¹ Jizú samá inen dôzê, só dá inen pôdê ku atolidaxi ni liba di tudu dêmônô, ku pôdê pá inen pô kula duêntxi. ² Ê manda inen bá plegá Lenu di Desú só pa inen kula inen dwentxi. ³ Só ê flá Inen: "Ná bê ku nadaxi ni viaji, nê kajadu, nê jibela, nê pôn, nê gêlu, nê uã tuniká amaxi. ⁴ kwakwali kê ku nansê ká lentlá, mundjá nála anté nansê ká xê ni lugê sé. ⁵ Olá ku uã kê na lêsêbê nansê fá, olá nansê ká xê ni poson sé, nansê ká saguli puêlá ku sá ni ôpé nansê pê pó bilá sextemunhu dá inen ungê sé". ⁶ Só inen ká bê ni vila, ká flá di nova sé ká kula ungê ni tudu lugê. ⁷ Só Helodi, ku sá tetlaká, têndê tudu kua ku tava ká pasá só ê fiká dimiladu, pundá uã ungê táva ká fla ku Zon bBatista lesusitá di motxi. ⁸ Iné ôtlô ungê tava ká flá ku Elias plásê, ôtlô dinen flá ku uã dinen plofetá di tempu bí vidá. ⁹ Só Helodi, flá: "Zon ami mé manda pá a kóté piskôsô, anton kêngê sá isé ku nansê ixká flá inen kwa sé?" Zawo Helodi tava ká gôlô modu di bê Jizú. ¹⁰ Olá inen dêzê apoxtulu ku Jizú manda votá, Inen flá Jizú tudu kwa ku inen fé. Sósó Jizúbê ku inen bá uã poson ku ká sama Betsaida, ¹¹ Maxi inen pôvô ku têndê kwa sé têmbété xigi Jizú. Só Ê tomá inen tudaxi, só Ê fla di Lenu di Desú só ê kula inen sé ku tava ká plixizá kula. ¹² Olá kwa tava ká fika notxi inen dôzê bi lêlê Jizú só inen flá: "manda ku inen ungê sé bá ké, di môdu sé inen ká pô bá vilá ku lugué petu dála pa inen pô kontla lugê pá inen tá, ku kumé pa inen pô kumé, pundá lugê sé ku non sá ná tê nadaxi fá. ¹³ Maxi Jizú flá inen: "Dá inen kwa pá inen pô kumé". Só inen flá: "Non ná te maxi ku xinku pôn ku dôsu pixi, kaposá ku non ká kompla kumé dá inen tudaxi". ¹⁴ (Tava nalá uã xinku mili ômé). Anton Jizú flá inen dixipulu Dê: "Fé inen tason ni glupu di xinkwentá ungê". ¹⁵ Sósó inen fé mô Jizú mandá só tudu ungê tason. ¹⁶ Só Jizú pegá xinku pôn, ku dôsú pixi, só Ê bilá wê bá ôsé só Ê bensuá, só Ê patxi só dá inen dixipulu pá inen pô lépatxi dá multidon. ¹⁷ Inen tudaxi kumé satifêtu só inen xá dôzê kwali ku kumé ku soblá. ¹⁸ Zawo Jizú tava ká fé olason sosegadu só inen dixipulu tava ku Ê. Anton Ê puntá inen: "Kengê inen pôvô ká flá ku Ami sá?" ¹⁹ Só inen kuji: "uã uã dinen ká flá ku Bô sá Zon Batista, ôtlô ká fla ku bô sá Elias ê tê ôtlô ku ká flá ku Bô sá uã dinen plofetá di tempu ku bi vidá". ²⁰ Só Ê fla inen: "Maxi kengê nansê ká flá ku Amoi sá?" Só Pedlu kuji: "Bô sá Klixtu di Desú". ²¹ Zawo Jizú sáma tenson dinén, pa inen ná flá kwa sé dá niuã ungê fá, ²² só ê flá: "Sá Plexizu ku Mina di Ômé ká soflê inen kwa sé, inen Ansion ká bi zetá Ê, inen mésé di inen sasedotxi, ku inen isklibá, Ê ká môlê maxi ni têsêlu djá ê ká bi vida". ²³ Xi uã ungê bi lêlê Mu, sélá ê négá vida dê, tomá klusu dê tudu djá só tá ku ami. ²⁴ Isé ku mêsê stlavbá vida dê ká plêdê, maxi isé ku ká plêdê vida dê plovia Mu, ká stlavá vida dê. ²⁵ Kê plôvêtu tê uã ungê ku ká nganha mundu ntelu, só plêdê vidá dê mé? ²⁶ Isé ku ká tê vlegonha ji Mu ku palavla Mu, Miná di Ômé ká bi tê vlegonha dê olá Ê ká bi ni glolia Dê, ku glolia di Pé Dê ku dinen santu anzu Desú. ²⁷ Védémé Ami ká flá nansê, ê tê uã uã di nansê ku sá nai ku ná ká bê motxi ku wê fá anti ku lenu di Desú ká xigá. ²⁸ Zawo, ôtô djá vala olá Ê fla kwa sé, Jizú bé ku Pedlu, Zon ku Tiagu só inen subli bá montxi bá fé olason. ²⁹ Olá Ê tava ká fé olason, kala Dê bila ôtlô, lôpá Dê bila blanku ká luji. ³⁰ Zawo dôsú ômé tava flá ku Ê, Musé ku Elias, ³¹ Inen plasê ni uã glolia ku ká luji. Inen tava ká fla di patxida di Jizu ku tava pétu di kontêsê ni Jiluzalen. ³² Pedlu ku inen ku tava