siak, ni Pablo, insuratko daytoy babaen iti bukodko nga ima. Bayadankanto—saankon nga ipalagip kenka a bulodmo kaniak ti biagmo! ²⁰ Wen, kabsat, ipalubosmo nga agragsakak iti Apo; pabaroem ti pusok kenni Kristo. ²¹ Adda talgedko maipanggep iti panagtulnogmo, agsuratak kenka, nga ammok nga ad-adu pay ti aramidemto ngem ti dawatek. ²² Maysa pay, mangisaganaka ti siled ti sangaili para kaniak, ta namnamaek a babaen kadagiti karkararagyo ket mapasyarkayonto iti mabiit. ²³ Kablaawannaka ni Epafras a padak a balud kenni Kristo Jesus, ²⁴ ken kablaawandakayo met da Markos, Aristarko, Demas, Lukas, a katrabahoak. ²⁵ Sapay koma ta ti parabur ni Apotayo a Jesu-Kristo ti makikaadda iti espirituyo. Amen.