¹ Ni, Plimêlu djá di semana, ni madlugadá, inen bá ximiteli, inen bâ ku kua ku inen tava plepaladu. ² Sósó inen kontla bubu ku tava ni pótó di tumulu txiladu; ³ Maxi, olá inen lentla inen ná bê glôpô di Jizú nálá fá. ⁴ Zawo inen fiká dimiladu plovia kua ku inen bê. Sósó dôsu ômé plasê ni wê dinen bixidu lôpa ku ká luji. ⁵ Inen muwala ta ku mendu, só inen blia wê diné bá son, só inen ômé ku tava nala fáda ku inen muwala: "Pundá nansê bi buká ni ômê di motxi Isé ku ka vivê? ⁶ Ê na sai nai fá, Ê lesusita! Nansê ká lemblá olá Ê fla nansê, olá Ê tava ku nansê ni Galileia, ⁷ olá Ê flá ku Mina di Ômé ká tá ni môn dinen pekadô pá inen pô klusifiké, maxi ni têsêlu djá ê ká blia vivê". ⁸ Sósó inen muwala lembla di falá sé ku Ê fla. ⁹ Só, inen xê ni ximiteli, bá kontá inen kua sé dá inen onzé, ku inen tudaxi. ¹⁰ Maia madalena, ku Juana, ku Maia, men di Txiagu, ku inen ôtlô muwala ku tava ku inen flá kua sé ku inen bê dá inen apoxtulu. ¹¹ Maxi inen apoxtulu ná kêlê ni kua inen muwala flá fá, inen fála sé inen pia mô kua ku inen muwala ká fla vonvon. ¹² Zawo, Pedlu, lanta bá ximitéli. Só ê vlegá pê pô pia ni dlentu, só ê pia lôpá ku Jizu tava kue tan. Sósó ê kôlê bá ké ku gôzô ni kloson ni kua ku tava kontexidu. ¹³ Ni djá sé mé, dôsu dinen tava ká bá uã vilá ku ká sama Emaús, niuã distansia di dôzê kilomitlu di Jiluzalen. ¹⁴ Só inen tá ká ndá ká klonvesá di tudu kua sé ku tava kôlidu. ¹⁵ Zawo, olá inen tava ká flá ni kua sé, sósó Jisú plasê ni wê dinen, só ê tava ka ndá ku inen. ¹⁶ Maxi inen na tava ká sêbê ku ê sá Jizú mé. ¹⁷ Jisu puntá inen: "Di kê kua nansê ixká flá ni camiã?" Só inen mundjá tlixti. ¹⁸ Uã dê, ku ká sama Kléopas kuji: "Bô tá ku na sêbê kua ku dá ni Jiluzalen ni inen djá sé"? ¹⁹ Só Ê fla dá Inen: "kê kwa?" Inen kuji: "Kua ku ká toka Jizú di Nazalé, Isé ku fô uã Plofeta pôdêloso ni obla ku palavla, ni wê di Desú ku tudu pôvô, ²⁰ Isé ku inen mesé ku inen sasedotxi ku inen atolidaji só tlégué pé fô kondenadu dá motxi, só a klusifiké. ²¹ Non tava ixka kwada ku Ê tava ka bi pa Ê pô livla Islaeli. Zawo, ê ixká fé tlexi já ku kwa sé kontesê, antê ozé nadaxi. ²² Sá védé kua inen muwala ku tá ni ômê non suplendê non, olá inen flá ku inen bá ximiteli di madlugada. ²³ Inen ná bê glôpô Dê fá, só inen bi flá non ku inen pia uã visondi anzu ku flá ku Jizú sá vivu. ²⁴ Maxi uã -dôsu di non kôlô bá ximitéli bá pia xi kua ku inen muwala flá sé védé; maxi olá inen xigá nala ien ná bê glôpô Dê. ²⁵ Jizú, zawo, fáda inen: "Inen ômé flaku, ku kloson pesadu pa pô kêlê ni tudu kua ku inen plofetá