¹ Tai tahe uturawo-ki Jonasi Deuxu-ò rexitòenyre taDeuxu-ò: ² “Bedeòhỹtỹna binahãkỹ-ki Deuxu-ò raryre riwawiòhenanykemy rexitòenyre, kia tii rirawyònyre. Kia diarỹ rubuna ijò-ki watximyhỹu raryre, kia waDeuxu wairy-ò roholare! ³ Deuxu wadi rehure Bero nihikỹ sỹy-txi; kia tahe sỹy-txi reare, kia tahe Bero nihikỹ ybòle riwahetynyre. ⁴ Tai diarỹ myy rarybere: Deuxu riwahitxinymy riwateònyre. Kia aõbo tiu bedeu adòòselekre aõbo ibede wiwihikỹ-ò?” ⁵ Ybò nihikỹ rawo-txi sỹymy reare, kia rubu aõhewe ini riwamyre. Kia bee watyre raratobore. Oteti berawomy rỹimyhỹre waratimy rỹterỹtenyre. ⁶ Kia hãwalò rawoòhòkỹle rehemynyre, Bero nihikỹ sỹy-ò. Diarỹ Deuxu riwahitxinyre iny irumy rỹimyhỹre-ribi, kia tahe brejuna heto-ki raremyhỹ rubu mahãdusu-ki. Tai waDeuxu, rubu mahãdusu-ribi riwatare! ⁷ Kia diarỹ wararòsòna ibutumy reenodỹỹnyre, kia tahe ixyby Deuxu-txi wanohõti reare, waixitòedỹỹna òbitinatyhy-ò tii roholare tabedewihikỹ-ki. ⁸ Kia iny deuxutyhy aõkõ rityhynymyhỹre, kia urile rexibònymyhỹre, aõtxi Deuxu aõnaõnawiwi riwahinymyhỹre rimykewihikỹle ririmyhỹre! ⁹ Kia tiu ixyby iwitxira deuxu watyhydỹỹõna, ka Deuxu òbitile tahe arityhynymy ararekre! Timybo tahe Deuxumy areàlàkre aõnaõna wadee riwinyreki? Kia heka ibutumy arityhynykre aõnaõna riwahinyre diarỹ rewinyre, kiemy dori Deuxu sohojile ibedeerymy wahedỹỹdure.” ¹⁰ Tai tahe Deuxu utura-ò rarybere ỹnyra ubetya-ò Jonasi-di rahyloikremy, kawesemy tahe tuu rutỹỹnyre.