¹ Iruyre txu-my bde rỹireu, inaubiòwa ahãdu-u, wyra inataõnihikỹ bedeu, diarỹ, xaxedòte Ezekieò, Buzi riòre, Babilõnia-ki rahãwanymy raremyhỹ, keba bero ijà-ki, judeo mahãdu, wetxu-my rirahure simahãdu-wna. Biuwetyy rarayre, tahe Deuxu-my rabire rasiwsemy. ² Tuu rutỹỹnyre bedeu, (exilio) Iòlò Joaquim iruyre wyramy ròtena-kibde riwymy roimy raremyhỹ. ³ Tai Babilõnia-ki, keba bero ijà-ki , diarỹ Deuxu wadee rybe-ò raholare tahe irurunihikỹ ixiki reeryre. ⁴ Retehere, tahe yhydebure-my rabire iraru-rbi rarerimy. Biudelaa ròhònymyhỹ biuwetyynihikỹ-rbi. Biuwetyy werura, heòtyhykỹlemy roimyhỹ, heòty wotya-ki tahe aõbo, brõze wesemy tai ruxaranymyhỹ. ⁵ Yhydeburekyki tahe, inaubiòwa iròdu wemy rabire. Iny wesemy idi retehere, ⁶ uriletahe tahe sohoji sohoji rỹimyhỹ, inaubiòwa-my iòsny sõe tule iaubiòwa-my tereny. ⁷ Itireny òbitire, iwareny tahe broreni wsemy idi retehere, tahe brõzi wsemy ruxaranymyhỹ. ⁸ Iòsny, tee inaubiòrehãre, sohoji sohoji, inaubiòwa-my tebòreny sõe, iny debò wsemy, terawoki rỹire. ⁹ Inatxi tereny iraymy idi rỹimyhỹreny, tenorareny widee rỹimy. Tahe inaubiòwa-my rexiwinyrenyre, tahe butumy rariamyhỹreny, rexirahòreõhyy. ¹⁰ Iròdu sohoji sohoji, iòsnyreny wirbi iwitxira witxiralehekỹre: tako-ò iny òsny wsere, ruruwerbi-ò hãlòe òsny wsere, hywe werbi-ò broreni òsny wsere, ihowo-ò tahe nawiihikỹ òsny wsere. ¹¹ Inatxi iròdu de raraymyhỹ biu-ò, tahe sihoji sohoji de tabireldu-ò tee ritòròmyhỹ; ijõ tee inatxi tahe, taumy idi rihetynymyhỹ. ¹² Iròdu sohoji sohoji, inaubiòwa-my tiòtiò retehemyhỹ, tai tahe aõtxile tiò ròimyhỹrenyre, ixiwerydỹỹsiramy aõkõ. ¹³ iròdu mahãdu yki hãte loosò wse aõbo rỹimyhỹ, tiòtiò reamy rỹimyhỹ, heòty ire ranihiỹmyhỹ, tahe heòty-rbi biudelaa ròhònymyhỹ. ¹⁴ Tahe iròdu mahãdu tiòtiò raòrunymyhỹreny biudeelaa wsemy. ¹⁵ Inaubiòwa iròdu-di retehemyhỹu, ianaubiò tewe-my rabire, sohoji sohoji, iwareny bireki. ¹⁶ Tewe inaubiòwa wiwselehekỹre, mna wihikỹ wsemy rasrỹnymyhỹ. Tewe mahãdu wo-ki, ixby tewe-õ roimyhỹ, werehedimy, ¹⁷ tai tahe tewe, ixiwerydỹỹxiramy aõkõ tiò tiò rariamyhỹ. ¹⁸ Tewe ti heka rue-di rỹximy roimyhỹ. ¹⁹ Iròdu mahãdu rariamyhỹu, tewe mahãdu ibirerenydi rariamyhỹ; iròdu mahãdu su-rbi rexiukòmyhỹu, tewe mahãdu tule iherenyki su-rbi ruòmyhỹ. ²⁰ Iròdu mahãdu ixideewimy titxi ròimyhỹ tahe tewe mahãdu iròdu hekile titxi ròimyhỹ, kiemy iròdu boho riwedunymyhỹreny. ²¹ Kiamy tahe, iròdu rariamyhỹreu da kõmy aõbo ruhumyhỹreu da biutxi ruòmyhỹreu, tewe boho iwserenyle riwinymyhỹre. ²² Iròdu boho ratyaki tahe, aõbo waxiwahate wsemy rirahetynymy roimyhỹ, mnarultyrxỹ-di riwinymy. ²³ Irahety rawoki tahe, iròdu boho tereny inatxi inatxi-my riraynymyhỹ tahe tabireldu de-ò tereny riterenymyhỹ, ijõ inatxi-di tahe taumy rihetynymyhỹ. ²⁴ Diarỹ tewodỹỹ-ò raholamyhỹ, ruòmyhỹu. Beronihikỹ wodỹỹ wsemy rawodỹỹnymyhỹ, woudu mahãdu wodỹỹwse rawodỹỹnymyhỹ, Deuxururuterenihikỹ rybe wsemy rawodỹỹnymyhỹ. Tuòsò ixawimyhỹu tee rirasenymyhỹ. ²⁵ Tahe, ihãrele bde wodỹỹ-ò raholamyhỹ, irahety roimyhỹrbi bde wodỹỹ reamyhỹ. ²⁶ Heto wsemy irabumy roimyhỹ ratya-ki, aõbo rynana wsemy rỹimyhỹ, safira-di relemyhỹre wsemy. Tai tahe iny-õ runymyhỹ, hãbu wsemy, ²⁷ tahe tii roosòmyhỹ, brõzi heòty kyki roimyhỹre wsemy. Butumy tii roosòmyhỹ heòty juxara wsemy. ²⁸ Toosòna tahe uajina lỹre wse rare, biuwetyy-ki roimyhỹre wsemy. Kahe loosòna juxarahakỹ rare, Deuxururuterenihikỹ tuu riteòsinyre.