fla! ²⁶ Ku sá plixizu ku Klixtu ká soflê inen kua sé pa Ê lentla ni glolia Dê?" ²⁷ Zawo Ê komesa ku Musé só ê kôlê ni tudu plofetá, só ê fé uã xplikason di tud kua ku Palavla Desú, tava ká flá ni kua ku toka Ê Mé. ²⁸ Olá inen tava ku xigá petu di vila sé, ku inen tava ká bé, Jizú fé mô ungê ku bê ni wê dinen. ²⁹ Maxi inen plufia ku Ê, só inen flá: "Tá nai ku non, punda djá ká bila notxi zá". Sósó Ê lentla tá ku inen. ³⁰ Zawo, olá Ê tava ni mésa ku inen, Ê toma pôn, dá benson, patxi da inen. ³¹ Zawo, wê dinen bili, só inen tava konxé Jizú miôla uô, só Ê plêdê ni wê dinen. ³² Sósó inen fla uã dá ôtlô: "Kloson non na tava ká lédê, olá Ê tava ká fla ku non ni camiã mô Ê tava flás ku non plômé di Palavla Desú?" ³³ Ni momentu sé, inen lantá bá Jiluzalen. Inen fô kontla inen onzé ku tava zuntadu ku inen ôtlô ku tava ku inen, ku flá: ³⁴ Védémé Sumu lesusitá ê plasê dá Simon". ³⁵ Zawo, inen têmbêtê flá kwa ku dá ku inen ni caminã mô inen bê Jizú olá Ê patxi pôn dá inen. ³⁶ Ni momentu sé ku inen tava ká flá kua sé, Jizú plasê ni ômê dinen só Ê flá: "Paji tá ku nansê!" ³⁷ Sun inen tomá suxtu, fika ku mendu, punda inen tava pensá ku inen bê uã suplitu. ³⁸ Maxi Jizú flá: "Pundá kê kwa nansê sá ku mendu? Pundá nansê sá sê kêlê ni klonson di nansê? ³⁹ Pia ni môn Mu, pia ni ôpé Mu, sá Ami mé! Toka Mu pá nansê pia. Uã suplitu na tê kani ku ôsô fá mô nansê ixká bê ku Ami sá kuê". ⁴⁰ Olá Ê fla kwa sé, Ê musá môn ku ôpé dá inen. ⁴¹ Zawo, mô inen ná tava ka kêlê fá, pundá inen tava ka gôgô ku flogá, só Jizú flá inen: " Nansê tê uã kua di kumé? ⁴² Só Inen dá Jizú uã pedasu di pôn ku pixi sadu. ⁴³ Só Jizú tomé kumé ni wê dinen. ⁴⁴ Só Ê flá inen: Olá Un tava ku nansê, Un fla nansê: ku sá plêxizu kumpli tudu ku toka Mu ku tava xklitu ni Alê di Musé, ku inen plofetá ku Salmu". ⁴⁵ Zawo, Ê bili mentxi dinen pá inen pô komplêdê kua ku Palavla Desú tava ká fla. ⁴⁶ Só Ê flá inen: "Axem tava sklevidu ku Klixtu tê ku soflé só lesusitá ni motxi ni têsêlu djá. ⁴⁷ Zawo, ni Nomi Dê, ká pô plegá alependimentu ku péndon di pekadu dá tudu nanson, só a ká komensá ni Jiluzalen. ⁴⁸ Nansê sá sextemunha di inen kwa sé. ⁴⁹ Zawo Un ixká bi ku plômesa di Pé Mu dá nansê; maxi mundjá ni poson antê nansê sá tomadu di pôdê ku ká bi dálá liba". ^{50 51} Zawo, Jizú fô ku inen bá lúwá pétu di Betânia. Só Ê lantá môn Dê, dá bebnson da tudu inen. Sósó, olá Ê tava ká dá benson dá inen, Ê fô (yôlô) só Ê tava ká subli ba ôsé. ⁵² Zawo, inen gôgô kuÊ só inen bila bá Jiluzalen ku glandji lêglia. ⁵³ Sósó inen tava tudu djá ni templu, ká lová Desú.