ku Ê iné tudu tava bébédadu di sonó, olá inen kodá, inen bê glolia di Jizú ku inen dôsú ômé ku tava ku Ê. ³³ Olá inen ômé tava ká xê ni wê di Jizú, Pedlu flá: "Mésé ê, ê sá bwa non sá nai. Ban fé tlexi tendá, uã dá Bô, uã dá Musé, ôtlô dá Elias". maxi Pedlu ná tava sêbê kua ku ê tava ká flá fá. ³⁴ Olá ê tava ká flá kua sé, uã nuven bi só kubli inen ku sombla dê, Inen fiká ku mendu olá inen lentla ni nuven. ³⁵ Sósó uã vozu xê di nuven, só flá: "Isé sá Mina Mu, Isé ku sá Kôidu; bili olha têndê kua ku Ê ká fla nansê". ³⁶ Olá vozu sé palá, Jizú tava Êlê tan. Inen fiká sosegadu ná fla nadaxi fá só ni inen djá sé inen ná flá nadaxi dá niuãngê di kua ku inen tava ká bê. ³⁷ Sósó, ni djá xigintxi, uã glanji multidon bê inen olá inen tava ká bi di montxi. ³⁸ Uã ômé ku tava ni multidon glitá, só ê flá: "Mesé ê, un ká logá bô fen favôlô pia miná mu, pundá un tê ê tan. ³⁹ Zawo ê uã suplitu ka bi nê só ê ka tomá santu, só ê ká glita, ká tlêmê antê ku xipuma ká xê ê ni bôká. Suplitu sé ná mêsê xé dê, ê ká pankadê lumadu. ⁴⁰ Un piji inen dixipulu Bô pá inen txilé, maxi inen ná poji fá. ⁴¹ Zawo Jizú kuji ê, só flá: "Kê gelason sé ku ná kêlê ku sá pevetidu, antê kê djá kun Tá ku nansê pan pô supôtá nansê? Bi ku miná bô nai". ⁴² Zawo olá a tava ku bi ku anzu sé, demônô lentla nê sugê ni son só ê tava ka tomá santu ká tlémé ku xipumá ni boka. Maxi Jizú kôlê ku suplitu mau ku tava nê, anzu tava kuladu só Jizú tlegá mina dá pé dê. ⁴³ Tudu ungê tava dimiladu di bê klandesá Desú. Maxi ni momentu ku tudu ungê tava ká dimilá ku tudu kua ku Jizú fé, Ê fla inen dixipulu Dê: ⁴⁴ "Bili olhá pá nansê têndê palavla sê: "A ká bá ntlegá Miná di Ômé ni môn di ômé". ⁴⁵ Maxi inen dixipulu Dê ná têndê palavla sé fá, kwa sé a kubli dá inen, pá inen ná tende fá. Sósó inen tava ku mendu di puntá Ê kê kua kua sá palavla sé. ⁴⁶ Anton inen dixipulu tava ká klonvesá kwali dinen sá maxi tamé di inen tudaxi. ⁴⁷ Zawo Jizú tava ká sêbê kua ku ien tava ká pensa ni kloson, sósó ê toma uã anzu pê ni zuntu dê, ⁴⁸ só ê fla: "Xi uã ungê lêsêbê anzu sé ni nomi Mu, ê tembêtê ká lêsêbê Mu, Xi uã ungê ká lêsêbê Mu, ê tembêtê ká lêsêbê Isé ku manda Mu. Pundá isé ku sá piquiná ni ômé di nansê, isé só ku sá glanji. ⁴⁹ Zon fádá Jizú: "Mesé ê, non bê uã ungê ká kôlê ku demônô ni nomi Bô, pundá kê kua ê na ká xigi Bô ku non" ⁵⁰ Maxi Jizú fadé: "Na impiji ê fá, pundá ungê ku na sá kontla nansê ê sá ku nansê". ⁵¹ Zawo, olá tava ká xigá djá di Ê subli bá ôsé, Ê plifia pá ê bá Jiluzalen ⁵² só Ê manda mensajelu bá ni wê. Só inen lentla ni uã vila di samaia pa inen pô lumá kwa dá vindá Dê. ⁵³ Maxi Inen ungê dá lá na lêsêbê Jizú fá, pundá wê dê tava flimadu Pê pô bá Jiluzalen. ⁵⁴ Zawo olá inen dixipulu dê ku sá Txiagu ku Zon bê kwa sé, só inen fla: "Sumuê, Sun mêsê pa non manda bi fôgô d'ôsé pa matá inen?" ⁵⁵ Maxi Jizú bila dá inen só Ê lêplêndê inen. ⁵⁶ Só ine fô bá ôtlô vila. ⁵⁷ Zawo olá inen tava ni caminhã, uã ungê flá Ê: "Un ká bê ku Sun ni kwali kwa kamiã ku Sun ká fô". ⁵⁸ Só Jizú kuji ê: "Inen lapoza tê toká anji uinen ka tá inen bisú d'ôsé tê ninhu dê, maxi Mina di Ômé ná tê uã kamiã pê pô pê kabésa." ⁵⁹ Zawo Ê fla dá ôtlô ungê: "Xigi Mu". Maxi ungê sé kiji: "Sumuê, desamu bá ntelá pé mu plumê". ⁶⁰ Zawo Jizú flá: "Desá ku inen ku motxi ntela inen motxi dinen, maxi bô, bi flá ni tudu lugê wa ku toka Lenu Desú". ⁶¹ ôtlô Ungê tembêtê flá: "Ami ká bá xigi Bô, Sumê, maxi desamu bá dipiji dinen ungê di ké mu plumê". ⁶² Maxi Jizú fla: "Niuãungê ku, ká pê môn ni nxádá só ká bila wê bá tlaxi, na ká dá ni Lenu di Desú".