¹ Maxi Saulu tava ká góló mudú txila vida, di inén dixipulu di Sumú, ê bé anté sumú sasedotxi, ² Ê piji kata da inén sinagoga di Damasku, ku intenson, xi bê ungê ku ká lêlê Stladá, ê ka bê ku iné plésú ba Jéluzalém. ³ Olá ê tavá ka fê viaji sé, ê tava ká xigá petú di Damaskú, moda olá uwã kedaji d'ôsé luji ni bódó dê; ⁴ só olá ê kê son, ê têndê uwã voji ku tava ka fadé: "Saulu, Saulu, kamandá bô ixká plixigui mu dá?" ⁵ Saulu kuji: "Kêngê sá Sumuê? Sumu fadé: "Ami sá Jizú ungê ku bô ixká plixigui; ⁶ maxi lantá sósó lentla poson, nalá Hun gá bá fadá bô kwa ku bô to ká fé". ⁷ Iné ômé ká tava ká fé vyaji ku Saulu fiká sê palavla, ka tendê voji, maxi sê bê ungê ku iská flá. ⁸ Saulu lanta ni son, olá ê bili wê, ê ná tava ká pô pia nadaxi fá. Anton iné ômé ku tava kuê pégé ni mon bê kue Damasku. ⁹ Sósó tlexi já ê fika sê bê, ê na kumé ê ná bebê fá. ¹⁰ Tá sen uwã dixipulu nio Damasku, ku kas samá Ananias. Sumú fadé ni uwã vison: "Anania!" Ê flá: "Ya mu nai, Sumú!" ¹¹ Sumú fadé: "Lantá bá lwá xi ku ká samá dlêtu, ni kê di judá punta da uwã ômé ku ka sama Paulu, di Tasu; punda ê ixká fé lason; ¹² niwã vison, ê pia uwã ômé ku ká sama Nania ku ká bi pê mon ni kabêsá dê, pê bila piá." ¹³ Maxi Nania kuji:"Sumuê hun têndê yô kwa di mali ku ômé sé fé dá iné santu Sumú ku sá ni Jeluzalen. ¹⁴ Ê tê autolidaji di sumu sasedotxi pê pô plêndê tudo ungê ku ká konfesá nome Sumu". ¹⁵ Maxi Sumu fadé: "Bé punda ê sá damu mó vazú kóidú pê pô bê ku nomi mu dá iné ungê ku ná sá miná di Islael fá, ku iné alê; ¹⁶ Hun gá bá musé kantú ê ká bá sufli punda Nomi mú" ¹⁷ Anton Nania bé, ê lentlá ni ké, ê pê mon ni kabisá di Saulu, só ê flá: "Manu Saulu, Sumu Jizú ku tá plasê dá bô ni stladá di anji bô tavá ka bi dê, manda mú bi kulá bô wê pá bô pô piá ôtlô vê, tembeté pá bô pô xá Suplitú Santú". ¹⁸ Axém kua mô kama pixi xê ni wê dê. Sósó ê bila ká pia: Sósó ê lanta fô batxizadú, ¹⁹ Ê kumé tomá fosa. yô djá ê fika ku iné manu ni Damasku. ²⁰ Ê na tadá fá Ê fô ni sinagoga, ê dá plegason di Jizú, flá kuma ê sá mina Desú. ²¹ Tudú ungê ku têndê tavá ku gôstô flá: "Isé na sá ômé sé ku tavá ka pléxigui ni Jeluzalen iné ungê ku tava flá ni nomi Sé?" Ê Bi ku iné Plésu bi nai sumu sasedotxi?". ²² Sósó, Saulu, fika animadú tavá ká plêga di modú ku iné zudé ku tava ni Damasku, fika konfusu, ê tava ka plová ku Jizu sá Klixtu. ²³ Yô djá valá, inen Zudé tava ká zenha di maté. ²⁴ Maxi kua ku inén tavá pensá fé paulu toma conximentu. Iné tava ká gwada pôtô djá ku notxi, pá iné pô matá Paulu; ²⁵ Maxi inén disipulu dê pê Paulu ni uwã sextu glandji desê kuê ni liba di mulú. ²⁶ Olá ê nganh Jelusalén, Saulu gôlô zunta ku inén dixipulu, maxi inén tudaxi tavá ku mnedu dê, inén na tava kêlê kuma ê tava sá uwã dixipulu fá. ²⁷ Maxi Banabé, pê Saulu ni ôpé dê, ê bê kuê fô inen apostulu; ê kontá inén modu ê bê Sumú ni stlada, kun Sun flé kuê, kuma ni Damasku ê fê plegason sê mendu ni nomi di Jizú ²⁸ Ê tava kuê ni Jelusalen, ká lentla ka xê, ká fá sê mendu ni nomi di Sumu Jizú ²⁹ ê tava ká debatê ku inen Helenista; maxi inén tava ka mêsê maté. ³⁰ Olá inen manu sêbê kua sé, inén bi kuê fô Cesareia só inen mandé fô bá Tasu. ³¹ Axém, tudu glêsa ku tava ni Zudéia, Galileia, ku Samaia, tava ku paji tava ká flima, tavá ka ndá ni lespetu Sumu ni konsolu di Suplitu Santu; iné tava ká klêsê ni numelu. ³² Sósó, Pedlu, bê fô tudu region, ê dêsê fô iné pôvô di Desú ku tava ni poson di Lidia. ³³ Sósó ê kontla nalá uwã ômé ka sama Eneias, ku tava káma ôtô anu, punda ê tava palalitiku. ³⁴ Pedlu fadé ã: "Eneias, Jizú, Klixtu ká kulá bô. Lanta lumá kamá bô". Ê lantá miôla sé mé. ³⁵ Sósó tudu ungê kua tava ka vivê ni Lidia ku Sarona, Pia ômê sé kuladú, inén tudaxi tlagá vida dá Jizú. ³⁶ Ni Póson Jope tavá ku uwã dixipula ku ka sama Tabita, ku ká siguinifika "Dokas". Mualá sê ê sá ungê ku ka fê oblá buadu ká zudá iné pobli. ³⁷ Sósó uwã djá ê fika duentxi ê molê. Inén ungê ké, pê niuwã kuatu ku tava ni libá. ³⁸ Mó Lidia tava petú Jope, inén dixipulu têndê ku Pedlu tavá nalá, inén mandá dôsú hômé, bá flá Pedlu: "Bi lêlê non sédu". ³⁹ Pedlu lanta bê ku iné. olá ê xiká iné bê kuê ni kuatu ku tava ni liba. Tudu inén mualá viuva tavá ni opé di Pedlu ká sólá, inén tava ka mostla lôpa ku manta ku Dorka tava ká fé olá ê tavá ku ku inén. ⁴⁰ Pedlu mandá ku tudu ungê xé fô ni kuatu, só ê dá di zuê fê olason. Só ê bilá da glôpô, flá: "Tabita, lanta". Só ê bili wê, pia ⁴¹ Pedlu, tason. Pedlu, dé mon, lanté, sama tudu klixton, ku inén viuva, pá iné pô pia. ⁴² Kua sé bilá konxidu ni tudu kanto di Jope, Yô ungê kêlê ni Sumu. ⁴³ Pedlu fika ni Jope yô djá, ku uwã ômé ku ka sama Simon, kutidô.